Deibid bin fait langa Amalekait pipul
301Afta na tudeistaim Deibid en im solja olabat bin kamat langa det taun blanga olabat gulum Siklag, en deibin faindat detlot Amalekait pipul bin kaman langa det Isreil kantri gulum Juda sauthsaid, en deibin kaman langa Siklag du, en deibin barnimap det taun. 2-5Dei nomo bin kilim enibodi deya. Bat deibin deigidawei ola gel en ola biginini en ola enijing blanga olabat, en deibin deigidawei det dubala waif blanga Deibid neim Ahinowam en Ebigeil du.
Wal wen Deibid en im solja olabat bin luk wanim bin hepin langa det taun, deibin ol kraikrai brabliwei raidap deibin ol nokap.aFes Semyul 25:42,43
6Wal Deibid bin faindim miselp langa trabul na, dumaji im men olabat bin brabli wail blanga olabat femili, en deibin wandi stonim Deibid ded. Bat YAWEI det trubala God blanga Deibid bin meigim im jandap strongbala, 7en Deibid bin dalim det serramonimen neim Abaiyatha, det san blanga Ahimalek, “Yu bringimap det speshalwan shet gulum ifad.”
Wal det serramonimen bin deigim det speshalwan shet langa im,bFes Semyul 22:20-23 8en Deibid bin askim YAWEI, “Wanim ai garra dum? Ai garra go en ranimap detlot pipul hubin kaman iya en deigidawei ola femili blanga melabat? En if ai ranimap olabat, ai garra gajimap olabat?”
Wal God bin tok, “Yu garra go en ranimap olabat, en yu garra gajimap olabat, en yu garra bringimbek ol detlot pipul weya deibin deigidawei.”
9-10Wal Deibid en detlot 600 men blanga im bin go na, en wen deibin kamat langa det krik gulum Besowa, 200 men bin stap deya, dumaji deibin nokap, en Deibid en detlot najalot 400 men bin kipgon.
11-12Bambai na detlot men bin faindim wanbala lilboi brom Ijip, en deibin deigim im langa Deibid, en deibin gibit im sambala figtri daga en reisan daga en woda, dumaji im nomo bin abum eni daga en woda blanga 3 dei.
Wal afta wen det lilboi bin binij dagat, imbin filim miselp strongbala, 13-14en Deibid bin askim im, “Blanga hu yu bos? En brom weya yubin kaman?”
Wal det lilboi bin tok, “Mi brom Ijip, en mi wekinboi blanga wan Amalekait men. Melabat bin go en deigidawei ola enijing brom det kantri blanga ola Kerathait pipul en brom sauthsaid langa Juda en brom det kantri blanga ola Keilab pipul, en melabat bin go en barnimap det taun gulum Siklag du. En kambektaim main bos bin libum mi iya biyain, dumaji aibin sik.” Lagijat na det lilboi bin tok.
15Wal Deibid bin askim im, “Yu gin deigim mi langa olabat?”
Wal det lilboi bin tok, “Yuwai, ai gin deigim yu. Bat yu garra meigim pramis langa mi nomo blanga kilim mi o jandimbek mi langa main bos. Brabliwei yu garra meigim det pramis.”
16Wal Deibid bin meigim det pramis langa det lilboi, en det lilboi bin deigim im raidap langa det pleis weya detlot Amalekait pipul bin kemp.
Wal wen Deibid en im solja olabat bin kamat deya, deibin luk detlot Amalekait pipul bin ebriweya langa det kemp, en deibin dringgimbat en dagadagat en abumbat gudtaim, dumaji deibin gudbinji blanga ol detlot enijing weya deibin deigidawei brom det dubala kantri gulum Filastain en Juda.
17Wal ailibala neksdei na Deibid en im solja olabat bin fait langa detlot Amalekait pipul raidap sangodan, en deibin kilim olabat ded. Oni 400 yangmen bin gidawei brom olabat garram olabat kemul.
18Wal Deibid bin gedimbek det dubala waif blanga im, en imbin gedimbek ola pipul en ola enijing weya detlot Amalekait pipul bin deigidawei. 19Nomo enijing bin mising. Ola femili blanga im men olabat en ola enijing blanga olabat bin deya, 20en imbin gedim ola enimul du.
Wal detlot men blanga Deibid bin deigimbek detlot enimul lida langa im olawei, en deibin tok, “Dislot ebrijing blanga Deibid.”
21Wal deibin gobek langa det krik weya detlot 200 men hubin nokap bin weidabat, en wen deibin kamat deya, detlot 200 men bin go blanga midim olabat langa roud, en Deibid bin sei gudei langa olabat gudbinjiwei. 22Bat sambala nogudbala men bin tok, “Dei nomo bin kaman garram wi. Wal wi kaan gibit olabat enijing brom dislot ebrijing weya wibin bringimbek. Oni olabat waif en biginini olabat dei gin abumbek.”
23Wal Deibid bin tok, “Main braja olabat, yumob kaan dum lagijat langa dislot ebrijing weya YAWEI bin gibitbek langa wi. Imbin maindimbat wi, en imbin meigim wi bidim detlot enami blanga wi. 24Wal nobodi kaan teiknodis langa yumob, dumaji ebribodi garra abum ebrijing seimwei. Detlot men hubin jidan iya biyain en maindimbat ola enijing garra gedim seimwei laik detlot men hubin go en fait.”
25Wal wen Deibid bin tok lagijat, imbin meigim nyubala lowa blanga olabat. Ebritaim wen deibin oldei win langa fait, detlot solja hubin oldei fait en detlot solja hubin oldei maindimbat ola enijing bin lafta sherimat ola enijing brom det fait mijamet, en brom det taim na ola Isreil pipul bin oldei bulurrumbat det lowa.
26Afta na wen Deibid bin kamat langa Siklag det taun blanga im, imbin jandim sambala enijing langa ola lida deya langa Juda hubin jidan fren blanga im, en imbin jandim wed langa olabat du, “Wal iya sambala enijing weya melabat bin deigidawei brom detlot enami blanga YAWEI.”
27-31Wal Deibid bin jandim det wed en ol detlot enijing langa detlot Isreil pipul deya langa detlot taun gulum Bethel, Rema deya sauthsaid langa Juda, Jeitiya, Eroya, Sifmoth, Eshtamowa, Reikal, Homa, Borashan, Ethak, en Hebran, en langa det Jeramiyel klen en detlot Kenait pipul. En imbin jandim langa ola najalot taun weya Deibid en im men olabat bin go du.

a30:5: Fes Semyul 25:42,43

b30:7: Fes Semyul 22:20-23