Semyul bin dai
251Bambai na Semyul bin dai, en ola Isreil pipul bin majurrumap miselp, en deibin kraikrai blanga im, en afta deibin berrim im bodi langa im ronwan kemp deya langa det taun gulum Rema.
Deibid en Ebigeil
2-3Afta na Deibid bin go en jidan langa det deset kantri gulum Paran.
Wal wan men deya langa det taun bin neim Neibal. Imbin brom det femili gulum Keilab, en imbin brabli ritjmen. Imbin abum kantri langa det pleis gulum Kamul, en imbin abum 3,000 ship en 1,000 gout, en imbin abum brabli purdiwan waif du. Im waif bin neim Ebigeil, en imbin brabli kleba gel. Bat Neibal bin brabli nogudbala, en imbin oldei temperap kwikbala.
Wal wandei Neibal bin deigimatbat detlot wul brom ola ship blanga im deya langa det pleis gulum Kamul, 4en Deibid bin gedim det wed deya langa det pleis weya imbin jidanbat, 5-6en imbin dalim tenbala yangmen blanga im, “Yumob garra go langa det pleis en faindim Neibal, en yumob garra sei gudei langa im blanga mi. Lagijat yumob garra tok, ‘Deibid im tok gudbalawei langa yu, en im wandim yu en yu femili olabat blanga jidan gudbalawei nomo garram eni trabul. 7Imbin gedim wed weya yu deigimatbat detlot wul brom yu ship olabat, en imbin jandim melabat blanga dalim yu ola stakmen blanga yu bin deya langa melabat langa det deset kantri, en Deibid bin tridim olabat gudbalawei, en olataim weya deibin iya langa dijan pleis weya dei jidan tudei, nobodi bin stilim enijing brom olabat. 8If yu nomo bilib langa melabat, wal yu gin askim yu stakmen olabat. Dei dalim yu. Wal melabat bin kaman langa yu tudei dumaji im speshalwan dei, en melabat garra abum padi, en Deibid wandim yu garra gudbinji langa melabat en gibit melabat sambala daga blanga abum det padi, dumaji Deibid im gudfren blanga yu, en melabat jis laiga wekinmen blanga yu du.’ Lagijat na yumob garra tok langa Neibal.”
9Wal afta wen Deibid bin dalim detlot tenbala yangmen lagijat, deibin go langa Neibal, en deibin dalim im ebrijing wanim Deibid bin tok. Bat im nomo bin gibit ensa langa olabat streidawei.
10Bambai na Neibal bin tok langa detlot yangmen. Nomeda imbin sabi Deibid, bat stil imbin tok, “Hu dijan Deibid yumob gulumbat? Ai nomo sabi im. Bat ai sabi loda wekinmen oldei ranawei brom olabat bos. 11Wal ai kaan deigidawei det daga en dringk en bif brom main stakmen olabat en gibit langa najalot men weya ai nomo sabi.”
12Wal wen Neibal bin tok lagijat, detlot yangmen bin gobek langa Deibid, en deibin dalim im ebrijing wanim imbin tok, 13en wen Deibid bin irrim wanim Neibal bin tok, imbin dalim im wekinmen olabat, “Yumob go en gajim ol yumob faiting giya.”
Wal deibin gajim ol detlot enijing blanga fait, en Deibid bin gajim im faiting giya du, en imbin deigim 400 solja garram im, en imbin libum 200 solja biyain blanga maindimbat ola enijing.
14Wal wanbala wekinmen blanga Neibal bin go langa Ebigeil det waif blanga Neibal, en imbin tok, “Yubin irrim nyus? Deibid bin jandim sambala men brom det deset kantri blanga sei gudei langa melabat bos, en det bos blanga melabat bin tok nogudbalawei langa olabat. 15Bat detlot men blanga Deibid bin oldei gudbala langa melabat. Wen melabat bin deya langa olabat, dei nomo bin gibit melabat eni trabul, en dei nomo bin stilim enijing brom melabat du, 16en wen melabat bin lukaftumbat ola ship deya langa olabat, deibin oldei maindimbat melabat ebridei en ebrinait. 17Wal yu garra jinggabat brabliwei wanim yu garra dum blanga dijan, dumaji dis ting garra meigim trabul blanga wi holot, en det bos blanga melabat im brabli nogudbala, en im nomo garram irriwol.”
18Wal wen Ebigeil bin irrim det wekinmen tok lagijat, streidawei imbin gajim bigismob daga blanga deigim langa Deibid. Imbin gajim 200 damba, 2 skinbeig ful garram wain, 5 kukwan ship, 17 kilogrem kukwan sid daga, en bigmob detkain daga dei gulum reisan en fig.
Afta na Ebigeil bin loudimap detlot daga langa sambala dongki, 19en imbin dalim im wekinmen olabat blanga go lida langa im. Bat im nomo bin dalim im hasbin wanim imbin dumbat.
20Wal Ebigeil en im wekinmen olabat bin go en deigim detlot enijing langa Deibid na, en hafwei langa roud wen deibin goran langa kona langa hilsaid, deibin midim Deibid en im solja olabat kaminap langa olabatwei.
21Wal olawei langa det roud Deibid bin jinggabat lagijat, “Wotfo aibin maindimbat ola enijing blanga det men iya langa dijan deset kantri? Aibin gudbala langa im, en nobodi bin stilim enijing blanga im. Bat im nomo bin peiyimbek mi gudbalawei. 22Wal if mi nomo kilim det men en im wekinmen olabat ded bifo sanrais, wal God garra kilim mi ded.” Lagijat na Deibid bin jinggabat wen imbin kaminap langa det roud.
23-24Wal wen Ebigeil bin luk Deibid, streidawei imbin godan brom im dongki, en imbin buldan langa graun lida langa Deibid blanga shoum rispek langa im, en imbin askim im, “Bos, yu lisin langa mi na. Yu garra pudum bleim langa mi. 25Yu kaan teiknodis langa Neibal, dumaji im nogudbala men, en det neim blanga im garram mining. Det neim im tok granggibala. Wal ai nomo bin deya wen yu wekinmen olabat bin kaman garram det wed brom yu.
26“Wal ai dalim yu, bos. YAWEI det trubala God nomo bin larram yu kilim ola men ded blanga peibek. Trubala ai dalim yu, im na garra panishim ol detlot pipul hu nomo laigim yu en wandi ardimbat yu. Im garra panishim olabat jis laik im garra panishim Neibal.
27“Wal bos, yu deigim dislot enijing weya aibin bringimap langa yu, en yu gibit langa yu men olabat, 28en yu larramgo mi fri brom dis nogudbala ting weya bin hepin langa yu, dumaji YAWEI garra meigim yu jidan king, en ola king garra kamat brom yu femili olabat, dumaji yu oldei fait blanga YAWEI. Wal yu nomo wandi dumbat eni nogudbala ting brom tudei raidap yu dai. 29En if enibodi garra lukabat yu blanga deigidawei yu laif, wal dei kaan kilim yu ded, dumaji YAWEI det God blanga yu garra lukaftumbat yu brabliwei, en im na garra deigidawei det laif blanga yu enami olabat.
30-31“Wal bos, wen YAWEI dum ola gudbala ting weya imbin pramisim yu, en wen im meigim yu jidan king blanga ola Isreil pipul, wal yu kaan wori miselp en abum nogud filing, dumaji yu nomo bin peibek en kilimbat enibodi. En bos, wen YAWEI dum lagijat langa yu, wal yu garra jinggabat mi.” Lagijat na Ebigeil bin tok.
32Wal Deibid bin dalim Ebigeil na, “YAWEI det God blanga ola Isreil pipul, en ai gibit theingks langa im, dumaji imbin jandim yu langa mi tudei. 33God garra tridim yu gudbalawei, dumaji yubin jinggabat blanga dum raitwei, en yubin stapam mi brom kilimbat detlot men ded blanga peibek. 34Trubala ai dalim yu. YAWEI nomo bin larram mi meigim trabul blanga yu, dumaji if yu nomo bina kaman kwikbala langa mi, ai bina kilim Neibal en ola men blanga im ded bifo sanrais.” Lagijat na Deibid bin tok.
35Wal Deibid bin deigim ol detlot enijing weya Ebigeil bin bringimap, en imbin dalim im, “Wal yu gobek langa yu kemp gudbinjiwei na, dumaji aibin lisin langa yu wanim yubin tok, en ai garra duwit langa yu. Ai kaan peibek enijing langa yu hasbin na.”
36Wal Ebigeil bin gobek langa im kemp na, en imbin faindim im hasbin Neibal abumbat bigbala padi garram ebrijing jis laiga king. Imbin brabli gudbinji, dumaji imbin brabli drangk.
Wal Ebigeil nomo bin dalim im enijing, dumaji imbin drangk.
37Neksdei na wen Neibal bin soba, Ebigeil bin dalim im ebrijing wanim bin hepin, en wen imbin irrim det stori, imbin gida shok, en imbin deigim fit, en imbin dabulap det bodi holbit, 38en tendeistaim YAWEI bin deigidawei det laif blanga Neibal, en imbin dai na.
39Wal wen Deibid bin irrim det wed weya Neibal bin dai, imbin tok, “Ai gibit theingks langa YAWEI, dumaji Neibal bin tridim mi nogudbalawei, en blanga tharran na God bin peiyimbek im en deigidawei im laif, en im nomo bin larram mi dum enijing rong.”
Afta na Deibid bin jandim wed langa Ebigeil blanga merrit langa im. 40Detlot wekinmen blanga Deibid bin go langa Ebigeil deya langa det pleis gulum Kamul, en deibin tok, “Deibid bin jandim melabat blanga deigimbek yu, dumaji yu garra jidan im waif.”
41Wal Ebigeil bin buldan langa graun blanga shoum rispek langa detlot wekinmen, en imbin tok, “Mi wekingel blanga im, en mi redi blanga dum enijing im wandim mi blanga dum.”
42Afta wen imbin tok lagijat, streidawei imbin gidap, en imbin galimap langa im dongki, en imbin gajim detlot faibala wekingel blanga im, en deibin ol go garram detlot wekinmen blanga Deibid, en wen deibin kamat langa Deibid, Ebigeil bin merrit langa im.
43-44Wal longtaim bifo Deibid bin merrit langa Ebigeil, imbin merrit langa Mikal det doda blanga King Sol. Bat King Sol bin gibit im doda blanga merrit langa najawan men neim Palti. Det men bin san blanga wan olmen neim Layish deya langa det taun gulum Gelim. Afta tharran Deibid bin merrit langa det gel neim Ahinowam brom det taun gulum Jesriyel, en Ebigeil bin jidan det namba thri waif blanga Deibid.aSekan Semyul 3:14-16

a25:44: Sekan Semyul 3:14-16