Ruth bin leidan langa Bowes futwei
31Wal Ruth bin kipgon jidanbat deya garram det olgamen Neiyomi.
Bambai na det olgamen bin dalim Ruth, “Main gel, ai garra faindim hasbin blanga yu na, en yu gin jidan brabli gudbinji langa yu ron kemp. 2Det men Bowes weya yubin wek garram im wekingel olabat, im ful kantrimen blanga det dedbala hasbin blanga mi, en im garra lukaftumbat yunmi.
“Wal yu lisin langa mi na. Tudei naitaim im garra wek deya langa im fam, dumaji dei garra deigimatbat ola rabish brom detlot sid daga.
3Wal yu go en bogi, en afta yu pudumon det gudsmelwan medisin, en yu garra dresimap miselp garram gudwan klos, dumaji yu garra go deya weya Bowes deigimatbat ola rabish brom detlot sid daga. Bat yu kaan larram im sabi yu deya raidap im binij dagadagat daga en dringgimbat. 4Afta na yu garra luk wujei im leidan, en wen im ded silip, yu garra go en lidimap det bleingkit blanga im, en yu garra leidan langa im futwei, en wen im weikap, im garra dalim yu wanim yu garra dum.” 5Lagijat na det olgamen bin dalim Ruth blanga dum.
Wal Ruth bin tok, “Orait, olgamen. Ai garra dum ebrijing yubin dalim mi.”
6Brom deya Ruth bin gidap, en imbin go langa det pleis weya Bowes bin klinimbat detlot sid daga, en deya na Ruth bin dum ebrijing det olgamen bin dalim im.
7Wen Bowes bin binij dagadagat daga en dringgimbat, imbin sedisfaid na, en imbin go en leidan wansaid langa detlot sid daga weya deibin hipimap, en wen imbin ded silip, Ruth bin snikap langa im kwaitbalawei, en imbin lidimap det bleingkit, en imbin leidan deya wansaid langa im futwei.
8Bambai na midulnait Bowes bin weikap kwikbalawei, en imbin tenim miselp, en imbin gedim shok wen imbin faindim det gel leidanbat deya langa im futwei, 9en imbin askim det gel, “Hu yu?”
Wal det gel bin tok, “Mi Ruth. Aibin kaman iya dumaji yu ful kantrimen blanga det dedbala hasbin blanga det olgamen Neiyomi, en yu garra lukaftumbat mi. En if yu wandim, yu gin merrit langa mi.”
10Wal Bowes bin tok, “Ai gibit theingks langa YAWEI det trubala God blanga gudbala gel laik yu. Bifo yubin lukaftumbat det olgamen brabliwei, en tudei yu kipgon lukaftumbat im brabli gudwei. Maitbi yubin wandim go en lukabat yangboi, maitbi ritjwan o powan. Bat najing. Yu nomo bin dum detkain. Yubin wandi merrit langa det olgamen femili.
11“Wal yu nomo wori na Ruth. Ai garra dum ebrijing yubin askim mi. Ebribodi langa dijan taun sabi yu brabli gudwan gel. 12En im trubala tharran deya yubin tok. Mi ful kantrimen blanga det dedbala hasbin blanga det olgamen, en ai garra lukaftumbat yu. Bat najawan ful kantrimen deya im bos oba langa mi.aRuth 2:20
13“Wal yunmi jidan iya raidap ailibala, dumaji ailibala yunmi garra faindat if im wandi lukaftumbat yu. En if im tok yuwai, wal im rait. Bat if im tok im nomo wandi lukaftumbat yu, wal trubala ai dalim yu. Ai garra lukaftumbat yu brabliwei. Wal yu leidan iya na raidap ailibala.” Lagijat na Bowes bin tok.
14Wal Ruth bin leidan langa im futwei. Bat longwei deilait imbin gidap, dumaji Bowes nomo bin wandim enibodi garra sabi Ruth bin deya.
15Wal Bowes bin dalim Ruth, “Yu gibit mi det klos laiga bleingkit weya yubin repdimap yuselp, en yu spredimat im iya.”
Wal Ruth bin pudumdan det klos laiga bleingkit deya, en Bowes bin pudum bigmob sid daga langa im. Gulijap 20 kilogrem imbin pudum, en imbin lafta album det gel pudum langa im sholda, dumaji det loud bin brabli hebiwan.
Brom deya Ruth bin gobek langa taun garram detlot sid daga, 16en wen imbin kamat langa det olgamen kemp, Neiyomi bin askim im, “Wanim bin hepin, main gel?”
Wal Ruth bin dalim det olgamen ebrijing weya Bowes bin dalim im, 17en afta imbin tok, “Iya luk, olgamen. Imbin dalim mi nomo blanga kambek langa yu nomo garram enijing. Blanga tharran na imbin gibit mi ol dislot sid daga.”
18Wal Neiyomi bin tok, “Wal yu jis jidan kwait na en weit blanga Bowes. Im sodimat hu garra merrit langa yu. Tudei na im garra dum.”

a3:12: Ruth 2:20