Debra en Barak bin sing song
51Wal det seim dei Debra en Barak det san blanga Abinowam bin sing dijan song.
2
“Gibit theingks langa YAWEI,
dumaji ola Isreil pipul bin majurrumap miselp gudbinjiwei,
en dei nomo bin bradin blanga fait.
3Ol yumob king en ol yumob bos,
yumob garra irrim dijan wed weya minbala garra sing,
dumaji minbala garra tok blanga YAWEI,
en wen yumob irrim dijan song,
yumob garra teiknodis,
dumaji dijan song garra dalim yumob blanga det boswan blanga ola Isreil pipul
Im na YAWEI det trubala God.
4Longtaim wen imbin gowei brom det hil kantri gulum Siyiya,
en wen imbin kaman iya basdam brom det kantri gulum Idam,
ola graun langa dijan kantri bin sheik,
en bigiswan rein bin buldan brom ola klaud ebriweya.
5YAWEI det trubala God blanga ola Isreil pipul bin kaman iya.
YAWEI det bos blanga det hil gulum Sainai bin kaman iya,
en ola najalot hil bin sheik wen imbin kaman.aEksadas 19:18
6Afta na wen det san blanga Einath neim Shemga bin jidan lida,
en wen det gel neim Jeiyel bin jidan laibala,
ola Isreil pipul nomo bin yusum det meinwan roud langa olabat kantri.
7-8Deibin oldei yusumbat ola bush roud,
dumaji wen deibin oldei bulurrum detlot najalot drimin,
ola najalot pipul bin oldei fait langa olabat en bidim olabat.
Bigismob Isreil men bin jidan langa det kantri.
Bat dei nomo bin garrimap eni spiya langa olabat bingga.
En ola taun blanga olabat bin jidan nomo garram pipul.
Ola taun blanga detlot Isreil pipul bin jidan emtiwan raidap Debra bin kaman.
Imbin kaman laiga mami blanga ola Isreil pipul,
9en im filing bin jidan garram ola Isreil bos,
en im filing bin jidan garram detlot Isreil pipul hubin wandi fait.
Gibit theingks langa YAWEI.
10Ol yumob haibala pipul hu oldei raidim ola gudwan enimul,
en ol yumob lobala pipul hu oldei futwok biyain langa olabat,
holot yumob garra irrim en jinggabat wanim ola pipul tok.
11Wen ola pipul go langa wel blanga gajim woda,
dei dalimbat miselp stori blanga YAWEI.
Dei jinggabat ola gudbala ting weya YAWEI bin oldei dum blanga olabat,
en dei jinggabat ola fait weya imbin oldei meigim olabat win.
12Ola pipul jingat en dalim mi blanga kipgon sing olawei en nomo nokap,
en dei dalimbat Barak det san blanga Abinowam blanga go lida en shoum olabat ola enami weya imbin meigim jidan prisana blanga wi.
Ola Isreil solja bin godan brom olabat kemp blanga fait.
13Ol detlot Isreil men hubin deya bin godan garram minbala Barak.
Ola pipul blanga YAWEI bin majurrumap miselp langa im,
en deibin meigim miselp redibala blanga fait langa ola enami blanga olabat.
14Ola men brom Ifreiyim klen bin go langa det plein kantri blanga fait,
en ola men brom Benjamin klen bin go biyain langa olabat,
en ola boswan solja brom Manesa klen bin go du,
en ola boswan solja brom Sebyulan klen bin deya du,
15en ola bosmen brom Isaka klen bin go garram Debra,
en deibin bulurrum Barak langa det plein kantri.
Bat ola pipul brom Rubin klen nomo bin meigimap olabat main,
en deibin jidan biyain garram ola enimul blanga olabat.
16Wotfo deibin kipgon jidanbat garram ola enimul blanga olabat?
Deibin jidan garram ola enimul dumaji deibin agamin,
en dei nomo bin meigimap olabat main gudwei blanga go.
17En ola pipul brom Ged klen bin kipgon jidanbat langa olabat kantri du sanraisaid brom det Jodan Riba,
En ola pipul brom Den klen nomo bin libum olabat bout.
Dei nomo bin gowei brom olabat kantri.
En ola pipul brom Esha klen nomo bin gowei brom olabat kantri du deya wansaid langa det solwoda.
18Bat ola pipul brom Neftali en Sebyulan klen nomo bin jinggabat olabat ronselp,
en dei nomo bin bradin blanga dai langa det fait.
19Langa det taun gulum Tanak wansaid langa det krik gulijap langa Magido,
deya na ola king bin majurrumap miselp blanga fait.
En deya na ola Keinanait king bin fait langa detlot Isreil pipul.
20Bat dei nomo bin bidim detlot Isreil pipul,
dumaji YAWEI bin meigim ola sta langa top fait langa detlot boswan solja neim Sisera,
en ola sta bin fait blanga ola Isreil pipul,
21en YAWEI bin meigim det Kishan Riba meigim miselp fladwoda,
en det fladwoda bin tjakidawei ola solja blanga Sisera.
YAWEI bin bekimap minbala,
en minbala bin filim miselp mowa strongbala,
22en afta ola hosis blanga ola solja blanga Sisera bin ranawei,
en deibin meigim det graun sheik,
dumaji deibin galap detmatj,
23en det einjul blanga YAWEI bin tok,
‘Ai garra panishim detlot pipul hu jidan langa det taun gulum Meras,
dumaji dei nomo bin album mi.
Dei nomo bin meigim miselp solja blanga fait garram mi.’
Lagijat na det einjul blanga YAWEI bin tok.
24Det waif blanga Hiba det Kenait men im jidan brabli gudbinji.
Det gel bin neim Jeiyel,
en imbin det lakiwan gel langa ol detlot najalot gel hu oldei jidan insaid langa tent.
25Sisera bin askim im blanga woda.
Bat imbin gibit im milk.
Imbin gibit im det brabli gudwan milk garram purdiwan kap,
26en afta wen imbin silip,
det gel bin gajim shapwan stik garram im lefthensaid bingga,
en imbin gajim hema garram im raidensaid bingga,
en imbin jalk Sisera garram det stik.
Det stik bin go rait thru,
en bastimap im hed boun,
27en Sisera bin dai deya gin langa det graun.
Deya gin wansaid langa det fut blanga Jeiyel imbin leidan ded.
28Det mami blanga Sisera bin oldei wotjimbat roud blanga im san.
Imbin oldei go langa det windo blanga im haus en wotjimbat det roud,
en imbin askim ola wekingel blanga im.
‘Im longtaim na dijan.
Wotfo main san nomo bin kambek garram im hosis en bagi kwikbala?’
29En det brabli klebabala wekingel blanga im bin tok,
‘Olabat bisi gajimbat ola enijing brom detlot Isreil pipul.
Dei bisi kadimatbat ola Isreil gel blanga detlot solja,
en yu san im bisi gajimbat ola purdiwan klos blanga imselp,
en im bisi gajimbat ola purdiwan klos blanga yu du.’
30Lagijat na det wekingel bin tok langa Sisera mami,
en im mami bin kipgon dalimbat miselp det wed.
31Wal lagijat na ola enami blanga YAWEI det trubala God garra dai.
Bat ol detlot pipul hu laigim im brabliwei garra jidan strongbala jis laik det san langa skai weya im gidap ailibala.”
Lagijat na Debra en Barak bin sing.
Brom deya ola Isreil pipul bin jidan gudbalawei langa olabat kantri nomo faitfait blanga 40 yiya.

a5:5: Eksadas 19:18