31-2Wal YAWEI det trubala God bin larram sambala najalot traib kipgon jidanbat langa det kantri gulum Keinan, dumaji imbin wandi testim detlot Isreil pipul hu nomo bin langa det fait longtaim, en imbin wandi titjimbat ol detlot nyuwan jinareishan blanga fait.
3Wal YAWEI bin larram det traib gulum Filastain kipgon jidanbat langa detlot faibala taun, en imbin larram detlot thribala traib gulum Saidan, Keinanait en Hibait kipgon jidanbat langa det hil kantri gulum Lebanan brom det hil gulum Beilemon raidap langa det jampap langa det hil gulum Heimath. 4YAWEI bin libum detlot traib deya blanga testim ola Isreil pipul blanga faindat if dei garra dum wanim detlot lowa bin tok weya Mosis bin gibit langa olabat grengrenfathamob.
5-6Wal wen detlot Isreil pipul bin jidanbat garram detlot siksbala traib gulum Keinanait, Hitait, Emarait, Perasait, Hibait en Jebusait, deibin merrit langa detlot traib, en deibin bulurrumbat ola drimin blanga olabat du.
Det feswan Lida neim Othniyel
7Wal ol detlot Isreil pipul bin dum nogudbala ting langa YAWEI. Deibin tenawei brom im, en deibin bulurrum detlot drimin gulum Beil en Eshara.
8Wal YAWEI bin brabli wail langa olabat, en imbin larram det king brom det kantri gulum Mesapoteimiya go en fait langa olabat en bidim olabat. Det king bin neim Kusharishathaiyim, en imbin jidan bos blanga olabat fo 8 yiya.
9Afta na detlot Isreil pipul bin jingat langa YAWEI blanga album olabat, en imbin jandim det men neim Othniyel blanga seibum olabat. Det dedi blanga Othniyel bin neim Kenas, en Kenas bin det lilwan braja blanga det men neim Keilab.
10Wal YAWEI bin jandim im spirit langa Othniyel, en imbin meigim im lida blanga detlot Isreil pipul.
Brom deya Othniyel en ola Isreil solja bin go en fait langa det king en im solja olabat, en YAWEI bin meigim Othniyel win, 11en ola Isreil pipul bin jidan gudbalawei langa olabat kantri fo 40 yiya, en afta Othniyel bin dai.
Det Lida neim Ihud
12Afta na detlot Isreil pipul bin tenim miselp brom YAWEI en dumbat nogudbala ting, en YAWEI bin meigim det king brom det kantri gulum Moweb mowa strongbala langa detlot Isreil pipul. Det king bin neim Iglan, 13en imbin joinin langa det dubala traib gulum Emanait en Amalekait, en deibin go en fait langa detlot Isreil pipul, en deibin bidim olabat deya langa Jeriko, 14en det king bin jidan bos blanga olabat fo 18 yiya.
15Afta na detlot Isreil pipul bin jingat langa YAWEI blanga album olabat, en imbin jandim wan men neim Ihud blanga seibum olabat. Det men bin lefthenbala, en imbin brom det Benjamin klen, en im dedi bin neim Gira.
Wal ola Isreil pipul bin pikimat Ihud blanga deigim detlot teks mani blanga olabat blanga peiyim det king. 16Bat bifo imbin go langa det king, imbin meigim longwan naif, en imbin shapinim det longwan naif tusaid langa det bleidpat, en afta imbin taiyimap det longwan naif langa im raidensaid insaidwei langa im klos.
17Afta na imbin go garram sambala men, en deibin deigim detlot mani langa det king, 18en wen imbin gibit im det mani, deibin stat blanga gobek na, en wen deibin kamat langa det serramoni pleis gulijap langa det taun gulum Gilgel, Ihud bin dalim detlot men blanga kipgon, 19en imbin gobek langa det king miselp, en imbin dalim im, “Bos, ai garram sigridwan wed blanga yu.” En det king bin dalim ola wekinmen blanga im blanga gowei, en deibin dum wanim imbin dalim olabat, en deibin gowei atsaid.
20Wal det king bin jidanbat insaid langa toilit, en Ihud bin go raidap langa im, en imbin tok, “Ai garram wed blanga yu brom God.” En wen Ihud bin tok lagijat langa im, det king bin jandap, 21-22en garram im lefthensaid bingga Ihud bin pulumat det longwan naif brom im raidensaid, en imbin jalk det king rait langa im binji, en det longwan naif bin kamat langa im bekboun. Wal det king bin brabli fetwan, en wen det longwan naif bin gowin langa im binji, det fet bin gaburrumap det hendul blanga det longwan naif, en Ihud bin libum det longwan naif deya gin langa det king binji.
23Afta na Ihud bin go atsaid brom det rum, en imbin lokimap det dowa, 24en imbin gowei na.
Brom deya detlot wekinmen blanga det king bin kambek, en deibin faindim det dowa bin lok, en deibin reken det king bin bisi, 25en deibin gibit im taim blanga binij. Bat wen deibin luk det dowa bin stil lok, deibin lafta gajim ki blanga opinim, en wen deibin opinim det dowa, deibin faindim olabat bos deya dedbala langa flo.
26Wal Ihud bin gidawei brom det taun bifo detlot wekinmen bin opinim det dowa, en imbin gopas langa det serramoni pleis raidap langa det taun gulum Siyira, 27en wen imbin kamat langa det hil kantri blanga Ifreiyim klen, imbin blowim det hon, en ola Isreil men bin majurrumap miselp langa im, 28en imbin dalim olabat, “Yumob garra bulurrum mi, dumaji YAWEI garra meigim yumob strongbala blanga fait langa detlot Moweb pipul, en wi garra win.”
Wal deibin ol bulurrum Ihud brom ontop langa det hil raidap langa det Jodan Riba, en deibin teikoba ola krosing langa det riba, en dei nomo bin larram enibodi krosim det riba blanga gobek langa det Moweb kantri.
29Wal det seim dei deibin kilim 10,000 Moweb solja ded. Detlot Moweb solja bin ol brabli gud faita. Bat nomo eni solja bin gidawei laibala, 30en det dei na detlot Isreil pipul bin bidim detlot Moweb pipul, en deibin jidan gudbalawei langa olabat kantri fo 80 yiya.
Det lida neim Shemga
31Det nekswan lida blanga detlot Isreil pipul bin neim Shemga. En im dedi bin neim Einath.
Wal Shemga bin kilim 600 Filastain solja ded garram det shapwan stik weya dei oldei bugum buligi blanga meigim det buligi mub, en wen imbin kilim detlot solja, imbin seibum im ronwan pipul seimwei laik detlot najalot lida bin dum basdam.