Ola kantri blanga detlot najalot Isreil klen
181Wal afta wen ol detlot Isreil pipul bin teikoba ola kantri sangodansaid brom det Jodan Riba, deibin ol majurrumap miselp langa det taun gulum Shailo, en deya na deibin ringimap det Seikridwan Tent blanga YAWEI det trubala God.
2Wal faibala klen bin abum olabat kantri. Bat detlot najalot sebenbala klen nomo bin gedim olabat kantri yet, 3en Joshuwa bin dalim ol detlot Isreil pipul, “Yumob grenfatha olabat bin bulurrum YAWEI, en imbin gibit yumob det kantri. Wal wotfo yumob weistimbat taim blanga go en jidan langa detlot kantri? 4-5Det Juda klen bin gedim olabat kantri langa sauthsaid, en det dubala klen blanga Josef bin gedim olabat kantri langa nowathsaid. Wal ai wandim thribala men brom detlot sebenbala klen hu nomo garram olabat kantri, en dei garra go ebriweya langa detlot kantri blanga makam detlot kantri weya yumob wandim. Dei garra kadimat sebenbala kantri, 6en meigim mep blanga detlot kantri, en afta dei garra kambek langa mi garram det mep, en ai garra tjakambat det dubala speshalwan ston blanga faindat wujan kantri YAWEI garra gibit langa ebri femili. 7Bat det Libai klen kaan abum eni kantri seimwei laik ola najalot klen, dumaji YAWEI bin pikimat olabat blanga jidan serramonimen blanga im. En det thribala klen gulum Ged, Rubin en Manesa bin gedim olabat kantri olredi, dumaji Mosis det wekinmen blanga YAWEI bin gibit olabat detlot kantri sanraisaid brom det Jodan Riba.” Lagijat na Joshuwa bin tok langa ola Isreil pipul.
8Wal detlot Isreil pipul bin pikimat detlot men, en Joshuwa bin dalim olabat, “Yumob go ebriweya langa detlot kantri, en yumob garra makam detlot kantri, en afta yumob garra kambek langa mi iya langa dijan taun gulum Shailo, en ai garra tjakambat det dubala speshalwan ston blanga faindat wujan kantri YAWEI garra gibit langa yumob.”
9Wal detlot men bin go ebriweya langa detlot kantri, en deibin makam detlot kantri, en deibin kadimat detlot sebenbala kantri, en deibin meigim mep blanga makam detlot kantri weya deibin kadimat, en deibin raidimdan ola neim blanga ola taun langa detlot kantri du, en afta wen deibin binij dumbat olabat wek, deibin gobek langa Joshuwa deya langa im kemp langa Shailo, 10en deya na imbin tjakambat det dubala speshalwan ston blanga faindat wujan kantri YAWEI garra gibit langa detlot sebenbala klen, en afta imbin gibit detlot sebenbala klen olabat ronwan kantri.
Ola kantri blanga Benjamin klen
11Wal ola femili brom Benjamin klen bin gedim olabat kantri basdam. Det kantri blanga olabat bin jidan langa midul langa detlot kantri blanga det dubala klen gulum Juda en Ifreiyim.
12Det boda nowathsaid langa olabat kantri bin stat deya langa det Jodan Riba, en imbin go langa det hil kantri nowathsaid brom Jeriko, en brom deya imbin go sangodanwei langa det hil kantri raidap langa det deset kantri gulum Bethaben. 13Brom deya det boda bin go langa det hil kantri sauthsaid brom det taun gulum Las o Bethel, en brom deya imbin godan langa det taun gulum Etarotheda raidap langa det hil sauthsaid brom det taun gulum Lowabetharan.
14Det boda sangodansaid langa olabat kantri bin go sauthwei brom det hil raidap langa det taun blanga Juda klen gulum Kiriyabeil o Kiriyajerim.
15-16Det boda sauthsaid langa olabat kantri bin go brom det taun gulum Kiriyajerim langa det pleis gulum Neftowa Spring raidap langa det hil deya langa det pleis gulum Hinam Beli nowathsaid langa det pleis gulum Refait Beli, en brom deya imbin go thru langa det Hinam Beli sauthsaid brom det hil blanga detlot Jebusait pipul raidap langa det pleis gulum Enrogel, 17en brom deya imbin go nowathwei langa det pleis gulum Enshemesh raidap langa det pleis gulum Gelaloth deya sauthsaid langa det jampap langa det hil gulum Edumim, en brom deya det boda bin go sauthwei langa det pleis gulum Bowan Ston, 18en brom deya imbin go nowathsaid brom det hil kantri deya wansaid langa det Jodan Riba kantri, 19en brom deya imbin godan langa det Jodan Riba kantri nowathsaid brom det hil gulum Bethogla raidap langa det solwoda gulum Dedsi deya langa det maus blanga det Jodan Riba.
20Det boda sanraisaid langa det kantri blanga olabat bin bulurrum det Jodan Riba.
Lagijat na det boda bin ran raidaran langa detlot kantri blanga Benjamin klen.
21Det Benjamin klen bin gedim ol detlot taun gulum Jeriko, Bethogla, Emekesis 22Betheraba, Semaraiyim, Bethel, 23Eibim, Para, Ofra, 24Kefaramani, Ofnai en Geba. Deibin gedim ol detlot 12 taun garram ola lilwan taun du weya jidan raidaran langa detlot taun.
25En deibin gedim detlot taun gulum Gibiyan, Rema, Biroth, 26Mispa, Kefara, Mosa, 27Rekem, Aipil, Tarala, 28Sela, Heilaf, Jebus o Jerusalem, Gibiya en Kiriyajerim. Deibin gedim ol detlot 14 taun garram ola lilwan taun du weya jidan raidaran langa detlot taun.
Wal ola femili brom Benjamin klen bin gedim ol detlot taun en ol detlot kantri na.