Det tenbala lowa
Eksadas 20:1-17
51Wal Mosis bin majurrumap ola Isreil pipul en imbin dalim olabat, “Ol yumob Isreil pipul, yumob garra lisin brabliwei langa dislot lowa weya ai garra dalimbat yumob tudei. Yumob garra len ol dislot lowa en yumob garra teiknodis en duwit. 2Deya langa det hil gulum Sainai YAWEI det trubala God blanga wi bin meigim det brabli strongbala pramis, 3nomo oni garram wi dedimob bat garram wi du weya wi jidan laibala tudei. 4Deya ontop langa det bigwan hil YAWEI bin tok langa yumob brom insaid langa det faiya. 5Langa det taim na aibin jandap deya hafwei langa yumob en YAWEI, blanga dalim yumob wanim imbin tok langa mi, dumaji yumob bin bradin blanga det faiya en yumob nomo bin wandi go ontop langa det bigwan hil.
“Wal YAWEI bin tok, 6‘Mi na YAWEI det trubala God blanga yumob hubin bringimat yumob brom Ijip, weya yumob bin wekinmen en wekingel jis laiga prisana.
7“‘Yumob nomo lau blanga weshipbat eni drimin, oni mi na, YAWEI.
8“‘Yumob nomo lau blanga meigim enikain sheip laik enijing langa skai o enijing langa graun o enijing langa woda. 9Yumob nomo lau blanga nildan langa enikain drimin sheip en nomo weship langa detkain ting, dumaji mi na YAWEI det trubala God blanga yumob, en mi jelas en mi nomo laigim enijing blanga deigim main pleis. En ai garra panishim ol detlot pipul hu gibit mi bekboun, en detlot bigininimob blanga olabat weya garra kaman afta raidap langa det namba 4 jinareishan. 10Bat detlot pipul hu laigim mi en bulurrum main lowa, ai garra shoum olabat ai laigim olabat du. Ai garra shoum loda pipul ai laigim olabat brabliwei.aEksadas 34:6,7; Labidakas 26:1; Nambas 14:18; Dyudaranami 4:15-18; 7:9,10; 27:15
11“‘Yumob nomo lau blanga yusum main neim nogudbalawei, dumaji mi na YAWEI det trubala God blanga yumob, en ai garra panishim enibodi hu yusum main neim rongwei.bLabidakas 19:12
12“‘Yumob garra meigim det namba 7 dei gulum Sebathdei seikridwan, dumaji mi na YAWEI en mi na dalimbat yumob.cEksadas 16:23-30; 31:12-14 13Yumob gin dum wek fo 6 dei, 14bat langa det namba 7 dei gulum Sebathdei im speshalwan dei blanga main. Nobodi nomo lau blanga dum wek langa det dei, nomo yumob o yumob biginini olabat, o yumob wekinmen en wekingel hu jidan laiga prisana o yumob enimul o pipul weya dei jidan streinja langa yumob kantri. Blanga ol yumob wekinmen en wekingel hu jidan laiga prisana, dei garra abum spel du jis laik yumob.d,14Eksadas 23:12; 31:15; 34:21; 35:2; Labidakas 23:3 15Yumob sabi wen yumob bin jidan wekinmen en wekingel laiga prisana langa Ijip en mi na YAWEI det trubala God blanga yumob bin bringimat yumob brom Ijip garram main gudwan en strongbala pawa. Blanga tharran na mi dalim yu strongbalawei yumob garra meigim det Sebathdei speshalwan blanga main.
16“‘Yumob garra rispek en teiknodis langa yumob dedi en mami. Mi na YAWEI det trubala God blanga yumob en yumob garra dum wulijim ebrijing gin jidan gudwan blanga yumob en yumob gin jidan longtaim langa det kantri weya ai garra gibit langa yumob.eDyudaranami 27:16; Methyu 15:4; 19:19; Mak 7:10; 10:19; Luk 18:20; Ifishans 6:2,3
17“‘Yumob nomo lau blanga medrim enibodi.fJenasis 9:6; Labidakas 24:17; Methyu 5:21; 19:18; Mak 10:19; Luk 18:20; Romans 13:9; Jeims 2:11
18“‘Yumob nomo lau blanga silipsilip garram enibodi, oni yu waif o yu hasbin.gLabidakas 20:10; Methyu 5:27; 19:18; Mak 10:19; Luk 18:20; Romans 13:9; Jeims 2:11
19“‘Yumob nomo lau blanga stilimbat enijing.hLabidakas 19:11; Methyu 19:18; Mak 10:19; Luk 18:20; Romans 13:9
20“‘Yumob nomo lau blanga pudum bleim langa enibodi en tokabat enibodi nogudbalawei.iEksadas 23:1; Methyu 19:18; Mak 10:19; Luk 18:20
21“‘Yumob nomo lau blanga wandimbat najamen waif o haus o im kantri o im wekinmen o wekingel hu jidan laiga prisana o im buligimob o im dongkimob o blanga im ron ebrijing.’ Lagijat na YAWEI bin tok.”jRomans 7:7; 13:9
22Wal Mosis bin kipgon tok, “Dislot na ola lowa weya YAWEI bin dalim langa yumob wen yumob bin majurrumap miselp langa det bigwan hil. Wen imbin tok brom det faiya en brom det bigwan klaud, imbin gibit yumob oni dislot lowa na. Brom deya imbin raidimdan ol dislot lowa langa dubala fletwan ston en imbin gibit langa mi.”
Ola pipul bin bradin
Eksadas 20:18-21
23Wal Mosis bin kipgon tok, “Wen det bigwan hil bin barnbarnbat garram faiya en yumob bin irrim YAWEI tok brom det dakwan pleis, wal yumob lida en ola boswan blanga ola klen blanga yumob bin kaman langa mi, 24en deibin tok, ‘Tudei wen melabat bin lisin langa YAWEI tok brom det faiya melabat bin sabi blanga im shainiwan lait en pawa. Imbin tok langa melabat bat im nomo bin kilim melabat ded. Wal melabat sabi im gin dum lagijat en nomo kilim pipul ded wen im tok langa pipul. 25Bat melabat nomo wandi dai. Det brabli hotwan faiya na garra binijimap melabat. If melabat irrim YAWEI det God blanga wi tok igin, wal melabat garra dai. 26Wen det laibalawan God im tok langa enibodi brom faiya, im gin kipgon jidan laibalawan? Nomo. 27Yu gobek Mosis langa YAWEI blanga wi God en irrim wanim im tok. Brom deya yu garra kambek en dalim melabat wanim imbin dalim yu en melabat garra lisin en duwit.’ Lagijat na ola lidamob en boswan bin tok.”kHibrus 12:18,19
28Wal Mosis bin kipgon tok, “Wen YAWEI bin lisin langa yumob, imbin dalim langa mi, ‘Aibin irrim wanim dislot pipul bin tok en olabat rait. 29Wotfo olabat nomo dum lagijat langa mi olataim? Mi brabli wandim olabat blanga rispek mi en teiknodis langa mi en main lowa wulijim ai garra dum ola gudbala ting olagija langa olabat en langa olabat bigininimob. 30Yu go en dalim olabat blanga gobek langa olabat kemp na. 31Bat yu Mosis, yu jidan iya garram mi en ai garra dalim yu ol detlot lowa en wed blanga main. Brom deya yu garra gobek en titjim ol main lowa langa detlot pipul wulijim olabat garra teiknodis langa detlot lowa langa det kantri weya ai garra gibit olabat na.’ Lagijat na YAWEI bin tok.”
32Wal Mosis bin kipgon tok, “Yumob Isreil pipul, yumob garra teiknodis en duwit ebrijing YAWEI det trubala God blanga wi bin tok blanga im lowa. Yumob dum ebrijing weya imbin dalim yumob blanga dum. 33Yumob teiknodis en duwit langa ol detlot lowa na wulijim ebrijing gin jidan gudbalawei blanga yumob en wulijim yumob gin kipgon jidan langa det kantri weya yumob garra teikoba.”

a5:8-10: Eksadas 34:6,7; Labidakas 26:1; Nambas 14:18; Dyudaranami 4:15-18; 7:9,10; 27:15

b5:11: Labidakas 19:12

c5:12: Eksadas 16:23-30; 31:12-14

d5:13: ,14Eksadas 23:12; 31:15; 34:21; 35:2; Labidakas 23:3

e5:16: Dyudaranami 27:16; Methyu 15:4; 19:19; Mak 7:10; 10:19; Luk 18:20; Ifishans 6:2,3

f5:17: Jenasis 9:6; Labidakas 24:17; Methyu 5:21; 19:18; Mak 10:19; Luk 18:20; Romans 13:9; Jeims 2:11

g5:18: Labidakas 20:10; Methyu 5:27; 19:18; Mak 10:19; Luk 18:20; Romans 13:9; Jeims 2:11

h5:19: Labidakas 19:11; Methyu 19:18; Mak 10:19; Luk 18:20; Romans 13:9

i5:20: Eksadas 23:1; Methyu 19:18; Mak 10:19; Luk 18:20

j5:21: Romans 7:7; 13:9

k5:22-27: Hibrus 12:18,19