Mosis bin gibit gudbala wed langa detlot Isreil klen
331Wal dijan na detlot gudbala wed weya Mosis, det men blanga God bin gibit ola Isreil klen bifo imbin dai. Imbin tok,
2
“Wal YAWEI det trubala God bin kaman brom det hil gulum Sainai.
Imbin gidap jis laik det san brom Idam,
en imbin shain langa im pipul olabat brom det hil gulum Paran.
Bigismob einjul bin deya garram im,
jis laik bigbala faiya langa im raidensaid bingga.
3YAWEI laigim im pipul olabat,
en im oldei maindimbat ola pipul blanga im.
Olabat weship im,
en olabat oldei dum wanim imbin tok.
4Aibin gibit yumob detlot lowa blanga God.
Detlot lowa im brabli gudwan ting blanga wi.
5Wen ol yumob klen en lidamob bin majurrumap miselp,
yumob bin tok, ‘YAWEI jidan king blanga wi.’”
6Blanga det Rubin klen Mosis bin tok,
“Olabat garra kipgon olagijawan,
nomeda olabat garra oldei jidan oni lilbit pipul.”
7Blanga det Juda klen Mosis bin tok,
“Wal YAWEI garra irrim olabat kraikraibat langa im blanga album olabat.
Olabat garra joinap garram olabat najalot klen,
en olabat garra fait langa olabat enami.”
8Blanga det Libai klen Mosis bin tok,
“YAWEI, yu shoum olabat wanim yu wandim olabat blanga dum garram det dubala speshalwan ston gulum Yuram en Thamam.
Yu shoum tharran thru langa detlot trubala wekinmen blanga yu, detlot Libai serramonimen.
Yubin testim olabat deya langa det pleis gulum Mesa,
en yubin sabi olabat brabli trubalawan deya langa det woda gulum Meriba.aEksadas 17:7; 28:30; Nambas 20:13
9Olabat bin brabli gudbala langa yu, YAWEI,
en olabat bin pudum yu lida langa olabat mami en dedi en braja en sista.
Olabat ol bin teiknodis en duwit langa yu wed,
en olabat bin bilib brabliwei langa yu brabli strongwan pramis.
10Olabat na garra titjimbat ola pipul,
wulijim olabat garra teiknodis en duwit langa yu lowa.
En detlot pipul garra oldei pudum sekrifais ofring en barnim det gudsmelwan medisin langa det teibul blanga ofring blanga yu.
11YAWEI, yu garra album dijan klen en meigim olabat jidan strongbala.
Yu gudbinji langa olabat wen olabat oldei dum det speshalwan wek blanga yu.
YAWEI yu garra oldei fait langa ola enami blanga olabat,
en nomo larram detlot enami bidim olabat.”
12Blanga det Benjamin klen Mosis bin tok,
“Wal YAWEI laigim yumob,
en im oldei lukaftum yumob.
Im oldei maindimbat yumob,
en im oldei jidan garram yumob.”
13Blanga det Josef klen Mosis bin tok,
“YAWEI garra jandim gudwan sisan blanga rein langa dijan klen,
en woda garra kamat brom graun langa det kantri.
14Im garra meigim det kantri jidan garram loda gudwan frut daga,
en meigim det frut daga brabli gudwan ebri sisan.
15Im garra meigim ola hil kantri abum loda speshalwan frut daga.
16Im garra meigim det kantri abum loda gudwan ebrijing.
Im garra meigim ebrijing jidan brabli gudwan.
Im na bin tok brom det faiya langa lilwan tri weya nomo bin barn.
YAWEI, yu meigim det klen blanga Josef brabli gudbinji,
dumaji Josef im na bin lida blanga im braja olabat.
17Det dubala ami blanga Ifreiyim en Manesa jidan jis laiga wailwan buligi.
Dei jidan haibala en strongbala.
Dei garra yusum spiya blanga kilim detlot najalot pipul brom najalot kantri.”
18Blanga det dubala klen blanga Sebyulan en Isaka Mosis bin tok,
“Yumob Sebyulan pipul garra abum loda mani brom baiyimbat en selimbat ebrijing brom najalot kantri det jidan najasaid blanga det solwoda.
Yumob Isaka pipul garra abum loda ebrijing langa det kantri weya yumob jidan.
19Yumob garra oldei welkam pipul brom najalot kantri langa det bigwan hil,
en yumob gibit det raitwan sekrifais ofring deya.
Yumob garra gajim loda ebrijing langa det solwoda en langa det sengraun.”
20Blanga det klen blanga Ged Mosis bin tok,
“Yumob preisimbat God.
Im na garra gibit yumob bigismob kantri.
Yumob jidan redibala blanga fait,
jis laiga laiyan redi blanga kilim enimul blanga dagat.
21Yumob bin deigim det gudbala kantri blanga yumob ronselp,
en yumob bin gedim gudbala kantri seimwei laik ola Isreil lidamob.
Wen ola lidamob bin majurrumap miselp,
yumob bin duwit langa YAWEI,
en yumob bin album detlot najalot klen jidan raitwei.”
22Blanga det klen blanga Den Mosis bin tok,
“Wal yumob jis laiga yangwan laiyan weya im oldei jampap brom Beishan.”
23Blanga det klen blanga Neftali Mosis bin tok,
“YAWEI im brabli gudwan langa yumob,
en im garra gibitbat yumob brabli gudwan ebrijing.
Det kantri blanga yumob go sauthwei brom det Leik Gelali.”
24Blanga det klen blanga Esha Mosis bin tok,
“YAWEI garra gibit yumob gudwan ebrijing,
mowa langa najalot klen.
YAWEI garra meigim yumob jidan brabli gudwan fren langa yumob brajamob,
en meigim det kantri blanga yumob abum loda olibtri.
25Im garra meigim detlot taun blanga yumob abum brabli strongwan aiyanwan geit,
en larram yumob oldei jidan deya seifwan.”
26Wal Mosis bin kipgon tok,
“Yumob Isreil pipul, nomo eni drimin laik yumob God.
Im oldei wotjimbat yumob brom top,
en im oldei kamdan brom top en album yumob.
27God bin oldei album yumob,
en im oldei holdim yumob garram im bingga.
Imbin oldei andimwei ola enami brom yumob,
en imbin oldei dalim yumob blanga binijimap ola enami blanga yumob.
28Ola bigininimob blanga Jeikob jidan fri na,
en blanga yumob kantri im seifwan,
en im garram loda sid daga en wain.
En dyu oldei buldan brom top blanga wodarim det kantri.
29Yumob Isreil pipul jidan brabli gudbinji na.
Nomo eni pipul jidan laik yumob.
YAWEI bin seibum yumob.
YAWEI na oldei jidan jis laik det shild en shapwan naif.
Im na oldei lukaftumbat yumob en bidim yumob enamimob.
Detlot enami garra askim yumob blanga kainbala langa olabat,
bat yumob Isreil pipul garra bidim olabat.”
Lagijat na Mosis bin tok.

a33:8: Eksadas 17:7; 28:30; Nambas 20:13