321
“Wal skai en graun, irrim wanim ai sing.
Irrim mi brabliwei.
2Main wed garra buldan laik rein,
en jidan langa graun jis laik dyu.
Main wed garra jidan laik woda langa plent,
en laik rein langa sofwan gras.
3Ai garra preisimbat det neim blanga YAWEI.
Im pipul olabat garra tok im brabli haibala.
4“YAWEI im jis laiga brabli strongwan ston weya kipum yumob seifwan.
Im neba dum eni rong ting.
Yumob gin oldei trastimbat God.
Im brabli gudbala en im oldei gibit feyago.
5Bat yumob nomo trubala langa YAWEI.
Yumob kaan jidan im pipul olabat.
Yumob brabli nogudbala en laiyinbala pipul.
6Wal im nomo gudwei lagijat blanga peiyimbek YAWEI.
Yumob brabli medwan pipul.
Im na yumob dedi en imbin meigim yumob.
7“Yumob garra jinggabat wanim bin hepin brom longtaim.
Yumob askimbat yumob mami en dedi wanim bin hepin.
Yumob askimbat ola pipul en dei garra dalim yumob wanim bin hepin.
8Det brabli haibala God bin gibit pipul miselpmiselp detlot kantri weya olabat jidan.
Imbin faindim kantri blanga pipul blanga jidan.
Imbin gibit ebri traib speshalwan einjul.aEks 17:26
9Bat God bin pikimat det traib blanga Jeikob blanga im ronselp.
10“Imbin faindim yumob wokabat langa deset kantri,
det draiwan pleis weya strongbala win bin oldei bloblobat.
Imbin deya en imbin lukaftum yumob,
jis laik im lukaftumbat imselp.
11Im jis laiga igulok hu oldei titjimbat im beibi blanga flai.
Im oldei spredimat im wing blanga gajim im beibi.
Lagijat na YAWEI bin lukaftumbat ola Isreil pipul.
12Wal YAWEI imselp bin oldei lidim im pipul olabat.
Detlot drimin sheip nomo bin album yumob.
13“YAWEI bin meigim yumob Isreil pipul bos langa hil kantri.
Yumob bin dagat loda daga brom detlot fam.
Imbin gibit yumob shugabeig brom detlot ston.
Yumob bin abum gudwan olibtri langa det stoni kantri.
14Yumob bin abum blendibala milk brom buligi en nenigout.
Yumob bin abum gudwan ship en buligi en nenigout.
Yumob bin abum loda gudwan sid daga en gudwan wain.
15“Yumob bin gro ritjwan, bat yumob bin gibit bekboun langa YAWEI.
Yumob bin gro fetwan en gridiwan garram detmatj daga.
Wal yumob bin libum God hubin meigim yumob.
Yumob nomo bin bilib langa im hubin seibum yumob.
Imbin jis laiga bigwan ston weya bin seibum yumob.
16YAWEI bin brabli jelas wen imbin luk yumob weshipbat olkain drimin sheip.
Det nogudbala ting bin meigim im brabli wail.
17Yumob pipul bin sekrifais langa detlot drimin hu nomo trubala,
en yumob bin abum nyubala drimin weya yumob grengrenfathamob nomo bin sabi.
Yumob nomo bin weship detlot drimin bifo.bFes Karinthiyans 10:20
18Yumob bin fogedabat yumob ronwan God.
God im jis laiga bigwan ston weya bin seibum yumob.
Im det God na hubin gibit yumob laif.
19“Wen YAWEI bin luk tharran imbin brabli wail,
en imbin gibit bekboun langa im san en doda olabat.
20Imbin tok, ‘Ai kaan album yumob.
Ai garra luk wanim garra hepin langa yumob.
Yumob brabli adbala pipul hu jidan nomo trubala langa mi.
21Garram yumob drimin sheip weya yumob bin meigim,
yumob oldei meigim mi jelas en brabli wail.
Detlot na nomo brabliwan.
Ai garra yusum najalot pipul wulijim dei gin meigim yumob wail.
Ai garra meigim yumob jelas blanga detlot pipul hu nomo sabi mi.cRomans 10:19; Fes Karinthiyans 10:22
22Mi brabli wail en mi garra barnbarn jis laik faiya.
Ai garra barnimap ebrijing deya langa graun.
Det faiya garra spredat weya ola dedbala pipul jidan,
en barnimap det graun andanith langa detlot bigwan hil.
23“‘Ai garra bringimap loda brabli nogudwan trabul langa yumob,
en ai garra yusum main spiya langa yumob.
24Yumob garra dai dumaji yumob hanggribala en sikbala.
Yumob garra binijap brom detlot strongbala siknis.
Ai garra jandim ola wailwan enimul blanga ardimbat yumob,
en ola poisinwan sneik blanga baidim yumob.
25Langa roud ai garra jandim loda enami blanga kilimbat yumob.
Olkainaba ting garra kamat langa yumob kemp en bradin yumob.
Ola yangboi en ola yanggel garra dai,
en ola beibi en ol pipul garra dai du.
26Ai bina binijimap yumob raidap yumob holot bin binij,
wulijim nobodi bina jinggabat yumob.
27Bat ai nomo bin wandim detlot enami garra tok praudbalawei weya deibin bidim main pipul,
dumaji mi na bin bidim yumob.’
28“Yumob Isreil pipul yumob nomo abum eni gudwan main.
Yumob nomo sabi enijing.
29Yumob nomo sabi wotfo yumob nomo bin win,
en yumob nomo sabi wanim bin hepin langa yumob.
30Wotfo wanbala men brom detlot enami gin bidim 1,000 pipul brom yumob?
Wotfo dubala men brom detlot enami gin bidim 10,000 pipul brom yumob?
YAWEI na bin libum yumob,
en imbin larram detlot enami bidim yumob.
31Detlot enami sabi detlot drimin blanga olabat dei wikwan.
Olabat nomo strongbala laik det God blanga ola Isreil pipul.
32Detlot enami olabat nogudbala,
jis laik detlot pipul langa det dubala taun gulum Sadam en Gamora.
Olabat jis laik greiptri weya abum jigiwan en poisinwan greip daga,
33en det wain im brabli poisinwan,
jis laik brabli poisinwan sneik.
34“Wal YAWEI sabi wanim yumob enamimob bin dum.
Im garra weit raidap det rait taim blanga panishim olabat.
35YAWEI garra peiyimbek en panishim olabat.
Det taim garra kaman wen olabat ol garra buldan.
Det taim im gulijap wen olabat garra binij.dRomans 12:19; Hibrus 10:30
36YAWEI garra seibum im pipul olabat wen im luk yumob lujim yumob pawa.
Im garra brabli kain langa detlot wekinmen blanga im wen im luk hau dei jidan wikwan.eOla Saam 135:14
37En YAWEI garra tok langa im pipul olabat,
‘Weya ol detlot drimin sheip yumob bin trastimbat?
38Yumob bin gibit olabat det fet brom yumob sekrifais,
en bin pudum wain ofring blanga olabat blanga dringgim.
Wal yumob jingat langa olabat blanga kaman en album yumob.
Larram detlot drimin sheip kaman blanga seibum yumob.
39“‘Nomo eni drimin jidan laibala.
Oni mi na det trubalawan God.
Mi na gibit laif,
en mi na deigimwei laif.
Mi na meigim yumob ardimbat,
en mi na meigim yumob gudbala,
en nobodi gin tjeinjim wanim ai dum.
40Mi na det laibalawan God en trubala ai dalim yumob.
Ai lidimap main bingga blanga meigim dijan strongwan pramis langa yumob.
41Ai garra shapinim main bigwan shainiwan naif,
en ai garra meiksho ebribodi abumbat feyago.
Ai garra panishim main enami olabat,
en ai garra peiyimbek detlot hu nomo laigim mi.
42Main spiya garra jidan garram detmatj blad brom olabat.
Det bigwan shapwan naif blanga main garra kilim ol detlot hu fait langa mi.
Nobodi hu fait langa mi garra jidan laibala,
nomeda olabat langa jeilhaus o hu ardimbat brom faitfaitbat langa wo.
Holot garra dai.’
43“En detlot najalot pipul garra lafta preisim detlot pipul blanga YAWEI,
dumaji im panishim detlot najalot pipul hubin kilim ded im pipul olabat.
YAWEI garra meigim detlot enami pei,
en im garra meigimbat im pipul olabat fri brom olabat nogudbalawei.”fRomans 15:10; Rebaleishan 19:2
44Wal Mosis en Joshuwa det san blanga Nan, dubala bin sing det song adbala wulijim detlot Isreil pipul garra irrim.
45Wal wen Mosis bin binij titjimbat olabat blanga God wed imbin tok, 46“Wal yumob garra meiksho yumob garra teiknodis en duwit ol detlot lowa weya aibin dalim yumob tudei. En yumob garra dalim yumob biginini olabat, wulijim dei garra teiknodis en duwit ol detlot lowa weya aibin titjimbat yumob blanga God. 47Dislot wed aibin lenimbat yumob. Dei nomo rabishwan wed. Dei blanga yumob laif. Wal yumob garra oldei teiknodis en duwit wulijim yumob gin jidan longtaim langa det kantri najasaid langa det Jodan Riba, weya yumob garra teikoba.” Lagijat na Mosis bin tok.
48Wal det seimdei na YAWEI bin tok langa Mosis, 49“Yu garra go langa detlot hil gulum Ebarim langa det kantri gulum Moweb, najasaid langa det taun dei gulum Jeriko. Yu garra galimap langa det hil gulum Neibo, en yu garra luk det kantri gulum Keinan weya ai garra gibit detlot Isreil pipul. 50En deya na yu garra dai langa det hil jis laik yu braja Eran bin dai langa det hil gulum Hora, 51dumaji yunbala nomo bin trubala langa mi deya lida langa detlot Isreil pipul. Wen yubin deya langa det woda pleis gulum Meriba gulijap langa det taun gulum Keidish langa det deset kantri gulum Sin, yu nomo bin rispek langa mi lida langa ola pipul. 52Wal yu gin luk det kantri brom longwei, bat yu kaan go langa det kantri weya ai garra gibit ola Isreil pipul.” Lagijat na YAWEI bin tok.gNambas 27:12-14; Dyudaranami 3:23-27

a32:8: Eks 17:26

b32:17: Fes Karinthiyans 10:20

c32:21: Romans 10:19; Fes Karinthiyans 10:22

d32:35: Romans 12:19; Hibrus 10:30

e32:36: Ola Saam 135:14

f32:43: Romans 15:10; Rebaleishan 19:2

g32:48-52: Nambas 27:12-14; Dyudaranami 3:23-27