God bin raidimdan lowa langa ston
271Wal wen Mosis bin jandap mijamet garram ola boswan langa Isreil, imbin tok langa detlot Isreil pipul, “Yumob garra dum ol detlot ting weya ai dalim yumob tudei. 2-4Yumob garra krosim det Jodan Riba en kamat langa det kantri weya YAWEI det trubala God blanga wi garra gibit yumob, en weya YAWEI bin pramisim wi grengrenfathamob. En det kantri im brabli gudwan garram gudwan graun blanga growimapbat olkain daga. En deya na sangodansaid langa det Jodan Riba, yumob garra meigim jandap sambala bigwan ston langa det hil gulum Ibal en yumob garra rabum olabat garram waitwan klei en raidimdan langa olabat ol detlot lowa weya aibin titjimbat yumob. 5En yumob garra bildimap teibul blanga ofring garram ston. Yumob nomo kadim garram aiyanwan enijing, 6dumaji eni teibul blanga ofring yumob bildimap blanga YAWEI, yumob nomo lau yusum enijing blanga kadim detlot ston. En deya na yumob garra gibit barnapwan sekrifais ofring, 7en yumob garra sekrifais en dagat det feloship ofring en gibit theingks langa YAWEI. 8En langa detlot ston yumob bin rabum garram klei, yumob garra raidimdan gudwei ebri wed blanga God lowa.” Lagijat na Mosis bin tok.aEksadas 20:25; Joshuwa 8:30-32
9Afta na Mosis bin deya mijamet garram detlot Libai serramonimen, en imbin tok langa detlot Isreil pipul, “Yumob Isreil pipul, yumob lisin langa mi. Tudei na, yumob jidan pipul blanga YAWEI det trubala God blanga wi, 10en yumob garra teiknodis en duwit langa im en kipum ol detlot lowa weya aibin dalim langa yumob tudei.” Lagijat na Mosis bin tok.
Panishmen wen pipul nomo kipum detlot lowa
11Wal Mosis bin kipgon tok, 12“Afta wen yumob krosim det Jodan Riba ola pipul brom Simiyan, Libai, Juda, Isaka, Josef en Benjamin klen garra jandapbat langa det hil gulum Gerisim, en olabat garra tok langa ola pipul hau YAWEI garra lukaftumbat en albumbat olabat.bDyudaranami 11:29; Joshuwa 8:33-35 13En ola pipul brom Rubin, Ged, Esha, Sebyulan, Den en Neftali klen garra jandap langa det hil gulum Ibal, 14en detlot Libai serramonimen garra tok adbala ol dislot wed blanga panishmen langa detlot Isreil pipul. Dei garra tok,
15“‘Wal YAWEI garra panishim enibodi hu meigim drimin sheip brom ston, wud, o aiyan en weshipbat tharran snikibalawei, dumaji YAWEI nomo laigim detlot pipul hu dum detlot ting.’
“En ola pipul garra tok, ‘Yuwai! Trubala dijan im tok!’cEksadas 20:4; 34:17; Labidakas 19:4; 26:1; Dyudaranami 4:15-18; 5:8
16“‘Wal YAWEI garra panishim enibodi hu nomo rispek en teiknodis langa im dedi o mami.’
“En ola pipul garra tok, ‘Yuwai! Trubala dijan im tok!’dEksadas 20:12; Dyudaranami 5:16
17“‘Wal YAWEI garra panishim enibodi hu mubumbat eni ston blanga det bandri lain blanga yumob kantrimen.’
“En ola pipul garra tok, ‘Yuwai! Trubala dijan im tok!’eDyudaranami 19:14
18“‘Wal YAWEI garra panishim enibodi hu lidimbat sambodi hu jidan blainwan langa det rong roud.’
“En ola pipul garra tok, ‘Yuwai! Trubala dijan im tok!’fLabidakas 19:14
19“‘Wal YAWEI garra panishim enibodi hu nomo gibit feyago langa detlot pipul brom najawan kantri, o detlot biginini hu nomo garram dedi o mami, o detlot widogel.’
“En ola pipul garra tok, ‘Yuwai! Trubala dijan im tok!’gEksadas 22:21; 23:9; Labidakas 19:33,34; Dyudaranami 24:17,18
20“‘Wal YAWEI garra panishim enibodi san wen im silipsilipbat garram eni waif blanga im dedi. Tharran na garra meigim im dedi sheim!’
“En ola pipul garra tok, ‘Yuwai! Trubala dijan im tok!’hLabidakas 18:8; 20:11; Dyudaranami 22:30
21“‘Wal YAWEI garra panishim enibodi hu silipsilipbat garram eni enimul.’
“En ola pipul garra tok, ‘Yuwai! Trubala dijan im tok!’iEksadas 22:19; Labidakas 18:23; 20:15
22“‘Wal YAWEI garra panishim enibodi hu silipsilipbat garram im sista o im haf sista.’
“En ola pipul garra tok, ‘Yuwai! Trubala dijan im tok!’jLabidakas 18:9; 20:17
23“‘Wal YAWEI garra panishim enibodi hu silipsilipbat garram det mami blanga im ronwan waif.’
“En ola pipul garra tok, ‘Yuwai! Trubala dijan im tok!’kLabidakas 18:17; 20:14
24“‘Wal YAWEI garra panishim enibodi hu medrimbat sambodi sigridbalawei.’
“En ola pipul garra tok, ‘Yuwai! Trubala dijan im tok!’
25“‘Wal YAWEI garra panishim enibodi hu deigim eni mani blanga medrimbat sambodi hu nomo bin dum enijing rong.’
“En ola pipul garra tok, ‘Yuwai! Trubala dijan im tok!’
26“‘Wal YAWEI garra panishim enibodi hu nomo dum wanim imbin tok langa im lowa en wanim imbin titjimbat olabat.’
“En ola pipul garra tok, ‘Yuwai! Trubala dijan im tok!’”lGaleishans 3:10

a27:2-8: Eksadas 20:25; Joshuwa 8:30-32

b27:12: Dyudaranami 11:29; Joshuwa 8:33-35

c27:15: Eksadas 20:4; 34:17; Labidakas 19:4; 26:1; Dyudaranami 4:15-18; 5:8

d27:16: Eksadas 20:12; Dyudaranami 5:16

e27:17: Dyudaranami 19:14

f27:18: Labidakas 19:14

g27:19: Eksadas 22:21; 23:9; Labidakas 19:33,34; Dyudaranami 24:17,18

h27:20: Labidakas 18:8; 20:11; Dyudaranami 22:30

i27:21: Eksadas 22:19; Labidakas 18:23; 20:15

j27:22: Labidakas 18:9; 20:17

k27:23: Labidakas 18:17; 20:14

l27:26: Galeishans 3:10