251Wal Mosis bin kipgon tok, “Wal maitbi dubala brom det Isreil traib go langa kot blanga streitinap det agamin weya dubala abum. Wal wanbala im gudwan en det najawan im giltiwan. 2If det jadj tok dei garra beldim det giltiwan men, det jadj garra meigim im leidan feisdan en beldim im garram wip. Det namba blanga det wip mak garra jidan det rait namba blanga det nogudbala ting weya imbin dumbat. 3Maitbi dei garra gibit im 40 wip mak, jaldu deya na. Yumob kaan gibit oba 40, dumaji yumob mait meigim im brabli sheim lida langa yumob.aSekan Karinthiyans 11:24
4“En wen yumob yusum buligi blanga deigimat det skinpat brom det sid daga, yumob kaan taiyimap det maus blanga im, dumaji im garram det rait blanga dagat det sid daga du.”bFes Karinthiyans 9:9; Fes Timathi 5:18
Wanim blanga dum wen sambodi braja dai
5Wal Mosis bin kipgon tok, “Wal maitbi dubala braja gija jidan langa wanbala fam mijamet en wanbala dai, en im nomo garram eni san. Wal det waif blanga det dedbala men kaan merrit langa naja men brom naja femili. Det braja blanga det dedbala men, im garra merrit det gel. 6En wen dubala faindim det feswan san, wal im garra jidan san blanga det dedbala men, en im garra abum im femili lain kipgon olawei deya langa Isreil.c,6Methyu 22:24; Mak 12:19; Luk 20:28 7Bat if det braja nomo wandim merrit langa im dedbala braja waif, wal det gel garra go bifo det taun lidamob en dalim olabat, ‘Main hasbin braja nomo bin wandim duwit. Imbin jis rabishim im braja en im nomo wandim gibit im femili lain iya langa ola Isreil pipul.’ 8Wal detlot taun lidamob garra gibit oda langa det men blanga kaman, en dei garra tok langa im. If im stil nomo wandim merrit det gel, 9wal det gel garra go deya lida langa im garram detlot taun lidamob en deigimof wanbala but blanga det men. En afta det gel garra tjakam spit langa im feis en tok, ‘Diskain ting na gin hepin langa detkain men hu nomo meigim femili lain blanga im braja.’ 10Wal ola Isreil pipul garra gulum im femili, ‘det femili blanga det men weya im dedbala braja waif bin deigimof im but.’”dRuth 4:7,8
Najalot lowa
11Wal Mosis bin kipgon tok, “Wal maitbi dubala men faitfait en det waif blanga det najamen bin trai blanga album im hasbin, en imbin grebum det naja men boiwan pat. 12Yumob nomo kain langa det gel. Yumob garra kadimof im bingga.
13-14“En yumob kaan trikim enibodi wen yumob yusum det skeil o meshurumbat enijing wen yumob selim. 15En yumob garra meiksho yumob yusum gudwan en trubala langa enibodi wen yumob yusum det skeil o meshurumbat enijing. If yumob dum lagijat, wal yumob garra jidan longtaim langa det pleis blanga YAWEI weya im garra gibit langa yumob. 16Dumaji YAWEI nomo laigim detkain pipul brabliwei hu tjidimbat najalot pipul.”eLabidakas 19:35,36
Det lowa blanga kilim ded det Amalekait traib
17Wal Mosis bin kipgon tok, “Yumob jinggabat wanim det Amalekait traib bin dum langa yumob wen wibin kaman brom Ijip. 18Dei nomo bin bradin langa God. Deibin kaman kwikbala langa yumob brom biyain en fait langa yumob wen yumob bin nokap. En deibin kilim ded ol detlot pipul hubin kaman slobala. 19Wal wen YAWEI bin gibit yumob det kantri, en meigim yumob jidan seifwan brom detlot enami blanga yumob hu jidan deya olaran langa det kantri blanga yumob, wal yumob garra meiksho yumob kilim ol det Amalekait traib, en nobodi kaan jinggabat langa olabat enimo. Nomo foget tharran na.”fEksadas 17:8-14; Fes Semyul 15:2-9

a25:3: Sekan Karinthiyans 11:24

b25:4: Fes Karinthiyans 9:9; Fes Timathi 5:18

c25:5: ,6Methyu 22:24; Mak 12:19; Luk 20:28

d25:7-10: Ruth 4:7,8

e25:13-16: Labidakas 19:35,36

f25:17-19: Eksadas 17:8-14; Fes Semyul 15:2-9