Wen sambodi andimwei im waif en im merrit najawan men
241Wal Mosis bin kipgon tok, “Wal yumob jinggabat. Maitbi wanbala men im merrit langa wanbala gel, en bambai imbin jinggabat blanga libum det gel, dumaji im nomo bin meigim im gudbinji. Wal im garra raidimdan leda na blanga libum det gel, en jandimwei det gel brom im kemp garram det leda.aMethyu 5:31; 19:7; Mak 10:4 2En bambai na maitbi det gel merrit langa naja men. 3Wal maitbi det men jinggabat blanga libum det gel. Wal im garra raidimdan leda na blanga libum det gel, en jandimwei det gel brom im kemp. O maitbi det namba 2 hasbin bin dai. 4Wal det feswan hasbin blanga det gel kaan merrit langa det gel igin, dumaji imbin silip garram det najawan hasbin. If im merrit langa det gel igin, im nomo gudwan langa YAWEI det trubala God. Yumob kaan dum det brabli nogudbala ting langa det kantri weya YAWEI garra gibit langa yumob.”
Difrindifrinwan lowa
5Wal Mosis bin kipgon tok, “Wal if wanbala men im jis git merrit, im kaan streidawei go langa det ami kemp o dum enikain wek blanga gabman. Dei garra larram im go fri fo 1 yiya, wulijim im garra weidabat langa im kemp en meigim im waif gudbinji.
6“Wen yumob lendim enijing langa enibodi, yumob kaan deigim en holdim im granding ston raidap im peiyimbek yumob, dumaji im yusum tharran blanga grandimbat sid daga blanga meigim daga blanga im femili.
7“Wal if eni Isreil men grebum en deigimwei im kantrimen brom im femilimob en meigim im jidan laiga prisana blanga adwek blanga im, o selimbat im, wal im nogud lagijat. Yumob garra lafta binijimap det men. Wen yumob dum lagijat yumob git fri brom det nogudbala ting.bEksadas 21:16
8“En maitbi yumob garram det brabli nogudwan skin siknis. Wal yumob lafta teiknodis wanim detlot serramonimen brom det Libai klen garra dalim yumob blanga meigim yumob gudwan, dumaji yumob garra bulurrum det lowa aibin gibit langa detlot serramonimen.cLabidakas 13:1-14:54 9Yumob jinggabat na wanim YAWEI bin dum langa Miriyam deya wen wibin kaman brom Ijip.dNambas 12:10
10“Wal wen yumob lendim sambodi mani, im garra gibit yumob bleingkit blanga kipum raidap im peiyimbek det mani. Nomo gowin langa det men haus en deigimwei det bleingkit weya imbin tok im garra gibit langa yumob. 11Yumob garra weidabat atsaid, raidap im garra bringimat langa yumob imselp. 12Wal if im po men, wal yumob nomo kipum im bleingkit naitaim. 13Yumob garra gibitbek im ebri koltaim, wulijim im gin abum blanga silip gudwei. Wal im garra jidan hepi, en YAWEI garra gudbinji langa yumob.eEksadas 22:26,27
14“Wal yumob kaan tridim enibodi hu jidan powan nogudbalawei hu wek blanga yumob, nomeda im blanga yumob Isreil traib o brom najawan kantri hu jidan deya garram yumob. 15Ebridei bifo det sangodan yumob garra peiyim im blanga det wek. Im wandim det mani, dumaji imbin weidabat blanga gajim. If yumob nomo gibit langa im, wal im garra jingat adbala langa YAWEI, en yumob garra jidan gilti blanga tharran.f,15Labidakas 19:13
16“Yumob kaan kilim det mami o dedi blanga det nogudbala ting weya im biginini bin dum, en yumob kaan kilim det biginini blanga det nogudbala ting weya im mani en dedi bin dum. Yumob gin oni kilim tharran hubin dum det nogudbala ting.gSekan Kings 14:6; Sekan Kranakuls 25:4; Isikiyel 18:20
17“Yumob garra gibit feyago langa enibodi brom najawan kantri, en langa detlot biginini weya nomo garram mami o dedi, en yumob kaan deigimwei det bleingkit brom widogel wen im owim yumob samting. 18Yumob garra jinggabat wen yumob bin jidan wekinmen en wekingel jis laiga prisana deya langa Ijip, en deya na YAWEI bin meigim yumob fri, en blanga tharran na aibin gibit yumob dijan lowa.h,18Eksadas 23:9; Labidakas 19:33,34; Dyudaranami 27:19
19-21“Wal wen yumob gajim sid daga brom yumob pedik, o detlot frut daga brom detlot olibtri o detlot greip daga brom detlot greip fam en yumob libum sambala weya yumob bin kadim, yumob kaan gobek na blanga gajim, dumaji detlot daga garra jidan blanga detlot brom najawan kantri, en blanga detlot biginini hu nomo garram mami o dedi, en blanga ola widogel. Blanga tharran YAWEI garra jidan brabli kainbala langa yumob.iLabidakas 19:9,10; 23:22 22Yumob garra jinggabat wen yumob bin jidan wekinmen en wekingel jis laiga prisana deya langa Ijip, en blanga tharran na aibin gibit yumob dijan lowa.”

a24:1: Methyu 5:31; 19:7; Mak 10:4

b24:7: Eksadas 21:16

c24:8: Labidakas 13:1-14:54

d24:9: Nambas 12:10

e24:10-13: Eksadas 22:26,27

f24:14: ,15Labidakas 19:13

g24:16: Sekan Kings 14:6; Sekan Kranakuls 25:4; Isikiyel 18:20

h24:17: ,18Eksadas 23:9; Labidakas 19:33,34; Dyudaranami 27:19

i24:19-21: Labidakas 19:9,10; 23:22