Detlot seifwan taun
Nambas 35:9-34; Joshuwa 20:1-9
191Wal Mosis bin kipgon tok, “Wal bambai YAWEI det trubala God garra binijimap ola pipul weya jidan langa det kantri weya im garra gibit yumob. Deya na yumob garra jidan langa olabat kemp en langa olabat taun. 2-3Afta na yumob garra kadimap det kantri langa 3 pat, en langa ebri pat yu garra pikimat wanbala seifwan taun blanga detlot pipul hu jidan gulijap. If sambodi kilim ded sambodi weya im nomo bin wandi kilim im, wal im gin ranawei kwikbala langa det gulijapwan seifwan taun, en wen im jidan langa det seifwan taun nobodi kaan peiyimbek im. 4If sambodi kilim ded sambodi hu nomo im enami en im nomo bin wandi kilim im, wal im gin ranawei langa wanbala seifwan taun. 5Maitbi dubala men go langa bush kantri blanga kadimbat tri en det hedpat blanga det eks blanga wanbala men kamat en kilim ded det najawan men. Wal if diskain ting hepin det men weya bin swingim det eks gin ranawei langa eni seifwan taun blanga detlot thribala taun. 6If yumob pikimat oni wanbala seifwan taun wal sambala pleis garra jidan longwei brom deya. En wen sambodi ranawei langa det seifwan taun maitbi ola femili blanga det dedwan men garra gajim im en kilim im ded bifo im garra gajimap det seifwan taun. Im nomo bin dum enijing rong. Im nomo bin wandi kilim ded det men hu nomo enami blanga im. 7Blanga dijan na aibin dalim yumob blanga meigim thribala seifwan taun.
8“Wal YAWEI garra gibit yumob det kantri weya imbin pramisim langa wi grengrenfathamob. 9-10If yumob laigim im en teiknodis en duwit langa im en len brom im, wal im garra gibit langa yumob det kantri. Wen im gibit yumob det kantri wal yumob garra pikimat naja thribala seifwan taun, wulijim YAWEI kaan tok, ‘Yumob gilti dumaji yumob nomo bin maindim det men weya bin kilim sambodi ded, bat im nomo bin min blanga kilim im ded.’
11“Wal yumob jinggabat na. Maitbi wanbala men meigim det plen blanga medrimbat im enami, en im kilim im ded en im ranawei deya langa wanbala seifwan taun. 12If diskain ting im hepin detlot boswan blanga det men ronwan taun garra jandim pipul blanga gedim im en hendimoba im langa det femilimob blanga det dedwan men, wulijim olabat gin kilim im ded. 13Nomo shoum sori filing langa det men, en nomo larram det giltiwan jidan deya langa Isreil if yumob wandim YAWEI blanga kipgon albumbat yumob langa ebrijing yumob dumbat.”aJoshuwa 20:1-9
Blanga det bandri lain
14Wal Mosis bin kipgon tok, “Wen yumob bin jidan deya longtaim langa det kantri, yumob nomo lau blanga mubum eni ston blanga det bandri lain langa det kantri weya YAWEI garra gibit langa yumob.”bDyudaranami 27:17
Ola witnis garra tok trubalawei
15Wal Mosis bin kipgon tok, “Yumob nomo lau blanga kotim en panishim det wanbala men weya imbin meigim trabul wen oni wanbala witnis bin luk im meigim det trabul, dumaji yumob garra abum dubala o mowa witnis hubin luk langa im wen imbin dum det ting.cNambas 35:30; Dyudaranami 17:6; Methyu 18:16; Sekan Karinthiyans 13:1; Fes Timathi 5:19; Hibrus 10:28 16-17En if sambodi tok laiyawan wed en pudum bleim langa sambodi blanga gibit im trabul, wal det dubala lafta go langa detlot lowamen en detlot serramonimen hu jidan deya en dei garra tok hu rait o hu rong. 18-19Detlot lowamen garra faindat ebrijing wanim bin hepin, en if det men im dalimbat laiya langa im kantrimen. Wal yumob garra panishim det men hubin dalimbat laiya. Im garra abum det seimwan panishmen jis laik imbin wandim det men weya imbin bleim bina abum. If yumob dum jis laik aibin dalim yumob, wal yumob garra stapam diskain nogudbala ting. 20Wen yumob irrim wanim bin hepin yumob garra jidan bradinwan en nobodi garra dum diskain nogudbala ting igin. 21Wen diskain nogudwan ting hepin nomo shoum sori filing langa det giltiwan hu dumbat detkain ting. Wal yumob garra panishim pipul lagijat na. If sambodi kilim sambodi, wal det lowamen garra dum seimwei langa im du blanga panishim im. If sambodi bin deigimat sambodi ai, wal det lowamen garra dum seimwei langa im du blanga panishim im. If sambodi breigim sambodi tuth, wal det lowamen garra dum seimwei langa im du blanga panishim im. If sambodi kadimof sambodi bingga o fut, wal det lowamen garra dum seimwei langa im du blanga panishim im.”dEksadas 21:23-25; Labidakas 24:19,20; Methyu 5:38

a19:1-13: Joshuwa 20:1-9

b19:14: Dyudaranami 27:17

c19:15: Nambas 35:30; Dyudaranami 17:6; Methyu 18:16; Sekan Karinthiyans 13:1; Fes Timathi 5:19; Hibrus 10:28

d19:21: Eksadas 21:23-25; Labidakas 24:19,20; Methyu 5:38