Detlot Midiyan pipul bin abum strongbala panishmen
311Wal YAWEI det trubala God bin dalim Mosis na, 2“Yu garra panishim detlot Midiyan pipul, dumaji deibin tridimbat detlot Isreil pipul nogudbalawei. Afta wen yubin dum tharran yu garra dai.”
3Wal Mosis bin dalim ola Isreil pipul, “Yumob garra gitredi blanga go en fait na dumaji YAWEI im wandi panishim detlot Midiyan pipul blanga wanim olabat bin dum langa yumob. 4Ebri klen blanga Isreil, dei garra jandim 1,000 men blanga go en fait.”
5Wal deibin pikimat 1,000 men brom ebri klen en 12,000 men bin jandap redi blanga go en fait. 6Mosis bin jandim olabat blanga fait anda Finiyas, det san blanga Eliyeisa, det serramonimen. Im na bin det boswan blanga detlot seikridwan ting en blanga det dubala longwan wisul blanga gibitbat woning.
7Wal deibin fait detlot Midiyan pipul na, jis laik YAWEI bin dalim Mosis, en deibin kilim ded ola men. 8En olabat bin kilim ded detlot 5 king blanga Midiyan, Ibi, Rekem, Suya, Huwa, en Reiba, en deibin kilim ded Beilam det san blanga Biyowa.
9Wal detlot Isreil pipul bin gajim detlot Midiyan gel en ola biginini blanga olabat, deibin gajim ola buligi, ola ship, ola gout en ola ebrijing. 10Deibin barnimap detlot taun en olabat kemp. 11Olabat bin deigim ola ebrijing deibin gajim en ola prisana en enimul. 12En olabat bin bringimap ol detlot langa Mosis en Eliyeisa en langa det komyuniti blanga Isreil weya bin jidanbat langa kemp langa det plein kantri gulum Moweb, wansaid langa det Jodan Riba najasaid brom det taun gulum Jeriko.
Ola solja bin kambek
13Wal Mosis en Eliyeisa en ol detlot najalot lida blanga det komyuniti bin go blanga midim detlot amimob. 14En wen Mosis bin midap garram olabat, Mosis bin brabli wail langa detlot boswan hubin kambek. 15Mosis bin askim olabat, “Wotfo yumob bin kipum detlot gel laibala? 16Yumob sabi detlot gel bin oldei bulurrumbat Beilam wed, en deibin oldei lidimbat wi ronwan kantrimen olabat blanga go en weship langa det drimin gulum Beil langa det hil gulum Piyowa, en olabat nomo bin jidan trubala langa YAWEI. Blanga tharran na YAWEI bin panishim detlot pipul garram det brabli nogudwan siknis.aNambas 25:1-9 17Wal yumob garra kilim ded ebri yangboi. En yumob garra kilim ded ebri gel hubin silipsilipbat garram eni men, 18bat if yumob wandim, yumob gin gajim eni gel hu nomo bin silipsilipbat garram eni men blanga yu ronselp.
19“En ol yumob hubin kilim ded enibodi, o hubin tatjim dedwan bodi garra stap atsaid langa det kemp blanga 7 dei. Langa det namba 3 dei en det namba 7 dei yumob garra dum det serramoni blanga meigim miselp klinbala en ol detlot gel weya yumob bin gajimbat du. 20Yumob garra dum det serramoni blanga meigim klinbala ola klos, en ola ebrijing sambodi bin meigim brom letha, gout heya o wadi.” Lagijat na Mosis bin tok.
21Brom deya Eliyeisa det serramonimen bin tok langa detlot men hubin kambek brom det fait, “Dijan na det lowa weya YAWEI bin gibit langa Mosis. 22-23Ola ebrijing det kaan barn langa faiya, detlot gol, silba, kopa, aiyan, tin en led, yumob garra meigim klin langa det faiya. En afta, yumob garra stil dum det serramoni garram det speshalwan woda blanga meigim detlot ting klinbala blanga YAWEI. 24Langa det namba 7 dei, yumob garra washim yumob klos, en lagijat na yumob garra jidan brabli klinbala en yumob gin gobek langa det kemp.” Lagijat na Eliyeisa bin tok.
Deibin kadimat ola ebrijing
25Wal brom deya YAWEI bin dalim Mosis, 26“Yu en Eliyeisa mijamet garram detlot lidamob blanga det komyuniti, yumob garra kaundimap ebrijing weya detlot bin gajimbat brom det Midiyan pipul, en ola prisanamob en enimul. 27Yumob garra kadimap dubala seim, wanbala blanga ola solja en det najawan pat blanga det komyuniti. 28Brom det pat blanga detlot solja yu garra holdim teks blanga YAWEI, wanbala brom ebri 500 prisana, en seimwei brom detlot buligi, dongki, ship, en gout. 29Yumob garra gibit langa Eliyeisa det serramonimen blanga det speshalwan ofring blanga YAWEI. 30Brom det pat blanga detlot najalot pipul, yumob deigim wanbala brom ebri 50 prisana en seim brom det buligi, dongki, ship en gout. Yumob garra gibit detlot langa det Libai klen hu jidan bos langa det Seikridwan Tent blanga YAWEI.” Lagijat na YAWEI bin tok.
31Wal Mosis en Eliyeisa bin dum wanim YAWEI bin dalim dubala.
32-35Dislot na wanim detlot solja bin gajim, 675,000 ship en gout, 72,000 buligi, 61,000 dongki, en 32,000 gel hu nomo bin silipsilip garram eni men. En olabat bin gajim ola najalot ting du, weya deibin lau kipum blanga olabat selp. 36-40Det haf blanga ola solja bin 337,500 ship en gout, en brom detlot deibin gibit 675 langa YAWEI blanga teks, 36,000 buligi en brom detlot deibin gibit 72 langa YAWEI blanga teks, 30,500 dongki en brom detlot deibin gibit 61 langa YAWEI blanga teks, 16,000 gel hu nomo bin silipsilip garram eni men, en brom detlot deibin gibit 32 langa YAWEI blanga teks.
41Wal Mosis bin gibit Eliyeisa detlot ebrijing blanga det teks blanga det speshalwan ofring blanga YAWEI, jis laik wen YAWEI bin tok. 42-46Det pat blanga det komyuniti bin seimwan laik detlot solja, 337,500 ship en gout, 36,000 buligi, 30,500 dongki en 16,000 gel hu nomo bin silipsilip garram eni men. 47En brom dislot na Mosis bin deigimat wanbala brom ebri 50 prisana en enimul. Imbin gibit langa det Libai klen, detlot hu jidan bos blanga det Seikridwan Tent blanga YAWEI. Lagijat na YAWEI bin dalim Mosis blanga dum.
48Afta na detlot boswan blanga detlot solja bin go langa Mosis 49en olabat bin dalim im, “Bos, melabat bin kaundimap detlot solja hu jidan anda langa melabat, en wen melabat bin kaundimap olabat deibin ol deya. 50Blanga tharran na melabat bin bringimap ol detlot golwan ting weya ola enami bin werrimbat. Melabat wandi gibit detlot ebrijing langa YAWEI blanga pei blanga melabat laif, wulijim YAWEI garra maindimbat melabat.” Lagijat na deibin tok.
51Mosis en Eliyeisa bin gajim ol detlot gol wanim detlot najalot pipul bin werrimonbat. 52En det gol bin detmatj, imbin 200 kilogrem. 53En detlot hu nomo bin boswan bin kipum wanim olabat bin gajim. 54Wal Mosis en Eliyeisa bin deigim det gol langa det Seikridwan Tent wulijim YAWEI garra maindimbat detlot Isreil pipul, en blanga album olabat blanga jinggabat hau YAWEI bin maindimbat ola solja.

a31:16: Nambas 25:1-9