Det ofring blanga det Nyu Yiya Serramoni
Labidakas 23:23-25
291Wal Mosis bin kipgon tok, “Wen yumob irrim detlot longwan wisul jingat langa det feswan dei langa det namba 7 manth, yumob garra majurrumap miselp blanga weship, en yumob kaan dum eni wek. 2Yumob garra gibit det barnapwan ofring langa YAWEI det trubala God, en det smel blanga det ofring garra meigim YAWEI brabli gudbinji. Yumob garra gibit wan yangwan buligi, wan dediwan ship en 7 boiwan ship wan yiya ol, en nomo garram enijing rong langa olabat. 3Yumob garra gibit det rait sid daga ofring garram flauwa miksap garram oliboil. Yumob garra gibit 3 kilogrem flauwa garram det buligi, dubala kilogrem garram det dediwan ship, 4en wanbala kilogrem garram ebri yangwan ship. 5En yumob garra gibit det nogudbalawei ofring du blanga deigidawei ola nogudbalawei blanga yumob wulijim yumob gin jidan raitwei langa YAWEI. 6Yumob garra gibit mowa ebrijing langa det barnapwan ofring blanga det feswan dei langa ebri manth garram det sid daga ofring. En ebridei yumob garra gibit det barnapwan ofring yumob garra gibit det sid daga en wain ofring. Wal det smel blanga detlot ofring garra meigim YAWEI brabli gudbinji.” Lagijat na Mosis bin tok.
Det Speshalwan Dei Blanga Deigidawei Ola Nogudbalawei Blanga Pipul
Labidakas 23:26-31
7Wal Mosis bin kipgon tok, “Orait, yumob garra kaman mijamet na blanga weship langa det namba 10 dei langa det namba 7 manth. Yumob kaan dagat eni daga en yumob kaan dum eni wek. 8Yumob garra gibit det barnapwan ofring langa YAWEI. Yumob garra gibit wan yangwan buligi, wan dediwan ship en 7 boiwan ship wan yiya ol, holot nomo garram enijing rong langa olabat, en det smel blanga det ofring garra meigim YAWEI brabli gudbinji. 9Yumob garra gibit det rait sid daga ofring, det flauwa miksap garram oliboil. Yumob garra gibit 3 kilogrem flauwa garram det buligi, en dubala kilogrem flauwa garram det dediwan ship, 10en wanbala kilogrem flauwa garram ebri yangwan ship.
11“Wal yumob garra gibit wanbala boiwan gout blanga det ofring blanga yumob nogudbalawei, en yumob garra gibit najawan gout blanga meigim yumob klinbala blanga serramoni, en ebridei yumob garra gibit det barnapwan ofring garram det sid daga ofring en wain ofring.” Lagijat na Mosis bin tok.aLabidakas 16:29-34
Det ofring blanga det serramoni gulum Hampi
Labidakas 23:33-44
12Wal Mosis bin kipgon tok, “Orait, yumob garra kaman mijamet blanga weship langa det namba 15 dei langa det namba 7 manth. Yumob garra abum det padi blanga weship langa YAWEI blanga 7 dei en yumob kaan dum eni wek. 13Langa det fes dei, yumob garra gibit YAWEI det daga ofring, en det smel garra meigim YAWEI brabli gudbinji. Blanga det ofring yumob garra gibit 13 yangwan buligi, dubala dediwan ship, en 14 boiwan ship wan yiya ol, holot nomo garram enijing rong langa olabat. 14Yumob garra gibit det rait sid daga ofring, det flauwa miksap garram oliboil. Yumob garra gibit 3 kilogrem flauwa garram ebri buligi, dubala kilogrem flauwa garram ebri dediwan ship, 15en wan kilogrem flauwa garram ebri yangwan ship en garram det wain ofring du. 16En yumob garra gibit wanbala boiwan gout du blanga det ofring blanga ol yumob nogudbalawei. Blanga 7 dei yumob garra gibit dislot mowa den det barnapwan ofring garram det sid daga en wain ofring weya yumob gibit ebridei.
17“Wal langa det sekan dei yumob garra gibit dijan ofring, 12 yangwan buligi, dubala dediwan ship en 14 boiwan ship wan yiya ol, holot nomo garram enijing rong langa olabat. 18-19En yumob garra gibit ol detlot najalot ofring weya yumob bin gibit langa det feswan dei.
20“En langa det namba 3 dei yumob garra gibit dijan ofring, 11 yangwan buligi, dubala dediwan ship en 14 boiwan ship wan yiya ol, holot nomo garram enijing rong langa olabat bodi. 21-22En yumob garra gibit ol detlot najalot ofring seim laik weya yumob bin gibit langa det feswan dei.
23“En langa det namba 4 dei yumob garra gibit dijan ofring, 10 yangwan buligi, dubala dediwan ship en 14 boiwan ship wan yiya ol, holot nomo garram enijing rong langa olabat. 24-25En yumob garra gibit ol detlot najalot ofring seim laik weya yumob bin gibit langa det feswan dei.
26“En langa det namba 5 dei yumob garra gibit dijan ofring, 9 yangwan buligi, dubala dediwan ship en 14 boiwan ship wan yiya ol, nomo garram enijing rong langa olabat. 27-28En yumob garra gibit ol detlot najalot ofring seim laik weya yumob bin gibit langa det feswan dei.
29“En langa det namba 6 dei yumob garra gibit dijan ofring, 8 yangwan buligi, dubala dediwan ship en 14 boiwan ship wan yiya ol, holot nomo garram enijing rong langa olabat. 30-31En yumob garra gibit ol detlot najalot ofring seim laik weya yumob bin gibit langa det feswan dei.
32“En langa det namba 7 dei yumob garra gibit dijan ofring, 7 yangwan buligi, dubala dediwan ship en 14 wan yiya ol boiwan ship, holot nomo garram enijing rong langa olabat. 33-34En yumob garra gibit ol detlot najalot ofring seim laik weya yumob bin gibit langa det feswan dei.
35“En langa det namba 8 dei yumob garra ol kaman mijamet na blanga weship en yumob kaan dum eni wek. 36Yumob garra gibit det barnapwan ofring en det daga ofring langa YAWEI, en det smel blanga det ofring garra meigim YAWEI brabli gudbinji. Langa det ofring yumob garra gibit wan yangwan buligi, wan dediwan ship en 7 boiwan ship wan yiya ol, holot nomo garram enijing rong langa olabat. 37-38En yumob garra gibit ol detlot najalot ofring seim laik weya yumob bin gibit langa det feswan dei.bEksadas 23:16; 34:22; Dyudaranami 16:13-15
39“Dijan na wanim yumob garra dum blanga YAWEI langa detlot barnapwan, sid daga, en wain ofring, en detlot feloship ofring. Lagijat na yumob garra dumbat langa YAWEI wen yumob abum ol detlot serramoni, en wen yumob gibit det ofring wen yumob meigim pramis langa YAWEI, en det ofring weya yumob gibit garram yumob ronwan filing.”
40Wal lagijat na Mosis bin dalim detlot Isreil pipul wanim YAWEI bin dalim im.

a29:7-11: Labidakas 16:29-34

b29:12-38: Eksadas 23:16; 34:22; Dyudaranami 16:13-15