241Wal Beilam bin sabi YAWEI det trubala God bin wandim im blanga tok gudbala wed blanga detlot Isreil pipul. Im nomo bin go blanga luk wanim garra hepin laik imbin dum bifo. Imbin tenaran en luk langa det deset kantri, 2en deya na imbin faindim detlot Isreil pipul bin kemp deya langa det deset kantri. En det spirit blanga God bin teikoba langa im na, 3en imbin tok dijan speshalwan wed,
“Mi na Beilam det san blanga Biyowa,
en dijan im jis laiga drim brom God,
bat mi nomo silip.
Dijan wed blanga mi en ai gin luk gudwei.
4Aibin irrim dijan wed dumaji God bin dalim mi.
En aibin luk dijan dumaji det boswan God bin shoum langa mi.
5Detlot tent blanga detlot Isreil pipul olabat brabli gudbala.
6Olabat jis laik pamtri weya im jidan wan lain,
en laik sambala gadin wansaid langa riba,
en laik detlot elos tri weya YAWEI bin growimap olabat,
en laik detlot sidatri weya gro wansaid langa riba.
7Dei garra oldei abum detmatj rein.
Ola biginini blanga olabat garra jidan detmatj.
Olabat king garra jidan mowa haibala langa Eigeg,
en im garra jidan bos langa ola kantri.
8God bin bringimap olabat brom Ijip.
Im oldei fait blanga olabat laiga wailwan buligi.
Dei oldei bidim olabat enami.
Dei breigim olabat boun en tjakidawei olabat spiya.
9Detlot Isreil pipul olabat jis laiga laiyan.
Wen im silip, nobodi kaan weikimap im.
Enibodi hu gibit gudbala ting o wed langa detlot Isreil pipul garra gedim gudbala ting du,
en enibodi hu singim detlot Isreil pipul garra abum det seimwan ting langa imselp.”
Lagijat na Beilam bin tok.aJenasis 12:3; 49:9
10Wal Beilak bin holdim im bingga wailwei, dumaji imbin brabli wail en tok langa Beilam, “Aibin jingat langa yu blanga singim detlot enami blanga main, bat thritaim na yubin tok gudbalawei blanga olabat. 11Yu gobek langa yu kemp na. Ai bina peiyim yu, bat YAWEI nomo bin larram yu gajim det pei.” Lagijat na Beilak bin tok.
12Wal Beilam bin ensim im, “Aibin dalim detlot mesinja weya yubin jandim langa mi, 13nomeda yu gibit mi ol detlot silba en gol weya yu oldei kipum langa yu bigwan haus, bat ai stil garra dum wanim YAWEI main God dalim mi blanga dum. Ai kaan dum enijing miselp. Ai oni tok wanim YAWEI oldei dalim mi blanga tok.” Lagijat na Beilam bin tok.
Beilam bin tok det laswan wed brom God
14Wal brom deya Beilam bin tok langa Beilak, “Ai garra gobek langa main ronwan pipul, bat bifo ai go, ai garra gibit yu woning wanim detlot Isreil pipul garra dum langa yu pipul olabat bambai.” 15En imbin tok dijan speshalwan wed,
“Mi na Beilam det san blanga Biyowa.
Dijan na det wed brom God,
en trubala ai gin luk gudwei.
16Aibin irrim dijan wed weya God bin dalim mi,
en aibin gajim det brabli klebabala main brom det brabli haibala God,
en aibin luk dijan dumaji im na bin shoum langa mi.
17Tudei na ai gin luk det taim weya garra kaman bambai,
en ai gin luk detlot Isreil pipul.
Wanbala king jis laiga braitwan sta garra bon brom detlot Isreil pipul.
Jis laik det brabli braitwan sta,
im garra kaman brom Isreil.
Im garra kilim detlot lida brom Moweb,
en im garra bidim ola pipul blanga Seth.
18Im garra bidim im enamimob langa Idam,
en im garra teikoba ola kantri blanga olabat.
En detlot Isreil pipul garra jidan brabli strongbala.
19Detlot Isreil pipul garra pudumbut langa olabat,
en binijimap detlot laswan pipul.”
Lagijat na Beilam bin tok.
20Afta na Beilam bin luk langa im drim detlot Amalekait pipul en imbin tok dijan speshalwan wed,
“Amalek bin brabli strongbala langa detlot najalot pipul,
bat im garra binij olagijawan na.”
21Wal langa im drim igin imbin luk detlot Kenait pipul, en imbin tok dijan speshalwan wed,
“Det pleis weya yumob jidan im jis laiga strongbala nes weya yumob jidan seifwan ontop langa bigwan rok.
22Bat yumob Kenait pipul garra gitkil wen detlot Asiriya solja garra deigimwei yumob prisana.”
23En Beilam bin tok dijan speshalwan wed,
“Hu dislot pipul hu majurrumapbat miselp langa nowathwei?
24Detlot enami garra kaman brom solwodasaid brom Saipras.
Olabat garra bidim Asiriya en Iba,
bat bambai detmob brom Saipras garra binijap olagijawan.”
Lagijat na Beilam bin tok.
25Afta na Beilam bin gitredi blanga gobek langa im kemp, en Beilak bin gobek langa im kemp du.

a24:9: Jenasis 12:3; 49:9