Nambas
Wen Detlot Isreil Pipul Bin Jidan Langa Deset Kantri
Det basdamwan deibin kaundimap ola Isreil pipul
11Wal YAWEI det trubala God bin tok langa Mosis deya langa det deset kantri gulum Sainai, insaid langa det Seikridwan Tent. Dijan bin det fes dei langa det sekan manth brom det sekan yiya wen ola Isreil pipul bin kamat brom det kantri gulum Ijip. 2-3Wal YAWEI bin tok, “Yu en Eran garra kaundimap ola klen en ola femili blanga ola Isreil pipul. Yu garra raidimdan ola neim blanga ola men 20 yiya ol en oba hu gin fait langa eni enami. 4Yunbala garra askim wanbala boswan brom ebri klen blanga album yunbala.” Lagijat na YAWEI bin tok.
5-16Wal dislot na ola neim blanga detlot men hu garra jidan lida blanga dislot klen, en olabat garra album Mosis en Eran.
Blanga det Rubin klen det lida bin neim Elisuwa det san blanga Shediyu.
Blanga det Simiyan klen det lida bin neim Shelumiyel det san blanga Surishadai.
Blanga det Juda klen det lida bin neim Neishan det san blanga Aminadeb.
Blanga det Isaka klen det lida bin neim Nethanel det san blanga Suwara.
Blanga det Sebyulan klen det lida bin neim Eliyab det san blanga Helon.
Blanga det Ifreiyim klen det lida bin neim Ilaishama det san blanga Amihad.
Blanga det Manesa klen det lida bin neim Gameiliyal det san blanga Pedasura.
Blanga det Benjamin klen det lida bin neim Abidan det san blanga Gidiyanai.
Blanga det Den klen det lida bin neim Ahisa det san blanga Amishadai.
Blanga det Esha klen det lida bin neim Pagiyel det san blanga Okran.
Blanga det Ged klen det lida bin neim Eliyasaf det san blanga Dyuwel.
Blanga det Neftali klen det lida bin neim Ahira det san blanga Einan.
17-19Wal dislot twelbala men na bin album Mosis en Eran blanga raundimap detlot Isreil pipul. Deibin tok, “Yumob kaman iya na. Melabat garra kaundimap ola pipul langa ola klen en ola femili, en melabat garra raidimdan ola neim blanga ola men 20 yiya ol en oba.” Lagijat na deibin dum langa det feswan dei langa det sekan manth, deya langa det deset kantri gulum Sainai dumaji YAWEI bin dalim dubala blanga dum tharran. 20-46Ola men hubin 20 yiya ol en oba, en hu gin fait langa eni enami, deibin raidimdan olabat neim en olabat klen en femili. Deibin stat raidimdan olabat neim blanga det klen det bin kamat brom det bigiswan san blanga Jeikob neim Rubin. Wal dislot na detlot neim en namba weya deibin raidimdan brom ebri klen.
Blanga det Rubin klen det namba bin 46,500.
Blanga det Simiyan klen det namba bin 59,300.
Blanga det Ged klen det namba bin 45,650.
Blanga det Juda klen det namba bin 74,600.
Blanga det Isaka klen det namba bin 54,400.
Blanga det Sebyulan klen det namba bin 57,400.
Blanga det Ifreiyim klen det namba bin 40,500.
Blanga det Manesa klen det namba bin 32,200.
Blanga det Benjamin klen det namba bin 35,400.
Blanga det Den klen det namba bin 62,700.
Blanga det Esha klen det namba bin 41,500.
Blanga det Neftali klen det namba bin 53,400.
Holot bin 603,550.aNambas 26:1-51
47Dei nomo bin raidimdan detlot neim blanga det Libai klen, 48dumaji YAWEI bin tok langa Mosis, 49“Wen yu kaundimap ol detlot men hu gin fait, nomo kaundimap det klen blanga Libai. 50Yu garra meigim det Libai klen jidan bos blanga lukaftumbat detlot ebrijing insaid langa det Seikridwan Tent, en dei garra garrimapbat det Seikridwan Tent garram detlot ebrijing na. En dei garra oldei pudumap olabat ronwan kemp raidaran det Seikridwan Tent. 51Ebritaim wen yumob shifdim kemp langa det nyuwan pleis, wal det Libai klen garra oldei deigimat det Seikridwan Tent en pudumap langa det nyuwan pleis. En if enibodi hu nomo Libai klen kaman gulijap langa det Seikridwan Tent, yu garra kilim im ded. 52En ebri femili blanga ola Isreil pipul garra sabi wujei olabat garra pudumap olabat ronwan kemp gulijap langa olabat ronwan fleig. En ebri klen grup garra jidan gulijap langa olabat ronwan fleig. 53Bat det Libai klen garra oldei kemp raidaran langa det Seikridwan Tent blanga wotjimbat, wulijim nobodi kaan go gulijap langa det Seikridwan Tent en meigim mi brabli einggri langa ola Isreil pipul.” Lagijat na YAWEI bin tok langa Mosis.
54Wal detlot Isreil pipul bin dum ebrijing wanim YAWEI bin dalim langa Mosis.

a1:1-46: Nambas 26:1-51