Detlot speshalwan serramoni blanga Isreil pipul
231-2Wal YAWEI det trubala God bin kipgon dalim Mosis ol dislot lowa blanga kipum wen ola Isreil pipul majurrumap miselp blanga weship. 3Imbin tok, “Yumob garra abum oni 6 dei blanga dum yumob wek, bat langa det namba 7 dei yumob garra abum spel. Langa det dei na, yumob kaan dum eni wek, bat oni majurrumap miselp blanga weship. Wal det namba 7 dei im blanga mi na YAWEI, nomeda weya yumob jidanbat.aEksadas 20:8-10; 23:12; 31:15; 34:21; 35:2; Dyudaranami 5:12-14 4Yu garra dalimbat olabat wen det rait taim blanga dislot serramoni.”
Det Pasoba Serramoni en det Damba Nomo Garram Raising Serramoni
Nambas 28:16-25
5Wal YAWEI bin kipgon tok, “Wal det Pasoba Serramoni im blanga jinggabat langa mi na YAWEI, en im garra stat sangodantaim langa det namba 14 dei langa det feswan manth.bEksadas 12:1-13; Dyudaranami 16:1,2 6En langa det namba 15 dei, det speshalwan serramoni gulum Damba Nomo Garram Raising garra stat, en langa det 7 dei na yumob nomo lau blanga dagat eni damba garram raising. 7En langa det feswan dei yumob garra majurrumap miselp blanga weship en yumob nomo lau dum eni wek. 8Yumob garra gibit detlot ofring langa mi fo 7 dei. Langa det namba 7 dei, yumob garra majurrumap miselp igin blanga weship, bat yumob nomo lau dum eni wek.”cEksadas 12:14-20; 23:15; 34:18; Dyudaranami 16:3-8
Det serramoni blanga detlot feswan sid daga
9-10Wal YAWEI bin tok langa Mosis, “Wal wen yumob garra kaman langa det kantri weya ai garra gibit yumob, yumob garra growimap sambala sid daga. Wen yumob kadim detlot sid daga, yumob garra deigim detlot feswan sid daga langa det serramonimen. 11Im garra gibit speshalwan ofring langa mi wulijim ai garra gudbinji langa yumob. En det serramonimen im garra gibit det ofring det neksdei afta det namba 7 dei. 12Langa det dei wen yumob gibit det sid daga ofring, yumob garra gibit det barnapwan sekrifais ofring du, wan lilwan boiwan ship en nomo garram enijing rong langa im. 13En yumob garra gibit dubala kilogrem flauwa miksap garram oliboil langa det sid daga ofring. Wal det smel blanga det sid daga ofring garra meigim mi brabli gudbinji. En yumob garra meshurum wan lita wain blanga gibit langa mi. 14Nomo dagat eni nyuwan sid daga, nomeda im kukwan, o im nomo kukwan, o damba, raidap yumob bin bringimap detlot ofring langa mi. Wal yumob en ol yumob bigininimob garra kipum det lowa olagijawan.”
Det Serramoni blanga 50 Dei
Nambas 28:26-31
15Wal YAWEI bin kipgon tok, “Wal kaundimap detlot 7 wik brom det nekswan dei afta det namba 7 dei weya yumob bin bringimap det feswan sid daga blanga gibit langa mi. 16En langa det namba 50 dei, det dei afta det 7 wik, yumob garra gibit langa mi det najawan nyuwan sid daga ofring. 17Ebri femili olabat garra bringimap dubala damba en gibit langa mi laiga speshalwan presen. En ebri damba weya yumob meigimbat garra abum dubala kilogrem flauwa miksap garram raising en yumob garra gibit langa mi. Wal dijan ofring blanga det feswan sid daga yumob bin gajim. 18En garram det damba na, ol yumob garra gibitbat 7 lilwan ship, en wan buligi, en dubala dediwan ship. Wal ol detlot enimul olabat kaan abum enijing rong langa olabat. En yumob garra gibit detlot barnapwan ofring langa mi, garram det sid daga ofring, en det wain ofring. Wal det smel blanga detlot ofring garra meigim mi brabli gudbinji. 19En yumob garra gibit wanbala biligout blanga det ofring blanga nogudbalawei, en dubala lilwan boiwan ship, blanga det feloship ofring. 20Wal det serramonimen garra gibit det daga en det dubala lilwan ship en im garra gibit langa mi laiga speshalwan presen blanga detlot serramonimen. Wal detlot ofring im brabli seikridwan. 21En langa det dei na, nobodi nomo lau blanga wek, bat yumob garra majurrumap miselp oni blanga weship. Wal blanga yumob bigininimob, olabat garra dum lagijat en bulurrum det lowa olataim nomeda weya dei jidanbat.dEksadas 23:16, 34:22; Dyudaranami 16:9-12
22“Wen yumob kadimbat detlot sid daga brom yumob pedik, yumob kaan kadimof det sid daga gulijap langa det boda langa det pedik, en yumob kaan gobek en kadimof det sid daga igin. Yumob garra libum ol detlot blanga ola powan pipul en ola pipul brom najalot kantri. Mi na YAWEI det trubala God blanga yumob.”eLabidakas 19:9,10; Dyudaranami 24:19-22
Det Nyu Yiya Serramoni
Nambas 29:1-6
23Wal YAWEI bin kipgon tok, 24“Langa det feswan dei langa det namba 7 manth ol yumob Isreil pipul garra abum spel, en yumob garra majurrumap miselp blanga weship mi wen detlot longwan wisul jingat. 25En yumob garra gibit det ofring langa mi en yumob kaan dum eni wek.”
Det Speshalwan Dei Blanga Deigidawei Ola Nogudbalawei Blanga Pipul
Nambas 29:7-11
26Wal YAWEI bin kipgon tok, 27“Det namba 10 dei langa det namba 7 manth, det dei na yumob garra abum serramoni blanga deigidawei yumob nogudbalawei weya yumob oldei dumbat. Wal langa det dei na, yumob nomo lau blanga dagat eni daga. Yumob garra kaman en weshipbat iya, en gibitbat det ofring langa mi na YAWEI. 28En yumob kaan dum eni wek langa det dei, dumaji im det dei weya yumob garra abum det serramoni blanga deigidawei yumob nogudbalawei. 29En if enibodi dagat enijing langa det dei wal im kaan jidan blanga main pipul olabat. 30En if enibodi dum eni wek langa det dei, wal ai garra binijimap im. 31Tharran na det lowa blanga ol yumob bigininimob blanga bulurrumbat, nomeda weya olabat garra jidanbat. 32Brom sangodantaim langa det namba 9 dei, raidap sangodantaim langa det namba 10 dei langa det namba 7 manth yumob garra abum spel, en langa det dei yumob nomo lau dagat eni daga dumaji im det speshalwan dei.”fLabidakas 16:29-34
Det speshalwan serramoni gulum Hampi
Nambas 29:12-40
33Wal YAWEI bin kipgon tok, 34“Wal det serramoni gulum Hampi garra stat langa det 15 dei langa det namba 7 manth en im garra go fo 7 dei. 35En langa det feswan dei yumob garra majurrumap miselp blanga weship mi, en yumob kaan dum eni wek. 36Ebridei blanga det 7 dei, yumob garra bringimap ofring. En langa det namba 8 dei, yumob garra majurrumap miselp igin blanga weship mi en bringimap ofring, dumaji det dei na blanga weship, en yumob kaan dum eni wek.gDyudaranami 16:13-15
37“Dislot na ola serramoni weya yumob shoum rispek langa mi wen yumob majurrumap miselp blanga weshipbat mi, en yumob bringimapbat detlot barnapwan ofring, sid daga ofring, sekrifais ofring, en wain ofring weya yumob gibit ebridei. 38En yumob garra oldei abumbat det serramoni langa det namba 7 dei en detlot najalot serramoni weya yumob oldei gibit ofring langa mi, en det ofring weya yumob meigim brabli trubalawan pramis langa mi, en det ofring yumob oldei gibit langa mi laiga presen.
39“En wen yumob gajimbat ola sid daga yumob garra abum det serramoni blanga 7 dei. Yumob garra stat langa det namba 15 dei langa det namba 7 manth. Wal det feswan dei, im det speshalwan dei blanga abum spel. 40En langa det dei na yumob garra gajim sambala gudwan frut daga brom yumob tri, en yumob garra deigim pamtri wadi, en det wadi garram lif en yumob garra stat abum det serramoni blanga preisim langa mi. 41Wal det serramoni im oni blanga 7 dei, en tharran na det lowa blanga yumob bigininimob garra kipgon abumbat olataim. 42-43Yumob garra jidan langa hampi blanga 7 dei wulijim detlot bigininimob blanga yumob garra sabi weya aibin meigim yumob Isreil pipul jidan langa detlot hampi wen aibin lidimbat yumob en meigim yumob kamat brom Ijip. Wal mi na YAWEI det trubala God blanga yumob.”hEksadas 23:16; 34:22
44Wal lagijat na YAWEI bin gibit Mosis detlot lowa blanga abum ola serramoni blanga detlot Isreil pipul.

a23:3: Eksadas 20:8-10; 23:12; 31:15; 34:21; 35:2; Dyudaranami 5:12-14

b23:5: Eksadas 12:1-13; Dyudaranami 16:1,2

c23:6-8: Eksadas 12:14-20; 23:15; 34:18; Dyudaranami 16:3-8

d23:15-21: Eksadas 23:16, 34:22; Dyudaranami 16:9-12

e23:22: Labidakas 19:9,10; Dyudaranami 24:19-22

f23:26-32: Labidakas 16:29-34

g23:33-36: Dyudaranami 16:13-15

h23:39-43: Eksadas 23:16; 34:22