Det serramonimen im brabli holiwan
211Wal YAWEI det trubala God bin tok langa Mosis blanga dalim detlot serramonimen brom Eran femili. Imbin tok, “Detlot serramonimen nomo lau blanga tatjim dedwan bodi blanga im rileishanmob, en meigim miselp nomo klinbala blanga serramoni. 2Bat im lau blanga tatjim det dedwan bodi blanga im mami, o dedi, o san, o doda, o braja, 3o im sista hu nomo bin merrit, en jidan langa im kemp. 4Wal im kaan tatjim det dedwan bodi blanga det femilimob blanga im waif en meigim miselp nomo klinbala blanga serramoni.
5“Wal det serramonimen kaan kadim im heya o sheibum im wiska o kadim miselp eniweya langa im bodi, blanga meigim miselp luk soribala.aLabidakas 19:27,28; Dyudaranami 14:1 6Im brabli holiwan. En im kaan meigim main neim nogudwan, dumaji im oldei gibitbat det ofring langa mi, en im jidan holiwan. 7Wal det serramonimen im nomo lau merrit langa det gel hubin silipsilipbat garram enibodi blanga mani, o eni gel hubin silipsilipbat garram men, o eni gel hubin libum im hasbin. Dumaji det serramonimen im holiwan. 8Wal detlot pipul garra lafta jinggabat langa det serramonimen im holiwan, dumaji im gibit langa mi det sid daga ofring. Mi na YAWEI en mi brabli holiwan, mi na meigim main pipul olabat holiwan. 9If det serramonimen doda silipsilipbat garram eni men langa det najakain seikridwan pleis, im garra meigim im dedi sheim, en det gel garra barnbarn langa faiya raidap im garra dai.
10“Wal det haibala serramonimen weya deibin spilim oliboil langa im hed en imbin redi blanga werrimon det seikridwan klos blanga det serramonimen, im kaan libum im heya rafwan o breigim im klos blanga shoum miselp im soribala. 11-12Wal imbin gibit miselp langa mi, en im kaan meigimbat miselp nomo klinbala blanga serramoni, en im kaan gowin langa haus weya eni dedwan bodi jidan en meigim main Seikridwan Tent nomo klinbala blanga serramoni, nomeda if det dedbala im ronwan mami o dedi. 13Im garra lafta merrit wan gel hu nomo bin silipsilipbat garram eni men, 14nomo olgamen hubin lujim im hasbin, o det gel hu hasbin bin libum im, o det gel hubin meigim miselp nogud en silipsilipbat garram eni men blanga mani. En im gin merrit oni gel hu nomo bin silipsilipbat garram eni men, en det gel garra kaman brom im ronwan klen. 15If im nomo dum tharran, wal im biginini kaan jidan holiwan, o klinbala blanga serramoni. Wal mi na YAWEI hubin meigim im jidan haibala serramonimen.
16-17“Aibin dalim Mosis blanga tok dijan. ‘Eni grengrensan blanga Eran hu garram nogudbala ting langa im bodi, im nomo lau blanga gibitbat det sid daga ofring langa mi. 18Enibodi hu jidan blainwan, o leimwan, o garram nogudwan feis, o garram nogudwan bodi brom beibi taim, 19o enibodi hu garram kripulwan bingga, o kripulwan leig, 20o kripulwan bekboun, o hu garram nogudwan ai, o skin siknis, o nogudwan boiwan pat, o shotwan men hu nomo bin gro gudwei, im nomo lau blanga gibitbat det sid daga ofring langa mi. 21Wal nomo eni grengrensan blanga Eran hu garram nogudwan bodi, im nomo lau blanga gibitbat det sid daga ofring langa mi. 22Bat ol detlot men gin dagat det daga garram mi, det seikridwan sid daga ofring, en det brabli seikridwan sid daga ofring. 23Bat dumaji imbin abum nogudwan bodi, im nomo lau blanga kaman iya gulijap langa dijan seikridwan ketin o kaman gulijap langa det teibul blanga ofring, en im kaan meigim nogud detlot seikridwan ting, dumaji mi na YAWEI, en mi na bin meigim detlot ting jidan seikridwan.’” Lagijat na YAWEI bin tok.
24Wal ol dislot lowa na Mosis bin dalim Eran en im sanmob en ol detlot Isreil pipul.

a21:5: Labidakas 19:27,28; Dyudaranami 14:1