Detlot lowa blanga meigim pipul jidan holiwan en gibit feyago
191-2Wal YAWEI det trubala God bin dalim Mosis blanga tok langa ola Isreil pipul. Imbin tok, “Yumob garra jidan holiwan, dumaji mi na YAWEI det trubala God blanga yumob, en mi brabli holiwan.aLabidakas 11:44,45; Fes Pida 1:16 3Yumob garra rispek yumob mami en dedi, en langa det namba 7 dei yumob garra abum spel, dumaji mi na YAWEI det trubala God blanga yumob.bEksadas 20:8,12; Dyudaranami 5:12,16
4“En yumob nomo tenim miselp brom mi en weshipbat olkain laiyawan drimin, en nomo meigimbat drimin sheip brom aiyan en silba blanga weshipbat detlot drimin. Wal mi YAWEI det trubala God blanga yumob.cEksadas 20:23; 34:17; Labidakas 26:1; Dyudaranami 17:25
5“Wal wen yumob kilim det enimul blanga det feloship ofring, yumob garra kipum detlot lowa weya aibin gibit yumob, en ai garra gudbinji garram det ofring. 6Det bif yumob garra lafta dagat det dei wen det enimul bin gitkil o langa det neksdei. En if eni bif leftoba langa det namba thridei, yumob garra lafta barnimap, 7dumaji im nomo klinbala blanga serramoni en if enibodi dagat, wal mi na YAWEI, kaan gajim det ofring. 8Wal wen enibodi dagat det bif im gilti, en im nomo jidan blanga main pipul olabat, dumaji imbin dagat det bif jis laik tharran nomo seikridwan.
9“En wen yumob kadim det sid daga brom yumob pedik, yumob kaan kadimof det sid daga rait langa boda langa det pedik, en yumob kaan gobek en kadim detlot sid daga igin. 10En nomo gobek langa yumob fam en gajim detlot greip daga weya yumob bin libum o gajimbat detlot greip daga weya imbin buldan. Yumob garra libum blanga detlot powan pipul en blanga detlot pipul brom najalot kantri, dumaji mi na YAWEI det trubala God blanga yumob.d,10 Labidakas 23:22; Dyudaranami 24:19-22
11“En nomo stilimbat enijing, en nomo tjidimbat enibodi en nomo dalimbat laiyawan wed.eEksadas 20:15,16; Dyudaranami 5:19,20 12En nomo meigimbat laiyawan pramis langa main neim. Wal tharran meigim main neim nogud. Mi na YAWEI det trubala God blanga yumob.fEksadas 20:7; Dyudaranami 5:11; Methyu 5:33
13“Wal nomo stilimbat enijing o tjidimbat pipul. Nomo kipum det weijis brom enibodi hubin wek blanga yumob. Yumob garra peiyim im det seimdei.gDyudaranami 24:14,15 14En nomo mokimbat defmen, en nomo pudumbat samting lida langa det blainwan men weya im jandap, dumaji bambai im buldan ontop. Wal yumob garra duwit wanim mi tok, dumaji mi na YAWEI det trubala God blanga yumob.hDyudaranami 27:18
15“Yumob garra jidan brabli trubala en gibit ebribodi feyago wen yumob abum kotkeis. Yumob kaan meigim speshalwan lowa blanga ola powan pipul, en yumob kaan jidan bradinbalawei blanga ola ritjwan pipul.iEksadas 23:6-8; Dyudaranami 16:19 16Nomo spredimatbat yan blanga enibodi, en wen sambodi abum brabli bigwan trabul en im abum kotkeis, yumob garra toktok adbala if det wed blanga yumob gin album im, dumaji mi na det trubala God blanga yumob.
17“Wal nomo nogudbinji langa enibodi. Yumob garra sodimat det trabul, dumaji yumob nomo wandim det ting blanga meigim yumob dum nogudbala ting.jMethyu 18:15 18En nomo fait langa enibodi o heidim im olagijawan. Wal yumob garra laigim olabat laik yumob laigim miselp dumaji mi na YAWEI det trubala God blanga yumob.kMethyu 5:43; 19:19; 22:39; Mak 12:31; Luk 10:27; Romans 13:9; Galeishans 5:14; Jeims 2:8
19“Wal yumob garra duwit langa mi wanim ai dalim yumob. Nomo meigim difrinkain enimul abum beibi. Nomo plentimbat dubala difrinkain sid daga langa det wan pedik. Nomo werrimonbat klos deibin meigim garram difrinwan matiriyal.lDyudaranami 22:9-11
20“If eni men silipsilipbat garram im wekingel hu jidan laiga prisana en nobodi bin peiyim det men mani blanga larramgo det gel fri, en if naja men silipsilipbat garram det gel, wal det gel en det men garra abum panishmen, bat olabat kaan kilim dubala, dumaji det gel im oni wekingel hu jidan laiga prisana. 21Wal det men garra bringimap wanbala dediwan ship langa det dowawei langa det Seikridwan Tent, en gibit peiyimbek ofring. 22En det serramonimen garra abum det serramoni blanga meigim det men fri brom det nogudbalawei weya imbin dumbat en mi na garra larramgo im fri.
23“En wen yumob kamat langa det kantri gulum Keinan yumob gin growimap olkain frut tri. En detlot frut daga garra jidan nomo klinbala blanga serramoni blanga 3 yiya. Langa det taim na yumob nomo lau blanga dagat. 24En langa det namba 4 yiya ol detlot frut daga yumob garra gibit mi blanga ofring blanga shoum yumob bin gibit theingks langa mi na YAWEI det trubala God blanga yumob. 25Bat langa det namba 5 yiya yumob gin dagat detlot frut daga na. If yumob dum lagijat detlot frut tri blanga yumob garra abum detmatj frut daga. Wal mi na YAWEI det trubala God blanga yumob.
26“En nomo dagadagat eni bif garram blad, en nomo dumbat eni doktabala ting.mJenasis 9:4; Labidakas 7:26,27; 17:10-14; Dyudaranami 12:16,23; 15:23; 18:10 27Nomo kadimbat yu heya langa said langa yu hed, o kadimbat yu wiska, 28en nomo pudumbat eni mak langa yu ron bodi, en nomo kadimbat miselp garram naif, wen yu kraikraibat blanga sori miselp wen enibodi dai. Wal mi na YAWEI det trubala God blanga yumob.n,28 Labidakas 21:5; Dyudaranami 14:1
29“En nomo meigim yu doda sheim en meigim im silipsilipbat garram eni men langa det najakain seikridwan pleis. If yumob dum lagijat yumob garra bulurrumbat detlot drimin en dijan kantri garra jidan brabli nogudwan.oDyudaranami 23:17 30Wal yumob garra abum spel langa det namba 7 dei en rispek det Serramoni Pleis blanga main. Mi na YAWEI det trubala God.pLabidakas 26:2
31“Nomo go langa detlot pipul hu askimbat wed brom detlot spirit blanga detlot dedbala. If yumob dum lagijat wal yumob nomo klinbala blanga serramoni. Mi na YAWEI det trubala God blanga yumob.qDyudaranami 18:11; Fes Semyul 28:3; Sekan Kings 23:4; Aisaiya 8:19
32“Yumob garra rispek ola ol pipul en dum gudbala ting blanga olabat en yumob garra rispek langa mi du, dumaji mi na YAWEI det trubala God.
33“Nomo tridimbat pipul brom najalot kantri nogudbalawei wen dei jidan deya langa det kantri blanga yumob. 34Yumob garra tridimbat olabat gudwei laik ola Isreil pipul, en yumob garra laigim olabat laik yumob laigim miselp. Wal yumob garra jinggabat miselp du, dumaji yumob bin laik detlot pipul deya langa Ijip. Mi na YAWEI det trubala God blanga yumob.r,34 Eksadas 22:21; Dyudaranami 24:17,18; 27:19
35“Nomo tjidimbat langa enibodi wen yu meshurumbat haulong det ting, en wen yu weiyimbat en wen yu kaundimat, yu garra tok trubalawei langa ebribodi. 36Wen yu weiyimbat o meshurumbat yu kaan yusum laiyawan ting blanga tharran. Mi na YAWEI det trubala God blanga yumob en aibin bringimap yumob brom Ijip.s,36 Dyudaranami 25:13-16; Prabebs 20:10; Isikiyel 45:10 37Yumob garra duwit langa main lowa en langa main wed dumaji mi na YAWEI det trubala God.” Lagijat na YAWEI bin tok.

a19:2: Labidakas 11:44,45; Fes Pida 1:16

b19:3: Eksadas 20:8,12; Dyudaranami 5:12,16

c19:4: Eksadas 20:23; 34:17; Labidakas 26:1; Dyudaranami 17:25

d19:9: ,10 Labidakas 23:22; Dyudaranami 24:19-22

e19:11: Eksadas 20:15,16; Dyudaranami 5:19,20

f19:12: Eksadas 20:7; Dyudaranami 5:11; Methyu 5:33

g19:13: Dyudaranami 24:14,15

h19:14: Dyudaranami 27:18

i19:15: Eksadas 23:6-8; Dyudaranami 16:19

j19:17: Methyu 18:15

k19:18: Methyu 5:43; 19:19; 22:39; Mak 12:31; Luk 10:27; Romans 13:9; Galeishans 5:14; Jeims 2:8

l19:19: Dyudaranami 22:9-11

m19:26: Jenasis 9:4; Labidakas 7:26,27; 17:10-14; Dyudaranami 12:16,23; 15:23; 18:10

n19:27: ,28 Labidakas 21:5; Dyudaranami 14:1

o19:29: Dyudaranami 23:17

p19:30: Labidakas 26:2

q19:31: Dyudaranami 18:11; Fes Semyul 28:3; Sekan Kings 23:4; Aisaiya 8:19

r19:33: ,34 Eksadas 22:21; Dyudaranami 24:17,18; 27:19

s19:35: ,36 Dyudaranami 25:13-16; Prabebs 20:10; Isikiyel 45:10