Yu nomo lau silipsilipbat garram enibodi nogudwei
181-2Wal YAWEI det trubala God bin dalim Mosis blanga tok langa ola Isreil pipul. Imbin tok, “Mi na YAWEI det trubala God blanga yumob. 3Yumob nomo bulurrumbat en dumbat nogudbala ting laik ol detlot pipul deya langa Ijip weya yumob bin jidan bifo o detlot pipul hubin jidan langa det kantri gulum Keinan weya ai garra deigim yumob bambai. 4Wal yumob garra duwit langa main lowa en dum wanim ai dalim yumob. Mi na YAWEI det trubala God blanga yumob. 5Wal yumob garra kipgon bulurrumbat det lowa weya aibin gibit yumob en if yumob dumbat lagijat oldei, im meigim yumob laif jidan gudwei. Mi na YAWEI det trubala God.aNiyamaiya 9:29; Isikiyel 18:9; 20:11-13; Luk 10:28; Romans 10:5; Galeishans 3:12 6Yumob nomo lau silipsilipbat garram yumob ronwan femilimob. 7Nomo meigim yu dedi sheim miselp dumaji yubin silipsilipbat garram yu mami. En nomo meigim yu ronwan mami sheim. 8En nomo meigim yu dedi sheim dumaji yubin silipsilipbat garram eni waif blanga im.bLabidakas 20:11; Dyudaranami 22:30; 27:20 9En nomo silipsilipbat garram yu ronwan sista o sista brom najawan mami o najawan dedi, nomeda imbin growap langa najawan kemp o bin growap garram yu langa det seimwan kemp.cLabidakas 20:17; Dyudaranami 27:22 10Wal nomo silipsilipbat garram yu grendoda. Wal tharran im brabli sheim blanga yu if yu dumbat lagijat. 11En nomo silipsilipbat garram haf fulblad sista. Wal im jis laik yu ronwan sista du. 12-13En nomo silipsilipbat garram yu dedi, fulblad sista o blanga yu ronwan mami sista. 14En yu kaan silipsilipbat garram det waif blanga yu anggul.dLabidakas 20:19,20 15En yu kaan silipsilipbat garram det waif blanga yu san,eLabidakas 20:12 16o garram yu braja waif.fLabidakas 20:21 17En yu kaan silipsilipbat garram eni doda o grendoda if yubin silipsilipbat garram im mami basdam. Wal im maitbi yu ronwan femili, en tharran na im brabli nogud.gLabidakas 20:14; Dyudaranami 27:23 18En yu kaan gajim det sista blanga yu waif en meigim im yu waif. Yu garra abum yu ron waif olataim wen im jidan laibala.
19“En yu kaan silipsilipbat garram det gel weya im jidan wumanwei ebri nyumanth taim, dumaji im nomo klinbala blanga serramoni.hLabidakas 20:18 20Nomo silipsilipbat garram naja men waif. Tharran meigim yu nomo klinbala blanga serramoni.iLabidakas 20:10 21Nomo gibit yumob biginini blanga sekrifais ofring langa det drimin gulum Molek, dumaji tharran meigim mi brabli nogudbinji.jLabidakas 20:1-5 22Nomo eni men nomo lau silipsilipbat garram najawan men du. Mi nomo laigim lagijat.kLabidakas 20:13 23Nomo eni men o gel nomo lau silipsilipbat garram eni enimul. Im det brabli nogudbalawei en tharran meigim im nomo klinbala blanga serramoni.lEksadas 22:19; Labidakas 20:15,16; Dyudaranami 27:21
24“Yumob nomo meigim miselp nogudbala brom dumbat ol dislot ting. Detlot pipul hubin jidan deya bifo bin dum ol detkain ting en ai garra andimwei olabat. Wal yumob garra go langa det kantri en jidan deya. 25Ol detlot pipul bin meigim nogudbala det kantri. Wal aibin panishim det kantri en meigim det kantri nogud blanga ol detlot pipul hubin jidan deya. 26-27Deibin dum ol dislot brabli nogudbala ting, en deibin meigim det kantri brabli nogudwan. Bat yumob kaan dum ol detkain ting. Ol yumob Isreil pipul en najalot pipul hu jidan garram yumob, ol yumob garra kipum dislot lowa weya aibin dalim yumob 28en det kantri kaan jidan nogudwan blanga yumob, laik imbin dum langa detlot pipul hubin jidan deya bifo. 29Yumob sabi na, yumob kaan dumbat detlot nogudbala ting, dumaji yumob kaan jidan blanga main pipul olabat if yumob dum lagijat.
30“Wal yumob garra duwit langa mi wanim ai dalim yumob, en nomo bulurrumbat detlot pipul hubin jidan langa dijan kantri bifo. Nomo dumbat dislot nogudbala ting dumaji yumob garra meigim miselp nomo klinbala blanga serramoni. Mi na YAWEI det trubala God blanga yumob.” Lagijat na YAWEI bin tok.

a18:5: Niyamaiya 9:29; Isikiyel 18:9; 20:11-13; Luk 10:28; Romans 10:5; Galeishans 3:12

b18:8: Labidakas 20:11; Dyudaranami 22:30; 27:20

c18:9: Labidakas 20:17; Dyudaranami 27:22

d18:12-14: Labidakas 20:19,20

e18:15: Labidakas 20:12

f18:16: Labidakas 20:21

g18:17: Labidakas 20:14; Dyudaranami 27:23

h18:19: Labidakas 20:18

i18:20: Labidakas 20:10

j18:21: Labidakas 20:1-5

k18:22: Labidakas 20:13

l18:23: Eksadas 22:19; Labidakas 20:15,16; Dyudaranami 27:21