Ola difrinkain enimul weya detlot Isreil pipul gin dagat
Dyudaranami 14:3-21
111Wal YAWEI det trubala God bin gibit Mosis en Eran dislot lowa 2langa detlot Isreil pipul. Imbin tok, “Yumob gin dagat eni enimul langa dijan kantri, 3weya im garram fut laiga buligi, en im dagadagat gras laiga buligi. 4-6Bat yumob nomo lau dagat kemul, rok bedja o rebit, dumaji ol detlot nomo klinbala blanga serramoni, dumaji dei dagat gras laiga buligi, bat dei nomo garram fut laiga buligi. 7Wal yumob nomo lau blanga dagat bigibigi. Im nomo klinbala blanga serramoni. Im garram det fut jis laiga buligi, bat im nomo dagat gras laiga buligi. 8Yumob nomo lau blanga dagat detlot enimul o tatjim olabat wen olabat dedwan, dumaji olabat nomo klinbala blanga serramoni.
9“Yumob gin dagat ola fish weya im garram fin en skeil. 10Bat yumob nomo lau dagat enijing weya jidan langa woda weya nomo garram fin en skeil, 11dumaji ol detlot nomo klinbala blanga serramoni. Yumob nomo lau blanga dagat olabat o tatjim olabat wen im dedwan. 12Yumob nomo lau dagat enijing det jidan insaid langa woda weya nomo garram eni fin en skeil.
13-19“Yumob nomo lau blanga dagat detlot bard gulum igulok, mukmuk, felkin, boltja, wakwak, ostrij, sigal, jebaru, herin, beligin, komaren, hupo o ola betmob.
20“En ola insek garram wing olabat nomo klinbala blanga serramoni. 21Oni ol detlot weya dei oldei jamparanbat. 22Yumob gin dagat detlot grashopa weya jamparan, 23bat ol detlot insek weya garram wing, en wok langa graun du, wal dei nomo klinbala blanga serramoni.
24-28“If enibodi tatjim o garrimap eni dedwan enimul weya garram fut nomo laiga buligi, en nomo dagat gras, en eni enimul weya garram fobala sofwan fut, wal im garra lafta washim im klos, bat im kaan jidan klinbala blanga serramoni raidap sangodan.
29-30“En ol detlot lilwanlilwan enimul gulum ret en lisid weya jidan langa graun garram hol, wal dei nomo klinbala blanga serramoni. 31En if enibodi tatjim olabat, nomeda olabat laibala o dedbala, wal im nomo jidan klinbala blanga serramoni raidap sangodan. 32If olabat buldan dedwan langa enijing, wal det ting nomo klinbala blanga serramoni, nomeda deibin meigim brom wud, gudwan matiriyal, ola letha o beig matiriyal, nomeda wotkain ting deibin meigim. Wal dei lafta washim langa woda, bat im stil kaan jidan klinbala blanga serramoni raidap sangodan. 33En if det dedwan enimul buldan langa klei dish, wal ebrijing insaid deya langa det dish im nomo klinbala blanga serramoni en yu garra lafta breigim det dish. 34En if woda brom det dish buldan langa eni daga weya gudwan blanga dagat, wal yu kaan dagat det daga, dumaji im nomo klinbala blanga serramoni, en yumob kaan dringgimbat enijing brom det dish, dumaji im nomo klinbala blanga serramoni. 35Enijing weya dedwan enimul buldan, im nomo klinbala blanga serramoni, en det kleiwan ting weya yumob gugumbat, yumob lafta breigim du, 36bat det springwoda o woda brom detlot wel weya detlot pipul bin grajim, detlot oldei klinbala blanga serramoni. 37If wanbala dedwan enimul buldan langa detlot sid daga weya dei garra plentimbat, wal det sid garra jidan klinbala blanga serramoni. 38Bat if det sid im sokum langa woda en wanbala dedwan enimul buldan langa detlot sid, wal det sid im nomo klinbala blanga serramoni.
39“If eni enimul weya yumob gin dagat, bat imbin dai, wal enibodi hu tatjim det dedwan enimul im kaan jidan klinbala blanga serramoni raidap sangodan. 40En if enibodi dagat det enimul, wal im garra lafta washim im klos en im kaan jidan klinbala blanga serramoni raidap sangodan. En if enibodi hu garrimap det dedwan enimul, im garra lafta washim im klos en im kaan jidan klinbala blanga serramoni raidap sangodan.
41“Yumob nomo lau dagat lilwanlilwan enimul weya mubabat langa graun, 42nomeda olabat kraulkraulbat o wokwokbat garram olabat fobala leig, o maitbi garram loda leig. 43Yumob nomo lau dagat detlot enimul, dumaji yu meigim miselp nomo klinbala blanga serramoni. 44Mi na YAWEI det trubala God blanga yumob, en yumob garra kipum miselp holiwan, dumaji mi na holiwan.aLabidakas 19:2; Fes Pida 1:16 45Mi na YAWEI hubin bringimap yumob brom Ijip, dumaji mi na blanga yumob God. Yumob garra jidan holiwan, dumaji mi na holiwan.
46“Wal dijan na det lowa blanga ola enimul en bard en blanga ebrijing weya jidan langa woda, en ebrijing weya mubabat langa graun. 47Wal yumob garra wotjim miselp en luk gudwei wanim klinbala blanga serramoni en wanim nomo klinbala blanga serramoni, en langa ola enimul na weya yumob gin dagat, en detlot weya yumob nomo lau dagat.” Lagijat na YAWEI bin tok.

a11:44: Labidakas 19:2; Fes Pida 1:16