41Wal Mosis bin tok, “Maitbi detlot Isreil pipul kaan bilib langa mi. Maitbi dei kaan lisin langa mi wen mi dalim olabat yubin shoum miselp langa mi. Wal wanim ai garra dum if dei tok yu nomo bin kamat langa mi?”
2Wal YAWEI det trubala God bin tok, “Wanim yu holdimbat deya langa yu bingga?”
En Mosis bin tok, “Main wokinstik.”
3Wal YAWEI bin dalim Mosis, “Yu tjakamdan det wokinstik langa graun.”
Wal Mosis bin tjakamdan det wokinstik langa graun, en det wokinstik bin meigim miselp sneik, en Mosis bin ranawei brom det sneik. 4Bat YAWEI bin dalim im, “Yu grebum det sneik langa im teil garram yu bingga.”
Wal Mosis bin grebum det sneik garram im bingga, en YAWEI bin meigim det sneik meigim miselp det wokinstik igin.
5Afta na YAWEI bin dalim Mosis, “Wen yu dalim detlot Isreil pipul aibin shoum miselp langa yu, wal yu garra tjakamdan det wokinstik lagijat na blanga meigim olabat bilib langa yu.”
6En YAWEI bin kipgon tok langa Mosis, “Yu pudum yu bingga insaid langa yu kout.”
Wal Mosis bin pudum im bingga insaid langa im kout, en wen imbin deigimat, im bingga bin go waitwan garram leprasi.
7Afta na YAWEI bin dalim im blanga pudumbek im bingga insaid langa im kout, en Mosis bin pudumbek im bingga insaid langa im kout, en wen imbin deigimat, im bingga bin gobek gudwan na.
8Afta na YAWEI bin dalim Mosis, “If detlot Isreil pipul kaan bilib det wed blanga yu, en if dei kaan bilib langa det feswan klebabala ting, wal dei garra bilib langa dis sekanwan klebabala ting. 9Bat if dei stil kaan bilib langa yu wen yu dum det sekanwan klebabala ting, wal yu garra gajim sambala woda brom det riba, en yu garra spilim det woda langa graun, en ai garra meigim det woda meigim miselp blad.” Lagijat na YAWEI bin tok.
10Wal Mosis bin tok na, “Bos, yu kaan jandim mi, dumaji ai kaan tok gudwei. Brom longtaim ai nomo bin tok gudwei, en tudei iya weya yunmi tok gija, ai stil kaan tok gudwei, dumaji ai kaan hendulum main tang gudwei.”
11Wal YAWEI bin tok, “Hubin meigim det maus blanga yu? Hu garram det pawa blanga meigim enibodi kaan irrim en tok? En hu garram det pawa blanga meigim enibodi luk gudwei en kaan luk gudwei? Mi na, indit? 12Wal yu garra go, en ai garra album yu en dalim yu wanim blanga tok.”
13Wal Mosis bin tok, “Bos, yu jandim sambodi. Nomo mi.”
14Wal YAWEI bin gitwail langa Mosis na, en imbin tok, “Orait. Ai pikimat yu braja Eran, dumaji ai sabi im gin tok gudwei. En im deya lukabat yu olredi, en wen im faindim yu, im garra gudbinji. 15Wal ai garra jandim yunbala mijamet, en yu garra dalim im wanim blanga tok, en ai garra album yunbala tok. En ai garra dalim yunbala wanim yunbala garra dum du. 16Yu braja garra deigim pleis blanga yu, en im garra tok langa ola pipul blanga yu. Bat yu garra jidan bos langa im jis laik mi bos langa yu, en yu garra dalim im wanim blanga tok. 17En yu deigim det wokinstik garram yu, dumaji yu garra yusum det wokinstik blanga dum ol detlot klebabala ting.” Lagijat na YAWEI bin tok langa Mosis.
Mosis bin gobek langa det kantri gulum Ijip
18-19Wal Mosis bin gobek langa im lambarra, en imbin askim im, “Yu larram mi gobek langa main ron pipul deya langa Ijip. Ai garra faindat if dei stil jidan laibala.” Lagijat na Mosis bin dum, dumaji YAWEI bin dalim im blanga gobek langa Ijip, en YAWEI bin tok, “Ol detlot pipul hubin wandi kilim yu, dei bin ol dai na.”
Wal Jethro bin gudbinji langa Mosis, en imbin larramgo im, 20en Mosis bin gajim im waif en ola san blanga im, en imbin pudum olabat langa dongki, en imbin gajim det wokinstik weya God bin dalim im blanga deigim, en deibin stat gobek langa Ijip na.
21Wal YAWEI det trubala God bin tok langa Mosis igin, “Aibin gibit yu pawa blanga dum olkain klebabala ting. Wal yu garra gobek langa Ijip, en yu garra shoum detlot klebabala ting langa det king. Bat det king kaan larramgo ol detlot Isreil pipul, dumaji ai garra meigim im brabli admen. 22Afta na yu garra go en dalim det king wanim aibin tok. Yu garra dalim im, ‘Detlot Isreil pipul olabat jis laiga feswan san blanga YAWEI, 23en YAWEI bin dalim yu blanga larramgo olabat weya dei garra weship langa im. Bat yu nomo bin teiknodis langa YAWEI, en im garra kilim ded det feswan san blanga yu na.’ Lagijat na yu garra tok langa det king.”aEksadas 12:29
24Wal YAWEI bin kamat langa Mosis deya langa wan pleis weya Mosis en im femili bin kemp, en YAWEI bin wandi kilim Mosis, dumaji im nomo bin sekamsais det wan san blanga im.
25-26Wal det waif blanga Mosis bin gajim stonwan naif, en imbin kadim det san blanga im, en imbin deigim det skinpat, en imbin rabum langa det fut blanga Mosis, en seimtaim imbin tok, “Main hasbin, yubin meigim mi weistim det blad blanga main san.”
Wal God bin sedisfaid na, en im nomo bin kilim Mosis.
27Afta na YAWEI bin tok langa det braja blanga Mosis neim Eran. Imbin tok, “Yu garra go langa det deset kantri, en deya na yu garra midim yu braja.”
Wal Eran bin go, en imbin faindim Mosis deya langa det seikridwan hil, en imbin kis langa im, 28en Mosis bin dalim Eran ebrijing. Imbin dalim im wanim YAWEI bin dalim im blanga tok langa Ijip, en imbin dalim im blanga detlot klebabala ting weya YAWEI bin dalim im blanga dum deya langa det kantri.
29Wal Mosis en Eran bin gobek langa Ijip, en dubala bin majurrumap ola boswan blanga detlot Isreil pipul, 30en Eran bin dalim olabat ebrijing wanim YAWEI bin dalim Mosis, en Mosis bin dum ol detlot klebabala ting lida langa detlot Isreil pipul, 31en ol detlot pipul bin bilib langa dubala, en wen deibin irrim det gudnyus weya YAWEI bin jinggabat olabat weya deibin abum det adtaim, deibin gudbinji, en deibin ol buldan langa graun en weship langa im.

a4:23: Eksadas 12:29