Deibin meigim det Seikridwan Boks
Eksadas 25:10-22
371Det wekinmen neim Besalel bin meigim det Seikridwan Boks garram det wud brom det wadultri. Det Boks bin jidan 1.1 mita longwei en 0.66 mita kroswei en 0.66 mita apendan, 2en imbin gaburrumap det Boks insaid en atsaid garram gudwan gol, en imbin pudum golwan ben raidaran langa det boks du. 3Imbin meigim fobala golwan ring, en imbin pudum detlot fobala ring langa detlot fobala leigpat blanga det Boks. Imbin pudum dubala ring dis said en dubala najasaid, 4en imbin meigim dubala longwan pol brom det wadultri, en imbin gaburrumap det dubala pol garram gol, 5en imbin pudum det dubala pol langa detlot fobala ring blanga garrimap det Boks. Imbin pudum wanbala pol dis said en wanbala najasaid.
6Afta na Besalel bin meigim det lid blanga det Boks garram gudwan gol. Det lid bin jidan 1.1 mita longwei en 0.66 mita kroswei, 7en imbin meigim dubala golwan sheip garram wing. 8Imbin meigim dubala garram det seimwan gol weya imbin meigim det lid, en imbin pudum dubala tusaid langa det lid, 9en dubala bin jandap binji gija lukinat det lid, en det wing blanga dubala bin gaburrumap det lid.
Det teibul blanga ofring
Eksadas 25.23-30
10Afta na Besalel bin meigim det teibul blanga ofring garram det wud brom det wadultri. Det teibul bin jidan 0.9 mita longwei en 0.45 mita kroswei en 0.66 mita apendan, 11en imbin pudum gudwan gol ontop langa det teibul, en imbin pudum golwan ben raidaran langa det teibul, 12en imbin joinimap lilwan golwan said langa det teibul, en imbin pudum golwan ben raidaran langa det said du. 13-14Imbin meigim fobala golwan ring blanga garrimap det teibul, en imbin pudum detlot fobala ring gulijap langa top langa detlot fobala kona weya detlot leig jidan, 15en imbin meigim dubala longwan pol brom det wadultri blanga garrimap det teibul, en imbin gaburrumap det dubala pol garram gol. 16Imbin meigim pleit en kap en jag en dish blanga yusum langa det teibul blanga det wain ofring. Ol detlot ting imbin meigim garram gudwan gol.
Det pol blanga lemp
Eksadas 25:31-40
17Afta na Besalel bin meigim det pol blanga lemp garram gudwan gol. Imbin meigim det pol en ebrijing langa det pol garram wanbala gudwan gol. 18Imbin joinimap siksbala am langa det midulpat. Thribala am bin jidan dis said en thribala najasaid, 19en detlot siksbala am bin abum thribala sheip jis laik det purdiflawa blanga det tri gulum amantri. 20Det midul pat blanga det pol bin abum fobala sheip jis laik det purdiflawa blanga det amantri, 21en wanbala purdiflawa sheip bin jidan andanith weya detlot siksbala am bin kamat. 22Imbin meigim detlot purdiflawa en det pol garram wanbala gudwan gol, 23en imbin meigim sebenbala lemp blanga det pol, en garram gudwan gol imbin meigim ola ting blanga lukaftum detlot lemp. 24Imbin yusum loda gol 35 kilogrem blanga meigim det pol en ola lemp en ebrijing.
Det teibul blanga najawan ofring
Eksadas 30:1-5
25Afta na Besalel bin meigim det najawan teibul blanga ofring garram det wud brom det wadultri blanga barnim detlot gudsmelwan medisin. Imbin meigim det teibul skweyawan, en det teibul bin jidan 0.45 mita longwei en 0.45 mita kroswei en 0.9 mita apendan. Imbin meigim fobala ampat ontop langa ola kona blanga det teibul, 26en imbin gaburrumap det top en ola ampat en detlot fobala said blanga det teibul garram gudwan gol, en imbin pudum golwan ben raidaran langa det teibul. 27Imbin meigim dubala golwan ring blanga garrimap det teibul, en imbin pudum det dubala ring tusaid langa det teibul andanith langa det benpat, 28en imbin meigim dubala longwan pol brom det wadultri blanga garrimap det teibul, en imbin gaburrumap det dubala pol garram gol.
Meigim det seikridwan gudsmelwan oil en gudsmelwan medisin
Eksadas 30:22-38
29Afta na Besalel bin meigim det seikridwan gudsmelwan oil, en imbin miksimap det seikridwan gudsmelwan medisin du.aEksadas 30:22-38

a37:29: Eksadas 30:22-38