361Dei sabi dum ol detkain klebabala wek, dumaji YAWEI bin meigim Besalel en Oholiyab en ol detlot najalot men klebabala lagijat blanga meigim det Seikridwan Tent blanga im, en wen dei garra meigim det Tent, dei garra bulurrum det plen weya YAWEI bin gibit langa mi.” Lagijat na Mosis bin tok.
2Brom deya Mosis bin jingat langa det dubala men Besalel en Oholiyab en langa detlot najalot men hubin wandi dumbat det wek weya God bin meigim olabat klebabala blanga dum, en Mosis bin dalim olabat blanga stat meigimbat det Seikridwan Tent en ebrijing blanga det Tent.
3Wal ebri ailibala ola Isreil pipul bin oldei bringimap ofring langa Mosis, en imbin gibit ol detlot ting langa detlot wekinmen blanga meigim det Seikridwan Tent.
4Bambai na detlot wekinmen bin go langa Mosis, en deibin dalim im, 5“Ola pipul bin bringimap loda enijing, en melabat garram naf na blanga dumbat det wek weya YAWEI bin dalim melabat blanga dum.”
6Wal Mosis bin jandim wed langa ebribodi ebriweya langa olabat kemp. Imbin tok, “Nobodi nomo lau gibit mowa ofring blanga det Seikridwan Tent.” 7En im nomo bin larram enibodi gibit enijing mowa, dumaji deibin abum naf na blanga binijim det wek.
Deibin meigim det Seikridwan Tent
Eksadas 26:1-37
8Wal ol detlot brabli klebabala wekinmen bin meigim det Seikridwan Tent na garram det gudwan matiriyal weya deibin meigim garram bluwan, pepulwan en redwan wul, en deibin pudum loda sheip garram wing langa det matiriyal. 9Deibin meigim tenbala matiriyal, en detlot matiriyal bin jidan 12 mita longwei en 2 mita kroswei, 10en deibin joinimap faibala miselp en detlot najalot faibala miselp du. 11-13Deibin meigim 100 raunwan hol garram bluwan matiriyal en deibin pudum 50 langa det longwan saidpat blanga wanbala bigwan matiriyal en det naja 50 seimwei langa det najawan bigwan matiriyal, en afta deibin joinimap det dubala saidpat garram 50 dabulwan huk garram gol.
14Afta na detlot wekinmen bin meigim det kaliko blanga gaburrumap det gudwan matiriyal deya langa det Tent. Deibin meigim det kaliko garram lebenbala matiriyal weya deibin meigim garram nenigout heya. 15Detlot matiriyal bin jidan 13 mita longwei en 2 mita kroswei, 16en deibin joinimap faibala miselp en detlot najalot siksbala miselp du. 17-18Deibin meigim 100 raunwan hol langa det kaliko en deibin pudum 50 langa det longwan saidpat blanga wanbala bigwan kaliko en det naja 50 seimwei langa det najawan bigwan kaliko en afta deibin joinimap det dubala saidpat garram 50 dabulwan huk garram kopa.
19Afta na detlot wekinmen bin meigim naja dubala kaliko, wanbala garram det ship skin weya deibin meigim redwan en det najawan garram skin brom det jugong. Det ship skin kaliko bin jidan raidoba ontopwei langa det Tent, en det jugong skin kaliko bin jidan ontop langa det ship skin kaliko.
20Afta na detlot wekinmen bin meigim 48 freimpat garram dubala pol brom det wadultri blanga meigim thribala wol blanga holdimap ola kaliko. 21Ol detlot freimpat bin jidan 4 mita longwei en 0.66 mita saidwei, 22en detlot freimpat bin ol abum dubala ampat blanga joinimap miselp. 23Deibin meigim 20 freimpat blanga jandap langa det sauthsaid, 24-30en 20 blanga jandap langa det nowathsaid en siksbala blanga jandap langa sangodansaid en dubala freimpat blanga jandap langa det dubala kona, en det dubala freimpat langa kona bin joinap brom bodam raidap langa top. Deibin meigim 96 silbawan pleit blanga holdimap detlot pol blanga detlot freimpat.
31Afta na detlot wekinmen bin meigim 15 pol brom det wadultri blanga jidan kroswei langa detlot thribala wol. 32Deibin meigim faibala blanga sauthsaid en faibala blanga nowathsaid en faibala blanga sangodansaid. 33Detlot thribala meinwan pol bin jidan langa midul langa detlot thribala wol, en detlot thribala pol bin go rait thru blanga holdimap det freimpat. 34Deibin gaburrumap detlot pol garram gol, en deibin gaburrumap detlot freimpat garram gol du, en deibin pudum golwan ring langa detlot freimpat blanga holdimap detlot pol.
35Afta na detlot wekinmen bin meigim wanbala ketin garram det gudwan matiriyal weya deibin meigim garram bluwan, pepulwan en redwan wul, en deibin pudum loda sheip garram wing langa det ketin. 36Deibin meigim fobala pol brom det wadultri, en deibin gaburrumap detlot pol garram gol, en deibin pudum sambala huk langa detlot pol, en deibin meigim fobala silbawan pleit blanga holdimap detlot pol. 37Detlot wekinmen bin meigim det dowapat blanga det Tent garram gudwan matiriyal weya deibin meigim garram bluwan, pepulwan en redwan wul, en deibin pudum loda sheip langa det matiriyal du blanga meigim purdiwan. 38Deibin meigim faibala pol brom det wadultri, en deibin meigim ola kep blanga detlot pol garram gol, en detlot reil du, en deibin pudum sambala golwan huk langa detlot reil blanga heingimap det ketin, en deibin meigim faibala kopawan pleit blanga holdimap detlot pol.