Wekinmen blanga det Seikridwan Tent
Eksadas 35:30-36:1
311Wal YAWEI det trubala God bin kipgon tok langa Mosis, 2“Aibin pikimat wanbala men brom det Juda klen. Im neim Besalel, en im det san blanga det olmen neim Yurai en det grensan blanga det olmen neim Huwa. 3-4Aibin gibit im main spirit blanga meigim im klebabala langa im main en langa im bingga, en im sabi hau blanga meigim olkain purdibala ting garram gol en silba en kopa, 5en im sabi hau blanga wek garram purdibala ston en wud en olkain ting. 6En aibin pikimat wanbala men brom det Den klen blanga album Besalel. Im neim Oholiyab. Im det san blanga det olmen neim Ahisamek. En aibin meigim sambala najalot men klebabala blanga dum detkain wek du, en dei garra meigim ol detlot ting weya aibin dalim yu. 7Dei garra meigim det Seikridwan Tent weya ai garra jidan en det Seikridwan Boks garram ola lowa en det lid blanga det boks en ola enijing blanga det Tent 8en det golwan lemp en det teibul blanga det damba ofring en det teibul blanga barnim det gudsmelwan medisin 9en det najawan teibul blanga barnim detlot enimul en det dish weya detlot serramonimen garra washim miselp en ola najalot ting blanga det Serramoni Pleis, 10en dei garra meigim detlot purdibala klos du weya Eran en im fobala san garra werrim wen dei garra jidan serramonimen, 11en dei garra miksimap det speshalwan oil en det gudsmelwan medisin blanga yusum langa det Seikridwan Pleis. En wen dei meigim ol detlot ting, dei garra bulurrum det plen weya aibin gibit yu basdam.”
Sebathdei, det dei blanga abum spel
12Wal YAWEI bin kipgon tok langa Mosis, 13“Yu garra dalim detlot Isreil pipul blanga kipum det lowa blanga main Sebathdei. Im det dei blanga abum spel, dumaji det Sebathdei na garra rimaindim wi olataim blanga det pramis weya aibin meigim garram olabat, en im shoum olabat mi na bin pikimat olabat blanga jidan main ronwan pipul. 14Olabat garra kipum det lowa blanga det Sebathdei, dumaji im seikridwan dei. En if enibodi breigim det lowa en dum wek, wal yumob garra kilim im ded. 15Aibin gibit olabat 6 dei blanga dum olabat wek, en det namba 7 dei im brabli seikridwan dei blanga mi, en nobodi kaan dum eni wek langa det dei, en if enibodi dum wek langa det dei, yumob garra kilim im ded.aEksadas 20:8-11; 23:12; 34:21; 35:2; Labidakas 23:3; Dyudaranami 5:12-14 16Ola Isreil pipul garra kipum det lowa blanga det Sebathdei, dumaji im sain blanga det strongwan pramis weya aibin meigim garram olabat, 17en det sain garra jidan olagijawan blanga rimaindim mi en ola Isreil pipul, dumaji mi na YAWEI det trubala God, en langa det 6 dei aibin meigim ola skai en ola graun en ebrijing, en langa det namba 7 dei aibin binij wek, en aibin abum spel.”bEksadas 20:11
18Brom deya YAWEI bin binij toktok langa Mosis deya ontop langa det hil gulum Sainai, en imbin gibit im det dubala fletwan ston garram ol detlot lowa weya God bin raidimdan.

a31:15: Eksadas 20:8-11; 23:12; 34:21; 35:2; Labidakas 23:3; Dyudaranami 5:12-14

b31:17: Eksadas 20:11