Manesa en Ifreiyim
481Bambai na Josef bin gedim wed weya im dedi Jeikob bin jidan sikwan, en Josef bin gajim det dubala ronwan san blanga im neim Manesa en Ifreiyim, en deibin go blanga luk dubala grenfatha.
2Wal wen deibin kamat langa det olmen kemp, sambodi bin dalim det olmen, “Yu san Josef bin kaman blanga luk langa yu.”
Wal nomeda imbin wikwan langa im bodi, bat stil det olmen bin gidap en jidan langa im bed, 3en imbin tok langa im san na, “God im brabli haibala, en imbin kamat langa mi langa det pleis gulum Las deya langa det kantri Keinan, en imbin gudbinji langa mi, 4en imbin dalim mi, ‘Ai garra gibit yu bigmob biginini olabat, en ola biginini blanga olabat garra jidan bigmob bigbala traib. En ai garra gibit dijan kantri langa ola biginini blanga yu olagija.’ Lagijat na God bin tok langa mi.a,4 Jenasis 28:13,14;
5“Wal Manesa en Ifreiyim det dubala san blanga yu hubin bon iya langa Ijip bifo aibin kaman iya, dubala main san du jis laik Rubin en Simiyan main ronwan san dubala. En bambai wen ai garra hendimoba main kantri langa main san olabat, ai garra gibit haf langa Manesa en Ifreiyim du. 6En if yu abum mowa san biyain langa Manesa en Ifreiyim, wal olabat nomo mainwan san, en ai kaan hendimoba kantri langa olabat, najing. Olabat lafta gajim kantri brom Manesa en Ifreiyim det dubala braja blanga olabat. 7Lagijat na ai garra dum, dumaji aibin jinggabat wanim bin hepin langa yu mami Reitjul deya langa Keinan. Wen melabat bin kaminbek brom det kantri gulum Mesapoteimiya, imbin dai deya langa det roud gulijap langa det pleis gulum Efrath. Tudei dei gulum det pleis Bethlahem. En aibin lafta gaburrumap im deya wansaid langa det roud, en aibin nogudbinji blanga im detmatj.” Lagijat na det olmen Jeikob bin tok langa im san Josef.bJenasis 35:16-19;
8Brom deya Jeikob bin luk det dubala san blanga Josef, en imbin tok, “Blanga hu dijan dubala boi iya?” 9-10Imbin lagijat dumaji imbin olmen garram smokiwan ai.
Wal Josef bin dalim im dedi, “Dijan dubala boi na God bin gibit langa mi iya langa dijan kantri Ijip.”
En Jeikob bin tok, “Yu bringimap dubala gulijap langa mi weya ai gin luk dubala brabliwei.”
Wal Josef bin deigim dubala gulijap langa det olmen, en det olmen bin pudumran dubala am langa dubala, en imbin kis langa dubala, 11en afta imbin dalim Josef, “Bobala, aibin reken yubin dai. Bat God bin gudbinji langa mi, en imbin larram mi luk dijan dubala boi blanga yu.”
12Afta na Josef bin deigim det dubala boi brom wansaid langa Jeikob, en imbin baudan raitdan langa graun blanga shoum rispek langa det olmen dedi blanga im, 13-14en afta imbin deigim det dubala boi gulijap langa det olmen weya im garra pudum im bingga langa dubala hed en tok gudbinjiwei blanga dubala.
Wal Josef bin meigim Ifreiyim jandap lefthensaid langa Jeikob, dumaji imbin yangiswan. En imbin meigim Manesa jandap raidensaid langa im dumaji imbin eldiswan. Bat Jeikob bin krosim im bingga, en imbin pudum im raidensaid bingga ontop langa det hed blanga Ifreiyim, en imbin pudum im lefthensaid bingga ontop langa det hed blanga Manesa.
15-17Wal wen imbin dum lagijat, Josef bin brabli nogudbinji na, en imbin grebum im dedi bingga blanga pudum im raidensaid bingga langa det hed blanga Manesa, 18en imbin dalim im dedi, “Nomo lagijat dedi. Yu garra pudum yu raidensaid bingga ontop langa Manesa, dumaji im na det eldiswan boi main.”
19Bat im dedi bin tok, “Nomo, main boi. Ai sabi wanim mi dumbat. Dijan eldiswan boi iya garra jidan bigneim, en im garra abum bigismob biginini olabat. Bat dijan lilwan braja blanga im garra jidan oba langa im, en bigmob traib garra kamat brom im.” Lagijat na Jeikob bin tok. En imbin meigim Ifreiyim jidan oba langa Manesa.
Afta na Jeikob bin tok gudbinjiwei langa Josef, “Det trubala God weya main dedi Aisik en main grenfatha Eibrahem bin bulurrum garra gudbinji langa dijan dubala boi blanga yu. Det trubala God bin lukaftumbat mi brom lilbalataim, en im garra lukaftumbat dijan dubala boi lagijat du. En det einjul weya bin oldei album mi langa trabul garra album dijan dubala boi du. Dijan dubala boi garra abum bigismob biginini langa dijan kantri, en dei garra bulurrum det traib blanga main grenfatha Eibrahem en blanga main dedi Aisik en blanga mi.” Lagijat na Jeikob bin tok langa Josef.
20Afta na Jeikob bin tok gudbinjiwei langa det dubala boi, “God garra gudbinji langa yunbala detmatj, en ola pipul blanga yunbala weya kaman biyain langa yunbala garra tok, ‘God garra album yu seimwei laik imbin album Ifreiyim en Manesa basdam.’” Lagijat na Jeikob bin tok langa det dubala boi.cHibrus 11:21;
21Afta na Jeikob bin tok langa Josef, “Mi gulijap dai na. Bat God kaan libum yu. Im garra deigimbek yu raitbek langa det kantri blanga yunmi grenfatha olabat.
22“Wal ai garra gibit det gudwan kantri gulum Shekam langa yu. Aibin pulumat det kantri brom ola Emarait pipul garram main naif en bo en erro. En ai gibit yu det kantri na, dumaji yu jidan bos oba langa ola braja blanga yu.” Lagijat na det olmen bin tok.

a48:3: ,4 Jenasis 28:13,14;

b48:7: Jenasis 35:16-19;

c48:20: Hibrus 11:21;