Trabul blanga Benjamin
441Bambai na Josef bin dalim det hedmen blanga im, “Yu bilimap daga langa ola beig raitful blanga detlot men, en yu pudumbek ola mani blanga olabat insaid langa detlot beig igin. 2En yu pudum det silbawan kap main insaid langa det beig blanga det yangbala boi du.” Lagijat na Josef bin tok, en det hedmen bin dum ebrijing lagijat na.
3Ailibala neksdei detlot braja bin gowei garram olabat dongki blanga gobek langa olabat ronwan kantri, 4en wen deibin go nomo longwei brom det taun weya Josef bin jidan, Josef bin dalim det hedmen blanga im, “Yu go en bulurrum olabat, en wen yu kamat langa olabat, yu askim olabat. Yu garra tok, ‘Main bos bin gudbala langa yumob. Wal wotfo yumob bin dum nogudbala ting langa im? 5Wotfo yumob bin stilim det silbawan kap blanga im. Tharran blanga im ronwan kap, en im speshalwan kap du, dumaji det kap na oldei shoum im enijing weya im wandi faindat. Wal yumob garram bigis trabul na.’ Lagijat na yu garra tok.”
6Wal det hedmen bin gowei na, en wen imbin kamat langa olabat, imbin dalim olabat wanim Josef bin dalim im blanga tok, 7en deibin ol tok, “Melabat nomo sabi wanim yu tok. Melabat nomo bin dum lagijat. 8Yu sabi melabat bin bringimbek det mani brom melabat kantri weya melabat bin faindim insaid langa ola beig bifo. Wotfo yu reken melabat bin stilim det mani en gol en silba brom det haus blanga yu bos? Melabat nomo bin dum! 9En if yu faindim det kap iya langa melabat, wal yu gin kilim ded det men hubin stilim det kap, en melabat najalot lafta jidan prisana en dumbat ola adwek blanga yu.”
10Wal det hedmen bin tok, “Nomo. If ai faindim det kap langa enibodi beig, oni im na garra jidan prisana en dumbat ola adwek blanga mi. Yumob najalot gin kipgon.”
11Wal wen det hedmen bin tok lagijat, streidawei deibin deigimat olabat beig brom ola dongki, en deibin pudum detlot beig langa graun, en deibin opinimap olabat, 12en det hedmen bin luk thru langa ol detlot beig brom det eldiswan boi raidap langa det yangiswan boi. En deya na imbin faindim det silbawan kap insaid langa det beig blanga det yangiswan boi Benjamin.
13Wal ola braja bin hatjamp detmatj, en deibin breigim olabat ron klos dumaji deibin brabli nogudbinji.
Brom deya deibin loudimap ola dongki, en deibin gobek langa det taun, 14en wen deibin kamat langa det kemp blanga Josef, deibin luk imbin deya weidabat blanga olabat, en deibin baudan langa im.
15Afta na Josef bin tok langa olabat, “Wotfo yumob bin stilim det kap main? Yumob bina sabi ai garra faindat detkain ting weya yumob bin dum, dumaji mi haibala bos.”
16Wal det braja neim Juda bin tok, “Yu garram melabat. Melabat nomo garram eni wed blanga ensim yu. En melabat kaan dum enijing na, dumaji God bin peiyimbek melabat. En melabat holot garra jidan prisana en dumbat ola adwek blanga yu na.”
17Wal Josef bin tok, “Nomo. Ai kaan meigim yumob holot jidan prisana. Oni det wanbala boi weya det kap bin jidan langa im beig, oni im na imselp garra jidan prisana en dumbat ola adwek blanga mi. Ai larramgo yumob najalot fri. Yumob garra gobek langa yumob dedi deya langa det kantri Keinan.”
18Wal Juda bin git sterrap na, en imbin go en tok langa Josef streit langa im feis. Imbin tok, “Yu nomo gitwail langa mi weya mi tok streidat langa yu. Ai sabi yu jidan bos jis laik det king. Bat stil yunmi garra tok mijamet. 19Yubin askim melabat if melabat abum dedi en yangwan braja, 20en melabat bin dalim yu. Melabat bin tok, ‘Melabat garram dedi en lilwan braja, en melabat dedi bin abum det yangboi wen imbin olmen. Im mami bin abum dubala boi, en det eldiswan bin dai. Oni det yangboi imselp im jidan laibala tudei, en im dedi laigim im detmatj.’ Lagijat na melabat bin tok, 21en yubin dalim melabat blanga bringimap det yangboi langa yu weya yu gin luk langa im, 22en melabat bin dalim yu det yangboi kaan gowei brom im dedi. If im gowei, im dedi garra dai. 23Bat yubin dalim melabat if melabat nomo bringimbek det yangboi, wal wi kaan kaman langa yu igin.
24“Afta na melabat bin gobek langa melabat dedi, en melabat bin dalim im wanim yubin tok. 25Bambai na imbin dalim melabat blanga kambek en baiyim mowa daga. 26Bat melabat bin dalim im melabat kaan kambek langa yu melabat selp nomo garram det yangboi. If melabat abum det yangboi, orait. Melabat gin kambek langa yu, dumaji yubin tok lagijat na langa melabat.
27“Wal melabat dedi bin dalim melabat, ‘Yumob sabi main waif Reitjul bin abum oni dubala boi main. 28Wanbala im jidan laibala. Bat det najawan bin dai. Maitbi wailwan enimul bin dagat im, dumaji ai nomo bin luk im bodi. 29En if yumob deigimwei dijan boi brom mi en enijing hepin langa im, wal ai garra jidan brabli nogudbinji detmatj, en ai garra dai, dumaji mi brabli olmen.’ Lagijat na melabat dedi bin tok.
30-31“Wal main dedi laigim det yangboi detmatj, en if ai gobek nomo garram det yangboi, wal wen det olmen im lukabat en kaan faindim det yangboi, im garra nogudbinji detmatj, en im garra dai na.
32“Wal aibin gibit wed langa main dedi. Aibin dalim im, ai garra lukaftum det yangboi. En if ai nomo deigimbek im, wal mi na garra deigim bleim, dumaji aibin breigim det wed main weya aibin dalim im.
33“Wal yu garra larram dijan yangboi gobek garram im braja olabat. Ai garra deigim pleis blanga im. 34Mi na garra jidan prisana en dumbat ola adwek blanga yu, dumaji ai kaan gobek langa main dedi nomo garram dijan yangboi. Ai kaan meigim trabul blanga main dedi en meigim im dai.” Lagijat na Juda bin tok.