Fero bin abum drim
411Bambai na tuyiya bin gon na, en King Fero bin abum drim. En langa det drim imbin jandap wansaid langa det bigwan riba gulum Nail Riba deya gin langa im kantri, 2en imbin luk sebenbala brabli fetwan buligi bin kamat brom det riba, en deibin stat dagat ola gras. 3Afta na sebenbala brabli skiniwan buligi bin kamat brom det riba, en deibin go en jandap wansaid langa detlot fetwan buligi deya wansaid langa det riba. 4Afta na detlot skiniwan buligi bin dagat ol detlot fetwan buligi.
Brom deya det king bin gidap brom silip lilwail, 5en afta imbin gobek en silip igin.
Bambai na imbin abum najawan drim. En langa det drim imbin luk sebenbala kukwan daga bin kamat langa wanbala tri. Detlot daga bin brabli bigwan daga du. 6Afta na det king bin luk sebenbala lilwan daga bin kamat. Detlot daga bin brabli draiwan, dumaji det hotwan win brom deset bin barnimbat olabat. 7Afta na detlot draiwan daga bin dagat ol detlot bigwan daga.
Brom deya det king bin gidap brom silip, en imbin sabi det dubala drim bin dalimbat samting langa im.
8Ailibala na det king bin stat jinggabat, en imbin jandim wed langa ola doktabala en langa ola klebabalamen ebriweya langa det kantri, en deibin ol kaman langa im, en imbin dalim olabat det dubala drim. Bat dei nomo bin sabi wanim det dubala drim bin tok blanga im.aDenyul 2:2;
9Afta na det bamen blanga det king bin tok langa im, “Tudei na aibin jinggabat det taim weya aibin nogud langa yu. 10Yubin gitwail langa mi en det hed kuk, en yubin pudum minbala langa jeilhaus.
11“Wal wan nait minbala bin abum drim garram difrin wed blanga minbala, 12en wan prisana wekinmen blanga det hedbos blanga det jeilhaus bin jidan deya garram minbala. Det wekinmen bin brom det Hibru traib. En minbala bin dalim im blanga minbala drim, en imbin sabi det dubala drim. 13En bambai ebrijing bin hepin jis laik imbin tok im garra hepin. Yubin gibitbek main wek langa mi, en yubin binijimap det kuk.” Lagijat na det bamen bin tok.
14Wal det king bin jandim wed blanga Josef deya langa det jeilhaus, en dei nomo bin weistimbat taim. Streidawei Josef bin abum sheib, en imbin werrimon klinwan klos, en imbin go langa det king.
15Wal det king bin tok, “Josef, aibin abum dubala drim. Bat nobodi sabi det mining blanga det dubala. Bat deibin dalim mi yu sabi detkain ting. Dei reken yu sabi wanim eni drim im tok.” COO772
16Wal Josef bin tok, “Nomo. Mi nomo sabi. Bat God gin dalim yunmi wanim det dubala drim tok.”
17Wal det king bin tok, “Langa det feswan drim aibin jandap wansaid langa det Nail Riba, 18en aibin luk sebenbala brabli fetwan buligi bin kamat brom det riba, en deibin stat dagat ola gras. 19Afta na sebenbala brabli skiniwan buligi bin kamat brom det seimwan riba. Ai nomo bin luk bouniwan buligi lagijat bifo langa dis kantri. 20En detlot sebenbala skiniwan buligi bin dagat ol detlot sebenbala fetwan buligi. 21En nomeda deibin dagat detlot fetwan buligi, bat stil deibin jidan skiniwan.
“Wal aibin gidap na, en afta aibin silip igin, 22en bambai aibin abum najawan drim. En langa det sekanwan drim aibin luk sebenbala bigwan daga bin kamat langa wanbala tri, 23en afta sebenbala lilwan daga bin kamat. Detlot lilwan daga bin jidan brabli draiwan, dumaji det deset win bin blowim langa olabat. 24Afta na detlot sebenbala draiwan daga bin dagat ol detlot sebenbala bigwan daga.
“Wal aibin dalim det stori blanga det dubala drim langa ol dislot doktabala en klebabalamen iya. Bat dei nomo bin sabi wanim det dubala drim bin tok.” Lagijat na det king bin tok.
25Wal Josef bin dalim det king, “Det dubala drim blanga yu dubala garram seimwan wed. God bin dalim yu wanim im garra du. 26Det sebenbala fetwan buligi olabat tok blanga sebenbala yiya, en det sebenbala bigwan daga olabat tok seimwei igin. Det dubala drim dubala seimwan. 27Det sebenbala skiniwan buligi weya bin kamat biyain langa detlot fetwan buligi, en detlot lilwan daga weya bin jidan draiwan brom det deset win, wal olabat tok sebenbala yiya garra jidan brabli draiwan nomo garram eni daga.
28“Dijan wed iya ai dalim yu wanim God bin tok langa yu. Langa det dubala drim God bin shoum yu wanim im garra dum langa yu. 29Blendibala daga garra gro ebriweya langa dijan kantri fo sebenbala yiya. 30-31Afta na dijan kantri garra jidan brabli draiwan nomo garram eni daga fo sebenbala yiya. Ola pipul garra trai en jinggabat weya dijan kantri bin jidan garram bigmob daga bifo. Bat kaan du. Dijan kantri garra jidan brabli draiwan, en im garra meigim ola pipul fogedabat ola daga weya deibin abum bifo. Dijan kantri garra jidan brabli nogud. 32Lagijat na dijan ting garra hepin, dumaji God bin gibit yu det wed langa det dubala drim. En nomo longtaim na God garra meigim dijan ting hepin lagijat na.
33“Wal yu lisin langa mi na, King Fero. Yu lafta pikimat wanbala klebabalamen blanga jidan hedbos blanga dijan kantri, 34-35en yu garra pikimat najalot wekinmen blanga jidan bos blanga ola daga weya garra gro langa det sebenbala gudbala yiya. Yu garra dalim olabat blanga pulumat haf daga weya ola pipul growimap, en dei garra hipimap det daga langa stowa langa ola taun, 36en dei garra lukaftum det daga brabliwei blanga yu, dumaji det daga garra jidan reshan blanga det sebenbala draiwan yiya wen det brabliwan draisisan garra kaman langa dijan kantri. If yu dum lagijat, wal ola pipul blanga yu kaan perrish blanga daga wen det sebenbala draiwan yiya garra kaman.” Lagijat na Josef bin tok langa det king.
Josef bin jidan hedbos
37Wal det king en ola hedbos blanga im bin tok, “Im gudwan wed tharran weya Josef bin tok.”
38Wal det king bin tok, “Wi kaan faindim eni gudwan men blanga dijan wek. Oni Josef na, dumaji det spirit blanga God im jidan garram im.”
39Brom deya det king bin dalim Josef, “God bin dalim yu wanim garra hepin. Yu prapa klebabalamen. Nobodi kaan bidim yu. 40Wal ai garra meigim yu bos blanga main kantri. Ola pipul garra lisin langa yu, dumaji yu garra jidan sekan bos langa mi.bEks 7:10; 41Tudei na ai meigim yu sekan bos blanga dijan kantri Ijip.”
42Wal det king bin deigimat det ring garram im neim brom im bingga, en imbin pudumon det ring langa Josef bingga, en afta imbin meigim Josef werrimon prapa gudwan klos en goldinwan nekleis,cDenyul 5:29; 43en det king bin gibit det sekanwan hos en bagi blanga im langa Josef blanga raidabat, en imbin gibit im ronwan blijiman olabat langa Josef blanga go lida langa im en meigim rum langa roud.
Wal Josef bin jidan sekanbos blanga det kantri na, 44en det king bin dalim im, “Nomeda mi bos blanga dijan kantri, bat stil ola pipul garra lisin langa yu. Bifo olabat dumbat enijing dei garra lisin langa det wed blanga yu.”
45Afta na det king bin gibit najawan neim langa Josef. Imbin gibit im neim brom det kantri gin, en imbin gulum im Sefanapaniya. En det king bin gibit im wanbala gel neim Eisanath blanga merrit. Det gel bin doda blanga wan serramonimen neim Potafera brom det taun gulum Heliyapalas.
46Wal wen Josef bin stat wek blanga det king, imbin yangbala men 30 yiya ol. En wen imbin gowei brom det haus blanga det king, imbin go ebriweya langa det kantri blanga dumbat im wek. 47Langa det sebenbala gudbala yiya ola pipul bin growimap detmatj daga, 48en Josef en im wekinmen olabat bin gajim haf daga brom ola pedik langa ebri taun, en deibin hipimap det daga insaid langa ola stowahaus langa detlot taun. 49Ola daga langa detlot stowahaus bin jidan detmatj, en Josef bin trai en kaundimap. Bat kaan du. Det daga bin jidan detmatj jis laik ola sengraun weya jidan wansaid langa solwoda.
50Wal bifo det sebenbala draiwan yiya bin kaman, det waif blanga Josef bin abum dubala lilboi blanga im, 51-52en Josef bin tok, “God bin album mi fogedabat det trabul weya aibin abum basdam. Mi nomo jinggabat main dedi en main braja olabat nogudbinjiwei na, dumaji God bin gibit langa mi main ronwan femili iya langa dijan kantri weya aibin abum trabul.”
Wal Josef bin gulum neim blanga det feswan lilboi Manesa, en blanga det sekanwan lilboi imbin gulum im neim Ifreiyim.
53Bambai na det sebenbala gudbala yiya weya deibin growimap ola daga bin binij na, 54en det sebenbala draiwan yiya bin stat. Imbin hepin seimwei laik Josef bin tok im garra hepin, en ebri kantri bin jidan brabli draiwan na. Ola kantri bin jidan brabli nogud. Bat langa det kantri gulum Ijip deibin abum blendibala daga langa ola stowahaus.dEks 7:11;
55Bambai na ola pipul langa Ijip bin binijimap olabat ronwan daga, en wen deibin ranat blanga daga, deibin go langa det king, en deibin askim im blanga daga na.
Wal det king bin dalim olabat, “Yumob go langa Josef, en yumob duwit langa im, wanim im dalim yumob blanga dum.”eJon 2:5;
56Wal det kantri bin jidan brabli draiwan ebriweya na, en Josef bin lafta opinimap ol detlot stowahaus weya ola daga bin jidan, en imbin selim daga langa ola pipul na, 57en pipul brom ebri kantri bin ol kaman langa Ijip blanga baiyim daga brom Josef, dumaji olabat ron kantri bin jidan brabli draiwan ebriweya, en dei nomo bin abum eni daga.

a41:8: Denyul 2:2;

b41:40: Eks 7:10;

c41:42: Denyul 5:29;

d41:54: Eks 7:11;

e41:55: Jon 2:5;