Juda en Teima
381Wal Juda bin gowei brom im braja olabat, en imbin go en jidan garram wan olmen neim Haira deya langa wan taun gulum Edulam.
2Bambai na wandei Juda bin midim wan gel brom det kantri gulum Keinan. Det gel dedi bin neim Shuwa.
Wal Juda bin merrit langa det gel, 3en bambai det gel bin abum wanbala lilboi, en dubala bin gulum im neim Yura.
4Bambai na det gel bin abum najawan lilboi blanga Juda, en dubala bin gulum im neim Onan.
5Wanmo igin det gel bin abum najawan lilboi blanga Juda, en dubala bin gulum im neim Shela. Wen det lilboi bin bon, Juda en im waif bin jidan langa det pleis gulum Eksib.
6Bambai na detlot lilboi bin ol growap, en Juda bin faindim waif blanga det feswan san blanga im. Det gel bin neim Teima.
7Wal det feswan san blanga Juda bin brabli nogudbala, en YAWEI det trubala God nomo bin laigim im, dumaji ebrijing weya det boi bin oldei dumbat bin oldei meigim God brabli nogudbinji, en bambai na God bin meigim im dai.
8Afta na wen det feswan san blanga im bin dai, Juda bin tok langa det sekanwan san blanga im, “Wotabat yu silip garram det waif blanga yu dedbala braja, dumaji det lowa blanga wi im tok lagijat na. Yu garra silip garram im blanga gibit im beibi blanga yu dedbala braja, dumaji im nomo bin abum eni biginini blanga im.”
9Wal det sekanwan san blanga Juda bin sabi det beibi kaan jidan ronwan biginini blanga im, en wen dubala bin silip, im nomo bin weistim enijing insaid langa det gel blanga gibit im beibi. Imbin weistim langa graun, dumaji im nomo bin wandim det gel blanga abum beibi blanga im dedbala braja. 10En wen imbin dum lagijat, imbin meigim YAWEI brabli nogudbinji, en God bin meigim im dai du.
11Afta na Juda bin dalim Teima det lambarra blanga im, “Yu gobek langa yu dedi kemp en jidan deya raidap main boi Shela growap bigwan. Bambai yunbala garra merrit.” Lagijat na Juda bin tok, dumaji imbin bradin Shela mait dai seimwei laik det naja dubala san blanga im bin dai.
Wal det gel bin lisin langa Juda, en imbin gobek langa im dedi kemp.
12Bambai na det waif blanga Juda bin dai, en Juda bin berrim im dedbala waif, en wen det taim blanga kraikrai bin binij, Juda en det fren blanga im neim Haira bin go langa wan taun gulum Timna weya ola wekinmen bin shirimbat ola ship blanga Juda.
13Wal det gel Teima bin gedim wed weya Juda det lambarra blanga im bin go blanga shirimbat ola ship blanga im. 14En det gel bin deigimat det klos weya imbin werrimon weya im hasbin bin dai, en imbin werrimon klos blanga drowim men langa im, en afta imbin go en jidan rait langa det pleis weya det roud langa det taun bin kamat langa det najawan taun gulum Einaiyim. Lagijat na det gel bin dum, dumaji imbin sabi det laswan san blanga Juda bin bigwan. Bat Juda nomo bin gibit im yet blanga merrit langa im.
15-16Wal wen Juda bin wok langa det roud blanga go langa det taun gulum Timna, imbin luk det gel jidanbat deya lagijat garram detkain klos, en imbin meigim im bush. Im nomo bin sabi det gel bin Teima det lambarra blanga im, en Juda bin tok, “Alo! Dijan gel im luk laik im wandim men.” En imbin go langa det gel, en imbin tok, “Kaman na. Yunmi go silip.”
Wal det gel bin tok, “Wanim yu garra gibit langa mi?”
17En Juda bin tok, “Ai jandim wanbala lilwan gout langa yu afta.”
Wal det gel bin tok, “Orait. Bat yu garra gibit mi samting blanga jidan pruf weya yu garra jandim det gout langa mi. Yu garra gibit mi samting blanga yu blanga kipum raidap yu jandim mi det gout.”
18Wal Juda bin tok, “Wal wanim ai garra gibit yu blanga pruf?”
En det gel bin tok, “Yu gibit mi det nekleis garram yu neim en det wokinstik blanga yu.”
Wal Juda bin gibit det dubala ting langa det gel, en afta dubala bin silip na.
19Afta na Teima bin gobek langa im kemp, en imbin deigimat detlot klos weya drowim men, en imbin werrimon detlot klos weya imbin werrimon basdam.
20Bambai na Juda bin jandim Haira det fren blanga im blanga go langa det gel en gibit im det lilwan gout en gajimbek det nekleis en wokinstik blanga im. Bat Haira nomo bin faindim det gel, 21en imbin go en askimbat ola men langa det taun, “Wujei det gel weya imbin oldei jidanbat langa roud en weidabat blanga men?”
Wal detlot men bin dalim Haira, “Wi nomo garram detkain gel iya weya oldei weidabat blanga men.”
22Wal Haira bin gobek langa Juda, en imbin dalim im, “Ai nomo bin faindim det gel, najing. En aibin askim ola men langa det taun, en deibin dalim mi dei nomo garram detkain gel deya.”
23Wal Juda bin tok, “Nomeda. Larram det gel kipum det nekleis en wokinstik main. If yunmi kipgon lukabat det gel, bambai ola pipul garra laflaf langa yunmi. Aibin trai blanga peiyim im. Bat yu nomo bin faindim im. Wal libum na.”
24Bambai na thrimants afta, Juda bin gedim wed blanga im lambarra Teima weya imbin lukabat men, en imbin jidan femiliwei na. Oni blanga Juda imbin femiliwei. Bat Juda nomo bin sabi tharran.
Wal Juda bin tok, “Det gel bin breigim det lowa. Wal wi garra deigimwei det gel en barnimap im en meigim im dai.”
25Wal wen deibin go blanga grebum det gel en deigimwei im en kilim im, det gel bin jandim wed langa Juda blanga kaman, en wen imbin kaman deya, det gel bin tok, “Mi garram beibi blanga det men hu jidan bos blanga dijan nekleis en dijan wokinstik. Yu sabi hu blanga dijan dubala?”
26Wal Juda bin luk det dubala ting, en imbin tok miselp, “Det gel im garram mi. Ai bina larram im merrit langa main boi Shela. Bat ai nomo bin duwit.”
Wal Juda bin larramgo det gel fri, en dei nomo bin kilim im, en Juda nomo bin silip garram im igin.
27Bambai na det taim bin kaman blanga det gel blanga abum det beibi, en imbin abum dubala lilboi. 28Det wanbala lilboi bin pudumat im bingga basdam, en det wekingel bin taiyimap redwan string langa im bingga, en imbin tok, “Dijan bin kamat feswan na.”
29Bat det lilboi bin pulumbek im bingga insaid igin, en det braja blanga im bin kamat feswan. “Gardi!” det wekingel bin tok, “Lagijat na yubin meigim miselp kamat! Wal blanga tharran na dei garra gulum yu neim Peres.”
30Afta na det lilboi braja garram det redwan string langa im bingga bin kamat, en deibin gulum im neim Sera.