Loda traib bin kamat brom detlot san blanga Nowa
1 Kranakuls 1:5-23
101Wal afta det fladwodataim loda difrin traib bin kamat brom Shem, Hem en Jeifeth detlot thribala san blanga Nowa.
Ola traib hubin kamat brom Jeifeth
2Det san blanga Nowa neim Jeifeth bin abum sebenbala san neim Goma, Meigog, Medai, Jeiban, Tubal, Mishek en Tairas.
3Goma bin abum thribala san neim Eshkenes, Rifeth en Togama.
4Jeiban bin abum fobala san neim Ilaisha, Tashish, Kitim en Dodanim. 5En ol detlot traib weya bin jidan langa det solwoda kantri bin ol kamat brom detlot fobala san blanga Jeiban.
Wal ol dislot pipul na bin kamat brom Jeifeth, en deibin jidan langa olabat ron traib en langa olabat ron kantri, en deibin ol abum difrinwan langgus.
Ola traib hubin kamat brom Hem
6Det san blanga Nowa neim Hem bin abum fobala san neim Kush, Misraim, Put en Keinan.
7Kush bin abum faibala san neim Seba, Habila, Sabta, Reiyama en Sabteka. En Reiyama bin abum dubala san neim Shiba en Dedan.
8Kush bin abum najawan san du neim Nimrod. Imbin jidan bigneim langa ola kantri, 9en imbin nambawan hantingmen, dumaji YAWEI det trubala God bin oldei albumbat im. En ola pipul bin oldei tok, “Nimrod im nambawan hantingmen. En maitbi YAWEI garra meigim yumob jidan seimwei laik im du.” 10Wal deibin meigim Nimrod jidan bos blanga loda taun langa det kantri gulum Bebalon, en imbin jidan bos blanga detlot taun gulum Bebalon, Irek, Ekad en Kalna, 11en afta imbin go langa det najawan kantri gulum Asiriya, en deya na imbin bildimap fobala taun gulum Ninaba, Reiyabothiya, 12Keila en Resen. Resen bin jidan langa midul langa Ninaba en Keila. Bat Keila bin det nambawan taun.
13Loda traib bin kamat brom det san blanga Hem neim Misraim en deibin gulum neim blanga ol detlot traib Ladait, Einamait, Leiyabait, Neftahait, 14Pethrasait, Keslahait en Keftorait. En brom detlot Keslahait traib ola Filastain pipul bin kamat.
15Det feswan grensan blanga Nowa det san blanga Hem neim Keinan bin abum san neim Saidan, en loda traib bin kamat brom Keinan, en deibin gulum neim blanga ol detlot traib Hitait, 16Jebusait, Emarait, Gegashait, 17Hibait, Akait, Sinait, 18Abadait, Semarait en Hemathait.
Bambai ol detlot Keinan pipul bin spredat ebriweya. 19Brom det taun gulum Saidan deibin spredat raidap langa det taun gulum Gera olawei raidap langa det taun gulum Gasa. Brom deya deibin go sanraiswei langa detlot taun gulum Sadam en Gamora en Edma en Seboiyim olawei raidap langa det taun gulum Lasha.
20Wal ol detlot pipul na bin kamat brom Hem, en deibin jidan langa olabat ron traib en langa olabat ron kantri, en deibin ol abum difrinwan langgus.
Ola traib hubin kamat brom Shem
21Det san blanga Nowa neim Shem bin bigwan braja blanga Jeifeth, 22en imbin abum faibala san neim Elam, Esha, Apekshed, Lad en Eram.
23Eram bin abum fobala san neim As, Hul, Githa en Mishek.
24Apekshed bin abum san neim Shela, en Shela bin abum san neim Iba, 25en Iba bin abum dubala san. Wanbala imbin gulum im neim Peleg, dumaji det taim na God bin kadimat ola pipul langa olabat ronwan kantri. En det najawan san imbin gulum im neim Joktan.
26Joktan bin abum 13 san neim Elmodad, Shelaf, Heisameibeth, Jera, 27Heidoram, Yusal, Dikla, 28Obal, Abimeil, Shiba, 29Ofiya, Habila en Jobab. 30En ol detlot pipul hubin kamat brom olabat bin jidan olawei brom det kantri gulum Misha raidap langa det hil gulum Sefa deya langa det reinjis kantri sanraiswei.
31Wal ol detlot pipul na bin kamat brom Shem, en deibin jidan langa olabat ron traib en langa olabat ron kantri, en deibin ol abum difrinwan langgus.
Ola difrinwan langgus
32Wal afta det fladwodataim bigmob difrinwan traib bin kamat brom detlot thribala san blanga Nowa, en ol detlot traib bin spredat ebriweya, en deibin ol jidan langa olabat ron kantri.