YEBURUW

 

Dhuwandja Yeburuny djorra’ bukmakkun Garraywalaŋumirriw yolŋuw walalaŋ bawalamirrilila wäŋalil. Ga ŋula yolthu yan ŋayi gan dhuwandja djorra’ wukirri. Yurr ŋayi ŋunhi wukirrinyamirrnydja yolŋu nhäŋal ŋayi gan, ga marŋgi ŋayi ŋunhi wiripuny gan Garraywalaŋumirr yolŋu walal ḏiltji-bilyurra beŋuryiny yuṯaŋurnydja dhukarrŋur malthunnaŋur Garraywalnydja, bala gan bilyurra roŋiyinan ŋäthiliŋulila romlil/dhukarrlil. Ga wukirriny ŋayi dhuwal, yän ga bira’maram bukmaknha walal dhu yaka ḏiltj-bilyun Djesuw, ga milkuŋal ŋayi walalaŋgal ŋunhi ŋayi dhuwal Djesuny ŋurruwuŋmirr yan mirithirr.

Ŋayiny ŋunhi bulu ga djuḻkmaram ŋunhi djiwarr’wuynhany yolŋuny walalany. (1:5-14)

Ga djuḻkmaram ŋayi ga ŋula yolnha djawarrkmirriny yolŋuny, ga djuḻkmaram ŋayi ga Mawtjitjnha ga Djatjuwany. (2:1-4:14)

Ga bulu ŋayi ŋunhi dhuwurr-dhunupa yan ḻiya-ŋärra’mirr yolŋu, bili ŋayi bäyŋu ŋula dhuwurr-yätj rom warkthunna.

Ga ŋunhi ŋayi dhiŋgaŋalnydja limurruŋgalaŋuw dhuwurr-yätjkuny romgu, ŋunhiny ŋayi ŋayipin mundhurr-wurrupanminany, ŋunhin ḏarrtjalknha yolŋu, märr limurrnydja dhu ga ŋunhi yakan bulu mundhurryu-wurrupan ŋula nhä warrakan’nha limurruŋgalaŋaw dhuwurr-yätjkuny romgu. Ŋayiny ŋunhi dhiŋgaŋal limurruŋguny mundhurr-wurrupanmin buku-waŋganynha yan.

Ŋunhi ŋayi dhiŋgaŋalnydja, ga buluyi ŋayi walŋathin beŋur dhiŋganhaŋur, ŋunhiny ŋayi ḻapmaraŋala limurruŋ dhukarrnha bukmakkun yolŋuw walalaŋ balan God-Waŋarrwala.

 

Ga bulu ŋayi ga dhiyaŋiyi yolŋuy ŋunhi ŋayi wukirri dhuwal djorra’, yän ŋayi ga ŋayaŋu-rur’maram ŋunhiwurruny yolŋuny walalany ŋunhi walal ŋuli ga malthun yan Djesuw, walal dhu yaka yan mel-yupthun Garraywal nhänhaŋur, ŋunhi walal ga nhakun waṉḏirrnydja (12:1-3)