51Minypa junggay wana an-babalapa an-guyinda, Wangarr a-barnjinga a-workiya an-gugaliya, minypa nipa barra gojilapa a-ji burrwa Wangarr rrapa birripa gu-galiya yerrcha, rrapa a-wu barra a-workiya Wangarr mun-nigipa, rrapa minyjak a-bu nuluwa gun-gata nula minypa birripa gu-galiya yerrcha werra aburr-negiyana. 2An-gatiya an-gugaliya junggay wana an-babalapa an-guyinda, nipa marn'gi minypa an-gugaliya gun-derta gu-barripurda a-workiya, rrapa nipa an-mola a-nirra burrwa a-workiya birripa gu-galiya yerrcha, minypa aburr-yolkiya rrapa aburr-lijiwarriya. Ngardawa an-gata junggay wana an-babalapa an-guyinda, nipa burr-guta an-nyarlkuch. 3Gun-narda nula -- ngardawa nipa burr-guta an-nyarlkuch -- nipiya an-gata junggay wana an-babalapa minyjak a-burnda a-workiya nuluwa Wangarr, wurra ngika minypa gu-galiya yerrcha birripa wupa ngardapa werra aburr-negiyana, wurra minypa nipa burr-guta an-gata junggay.
4Gala ana-nga nipa wupa gu-ma gun-gata gun-molamola jama, wurra an-gugaliya junggay wana an-babalapa a-nirra a-workiya, minypa nipa Wangarr a-mangga rrapa a-gurrmunga a-workiya. Gu-gurda ngacha minypa an-gata Aran (Aaron) mu-ngoyurra gun-guwarr junggay a-ninya wana an-babalapa. 5Rrapa gu-gurdiya ngacha minypa nipa Christ junggay a-ninyarra wana an-babalapa. Minypa nipa Wangarr a-menga. Minypa nipa a-wena nula Christ,
“Nginyipa ny-nyaypa ny-yalkurpa,
ngaypa ngiy-bokamurra geka.”
6Rrapa minypa barrwa gu-yurra janguny, nipa a-wena,
“Nginyipa junggay nyi-nirrapa ny-yorkiya,
minypa nginyipa rrapa Melk'ichadek (Melchizedek) gu-ngardapa ana-gotula.”
7Gun-gata Jesus a-ni ngunyuna rrawa, nipa burr-guya a-wengganana rrapa a-ngiwija nula Wangarr an-gatiya nipa wupa an-murna a-jarlapa a-ma gu-gata gu-gujuwa wenga. Minypa Jesus a-rruwujana rrapa a-gonyjinga nula burr-guya, rrapa nipa Wangarr a-galiyana nula, ngardawa Jesus ana-nyala a-marrjerrmiyana nula a-ni. 8Wurra wuriya nipa An-walkurpa, wurra gun-nerra gu-ni nula gu-workiyana rrapa barrwa a-juwuna. Gu-gurda ngacha minypa nipa marn'gi a-ni a-bamuna a-galiyana nula a-workiyana Nyanyapa niya. 9Minypa nipa an-molamola a-ni a-bamuna, gu-mungbuna, gu-gata wenga barra gu-galiya yerrcha wanngu aburr-nipa barra aburr-workiya ngardawa nipiya An-walkurpa nyanma, minypa aburr-yinmiyapa aburr-galiyarra nula aburr-workiya. 10Minypa Wangarr a-wena rrapa a-ngurrjinga Jesus, nipa junggay wana an-babalapa, nipiya rrapa Melk'ichadek gu-ngardapa butula.
Gala Barra Nyiburr-dawurdawuja
11Gun-gata nula ngayburrpa nyibi-rrimanga ana-gorrburrwa gun-jaranga janguny, wurra nipa jarra gun-derta arrburrwa yarlanga nyibi-nega ana-gorrburrwa, ngardawa minypa ana-goyburrpa warlwarl nyiburr-galiyarra nyiburr-workiya. 12Minyjiya. Ngayburrpa nyibu-borrwurra, jimarn jarra gun-nardiya gugu ana-goyburrpa nyiburr-ninya minypa marn'gi nyiburr-gunega, wurra jarra ana-goyburrpa mu-nguy nyiburr-ninyarrapa minypa aburr-werranga aburr-guna waya. Ya? Ana-nga barra barrwa marn'gi nyirr-nega Wangarr gun-nika janguny? Wurra ana-goyburrpa gala burdak marn'gi nyiburr-ninyarrarna gu-gata ngacha marn'gi gun-gunega minypa aburr-guna waya marn'gi aburr-nirra aburr-bamburda aburr-workiya. Wurra ana-goyburrpa minypa gun-maywapa yokuyoka gala balaja m-baypa, wurra burdak ngamangama wupa gu-banga a-workiya. 13Minypa ana-nga an-gata ngamangama wupa gu-banga a-workiya, an-narda ngardawa an-guna waya. Rrapa ana-gata ngacha nipa gala marn'gi janguny minypa gun-ngiya gun-mola rrapa gun-ngiya gun-nerra. 14Wurra aburr-werranga aburr-gata balaja mbi-banga aburr-workiya, birripa minypa gipa wana aburr-ni. Gun-narda gun-maywapa minypa gun-burral gu-galiya yerrcha gubu-borrwurra aburr-workiyana janguny, yanma derta aburr-negiyana rrapa marn'gi gun-ngiya minypa gun-mola rrapa gun-ngiya gun-nerra.