Wangarr Marn'gi Burr-nenga A-workiya Aburr-yigipa Walkurpa Yerrcha
121Ganapiya, lika aburr-gata mu-ngoyurra aburr-ni rrapa marr aburr-balcha nula Wangarr, gun-guniya gugu birripa minypa aburr-jaranga aburr-murra arrbi-nacha gurda aburr-nirra. Minypa gun-maywapa ranginy nguparr gu-jirra gu-gomarriya ngayburrpa nguburr-nirra, wurra gun-burral aburr-gata mu-ngoyurra aburr-warrchinga waykin, birripa arrbi-nacha gurda aburr-nirra. Rrapa gun-narda nula ngayburrpa barra ngubu-ma, ngubu-gaka gun-nga burr-guta minypa gu-gorlkakajarra arrburrwa gu-nirra jarlakarr; rrapa ngubu-bawa barra gun-gata gun-nerra an-dimanga gu-nirra, rrapa nguburr-yinda barra nguburr-bamba barra minypa ngubu-mungba gun-gata jama nipa Wangarr arr-wuna. 2Ngayburrpa barra mu-nguy ngubu-borrwa Jesus an-gata gu-menga arrburrwa rrapa gu-mungbuna gun-guna janguny ngayburrpa ngubi-rrimanga. Minypa nipa gala a-jekngarna, marrban birripa abu-wenyagarra, a-balcha a-yu. Nipa gala gu-borrwujarna gun-gata wana gun-gugurkuja, wurra jarra gun-gumarrkapcha gu-borrwurra a-ni nipa gu-ma barra. Rrapa gun-nardiya gugu nipa a-ninyarra wugupa nula Wangarr nipa ana-munganaguwa.
3Bubu-borrwa nipa an-gatiya gala a-jekngarna, marrban aburr-gata aburr-werra aburr-bachirramiyana nula. Bubu-borrwa nipa, rrapa ana-goyburrpa gala nyiburr-yinmiya nyiburr-dawurdawuja nyiburr-ni rrapa nyiburr-jeka. 4Ngardawa gun-gata minypa ana-goyburrpa nyiburr-derta nyiburr-jinyjarra nyiburr-workiya, gala yapa gun-nerra nyin-dima -- rrapa minypa wolawola gun-derta nyibu-barripurda nyiburr-workiya -- wurra marrban. Wurra gu-gata ngacha ana-goyburrpa gala burdak nyiburr-juwiyarna, minypa Christ an-derta a-jinyjapa rrapa a-juwuna. 5Wurra waygaji ana-goyburrpa nyiburr-bamapuna, ya, gun-gata gelama gelama gun-gubay janguny gu-gatiya gu-janguny Wangarr nipa walkur nyirr-nenga? Minypa gu-yinaga gu-yurra,
“Ny-junarda ny-yalkurpa ny-nyaypa,
gala barra ny-borrwa gun-gata minypa Wangarr gelama gelama biy-banga a-workiya,
jimarn jarra gun-gata borijipa.
Wurpa lika gala barra wargugu nyi-ni rrapa n-dawurdawuja nyi-ni,
minypa nipa wolawola marn'gi biy-nenga biy-jongga a-workiya.
6Ngardawa Wangarr gelama gelama burr-banga a-workiya aburr-gata minypa nipa jal a-nirra burrwa,
rrapa nipa wolawola marn'gi burr-nenga burr-burnda a-workiya aburr-gata aburr-yinmiyapa nipa walkur burr-nenga.”
Gu-yinagata gu-yurra janguny. 7Minypa ana-goyburrpa gala nyiburr-yinmiya nyiburr-jeka. Wurra buburr-jinyjapa Wangarr nyiburr-yika gu-galiya yerrcha, marrban gun-derta nyibu-barripa. Wurra gun-gata nula gun-derta bubu-borrwa minypa Wangarr nipa marn'gi nyirr-nenga a-nirra, minypa nipa gu-borrwuja ana-goyburrpa nyiburr-yigipa walkurpa yerrcha. Minyja gala ana-nga an-walkurpa an-nigipa nyanyapa niya gala marn'gi a-nega. 8Wurra gun-gata minypa Wangarr marn'gi burr-nenga a-workiya aburr-yigipa walkurpa yerrcha, minyja gun-gata ana-goyburrpa nyiburr-ngukiyana, gun-narda minypa ana-goyburrpa ana-werranga nyanma, Wangarr nyiburr-yika walkurpa yerrcha ngika. 9Minypa ngayburrpa arrbi-rrimarra nyanyapa arrburra yerrcha gun-guna rrawa, birripa marn'gi arrbi-negarra aburr-workiyana, rrapa ngayburrpa marr nguburr-balcha burrwa. Gu-gurda ngacha minypa Nyanyapa arrburra arr-jarlapuna ngayburrpa nguburr-ngurrnga, ngayburrpa mola burr-guya ngubi-yagurrma barra nula nipa, barra minypa wanngu nguburr-ni. 10Minypa aburr-ngayburrpa nyanyapa arrburra yerrcha gu-guna gu-rrawa, birripa marn'gi arrbi-negarra wurpa yarta, minypa gun-nga birripa gubu-borrwurra. Wurra Wangarr nipa jarra marn'gi arr-nenga a-workiya, gu-gata wenga barra gun-molamola gu-ni barra arrburrwa, barra minypa ngayburrpa wugupa nula Wangarr nguburr-molamola nguburr-ni barra. 11Marn'gi gun-gunega gu-gata ngacha minypa wolawola gun-nerra gu-nirra arrburrwa gu-workiya, gun-narda ngayburrpa ngubu-borrwuja nguburr-workiya, jimarn jarra wargugu gun-guni, gun-guworlworlcha ngika. Wurra jarra gun-gata marn'gi gun-gunega, nyanma gu-gatiya jechinuwa arr-nenga nguburr-yinmiyapa nguburr-gata minypa marn'gi nguburr-ni. Rrapa barrwa minypa magaya gu-nirra arrburrwa, gu-gurda ngacha.
12Ganapiya, lika mernda nyiburr-jirra nyiburr-nyarlkuch nyiburr-ni buburr-jarrkarriya, rrapa menama nyiburr-jirra minypa nyiburr-nyarlkuch nyiburr-ni derta buburr-negiya. 13Wurra jarlakarr jechinuwa bubi-nega ana-gorrburrwa, minypa nyiburr-werranga nyiburr-gata nyiburr-burda yerrcha gala gu-yinmiya gu-melamirlamirnda gu-guyinda nyin-duma, wurra jarra nyiburr-molamiya barra.
Gala Barra Wangarr N-dalaja
14Burr-guya bubu-borrwa, rrapa buburr-yinda minypa barra nyiburr-jaranga gu-galiya yerrcha magaya nyiburr-ni barra ana-gorrburrwa gu-gapa gu-guta, rrapa minypa ana-goyburrpa Wangarr nyiburr-yika nyiburr-ni barra, gala gun-nga gun-nerra nyibi-rrima. Wurra minyja ana-nga gala a-yirda a-ni, nipa gala a-yinmiya a-na Wangarr. 15Buburr-jarlapiya. Gala barra ny-yinga ny-jeka rraka gala a-yinmiya Wangarr a-gunggaja nggula. Gala barra ny-yinga ny-bachirramiya nula Wangarr; gala yapa nyiburr-jaranga wargugu nyiburr-ningin rrapa werra nyiburr-negiyan. 16Buburr-jarlapiya. Gala barra ny-yinga ny-yinda gun-nerra jama ny-ji rrapa ny-bamapa nula Wangarr minypa an-gata Yicho (Esau). Wurra nipa gala jal a-nirrarna nula gun-gata gochila gun-gurra nipa gu-rrimarra ana-murnangana gun-nika, minypa an-nigipa nyanyapa niya murna a-wucharna rrapa an-molamola a-nengarna. Wurra balaja nula wupa nipa murna a-wuna an-nigipa worlapa niya Jeykap (Jacob), lika mu-menga, m-barrapa, mu-wulebana. 17Gala barra nyiburr-yirda minypa nipa a-yinagata. Ngardawa ana-goyburrpa marn'gi janguny: Minypa jurdach nipa jal a-ni gu-manggarna gun-gata, wurra a-ngukiyana. Ngardawa nipa gala a-yinmiyarna gu-ngukurdanyjingarna gun-gata nipa minypa werra a-negiyana. Wurra gala a-yinmiyarna, marrban nipa a-rruwujana rrapa a-ngiwija nula an-nigipa nyanyapa niya.
18Wurra ana-goyburrpa yi-gurrepa nyiburr-negiyana nula Wangarr, ngika minypa aburr-goyburrpa nyanyapa ana-gorrburrwa yerrcha yi-gurrepa aburr-bona nula mu-mirk mu-jirra mun-gata mun-nelangga Jaynay (Sinai). Birripa gubi-nana bol burr-guya gu-rronga gu-ji rrapa burr-guya an-munya a-mayana a-ji rrapa yorr gu-goma barlmarrk, 19rrapa aburr-galiyana minypa an-gubipija ngorla a-maya a-wena. Minypa ana-manyjirda aburr-galiyana nipa Wangarr a-wena, rrapa gun-gata janguny birripa aburr-gurkuja. Lika aburr-ngiwija nula Mojich, minypa Wangarr gala barra mu-nguy a-wengga burrwa. 20Minypa birripa aburr-gurkuja gun-gata wengga nipa Wangarr a-wena, minypa a-yinanga a-wena, “Mun-guna mun-mirk minyja ana-nga an-gugaliya o burr-minyjak mu-rrima mun-gata, an-gata a-juwa barra, minypa gu-jandarra nyibu-bu barra.” 21Minypa gun-gata birripa gubi-nana burr-guya gun-gugurkuja, minypa Mojich (Moses) a-yinanga a-wena, “Ngaypa ngu-wurrwurrjinga.”
22Wurra ana-goyburrpa jarra nyiburr-bona gurda mu-werranga mu-guyinda mu-mirk mun-nelangga Jayan (Zion). Minypa Wangarr an-gata ay-nirrapa ay-workiya nyiburr-bona gurda nula gun-nigipa rrawa gun-gata Jir'uchalam (Jerusalem) rrawa waykin wenga. Ana-goyburrpa nyiburr-bona gurda, minypa aburr-jaranga aburr-gata waykin aburr-guyinda aburr-mujaruk aburr-worlworlchinga gata gu-janara gu-bama, 23rrapa minypa Wangarr burr-yika walkurpa yerrcha gu-ngardapa aburr-negiyana, aburr-gatiya minypa an-maywapa an-murlamurrwa an-guyinda, ngardawa minypa aburr-welangga aburr-gata waykin. Ana-goyburrpa nyiburr-bona gurda nula Bunggawa nipa wupa ngardapa ganyjarr gu-rrimanga burr-mari a-wengga arrkula, nipiya Wangarr an-gatiya gu-rrimanga a-nirra gun-nardiya rrawa waykin rrapa wupa. Nyiburr-bona gurda burrwa aburr-ngurrnga aburr-gata minypa mu-ngoyurra aburr-mola rrapa jechinuwa aburr-ni, rrapa barrwa Wangarr aburr-molamola burr-negarra warrpam. 24Minypa ana-goyburrpa nyiburr-bona gurda nula Jesus an-guna gun-molamola gu-nenga arrburrwa gun-guna nula gun-geka rum Wangarr gu-barnjinga. Nyiburr-bona gurda nula maningan mun-gata mun-guwurlurrbiya, mu-gatiya minypa gochila an-dana gun-molamola, ngika minypa Aybul (Abel) mun-nika maningan burr-mari mu-rrimarra mu-yu.
25Buburr-jarlapiya. Gala barra nyibu-dalaja nipa an-gata a-weya ana-gorrburrwa. Wurra aburr-gata jarra abu-dalajinga Mojich an-gata gu-ngurrjinga burrwa a-ni Wangarr gun-nika janguny gun-guna rrawa nguburr-nirra, birripa gala aburr-yinmiyarna aburr-lijiwarriyarna nula mari, wurra jarra nipa Wangarr burr-buna, burr-wulebana. Wurra gun-gata marr gu-yinanga wana, wurra jarra gun-guna wana: Ngayburrpa gala nguburr-yinmiya nguburr-lijiwarriya nula mari, minypa ngubu-dalaja Jesus an-gatiya a-weya arrburrwa a-nirra waykin wenga. 26Minypa gun-gata mu-ngoyurra nipa Wangarr a-wena, nipa manyjirda a-jirra gu-ngorrkuja gun-guna rrawa. Wurra gipa gugu nipa gochila an-dana, minypa nipa a-yinanga, “Burdak ngaypa barrwa barra ngu-ngorrka barra gun-guna rrawa, minypa gu-jel gun-narda wupa ngardapa ngika, wurra waykin burr-guta.” 27Rrapa gun-gata minypa nipa a-yinagata a-wena “burdak barrwa barra”, gun-narda janguny nipa minypa arr-gurdagurdarraja gu-nirra ngayburrpa, minypa Wangarr nipa barrwa gu-ngorrka barra nipa gu-jarlapunapa, rrapa warrpam gun-gata gu-werrpiya barra, minypa barra gun-nerranga gun-gata gala gu-yinmiya gu-ngorrkiya nipa jarra gu-jipa barra gu-workiya.
28Gun-narda nula ngayburrpa barra ngubu-borrwa rrapa nguburr-japurramaya barra nula Wangarr, minypa ngayburrpa ngubu-ma barra rrawa waykin gun-gata gala gu-yinmiya gu-ngorrkiya. Nguburr-yirda barra ngubu-borrwa rrapa Wangarr nguburr-japurramaya barra nula nguburr-workiya, rrapa minypa jama nguburr-ji barra nula gun-molamola gu-ni barra nula gu-workiya, minypa nipiya wana an-babalapa rrapa ngayburrpa marr nguburr-balcharra nula. 29Ngardawa an-ngayburrpa Wangarr nipa minypa bol gu-rrongga gu-jirra gu-workiya rrapa gun-nerra gu-yalpurda.