Christ Gun-nika Ganyjarr
21Ganapiya, lika minypa ana-goyburrpa rrapa Christ gu-ngardapa nyiburr-negiyana, rrapa nipa minypa nyirr-jalkakaja a-nirra rrapa derta nyirr-nenga, minypa Mern An-mawunga nyibi-rrimanga rrapa jal nyiburr-nirra ana-gorrburrwa gu-gapa gu-guta rrapa nyiburr-gunggachichiya nyiburr-workiya, 2lika bubu-mungba gun-nardiya minypa ana-goyburrpa ngunabi-jalkakaja nyiburr-nirra, minypa gu-guna ngacha: Gu-ngardapa bubu-borrwa rrapa gurrurta jal gun-guni gun-ngardapa bubi-rrima, minypa gun-burral gu-ngardapa ana-gorrburrwa. 3Wurra ana-goyburrpa gala barra nyibu-borrwa nyiburr-ni minypa barra nyiburr-beybachichiya rrapa wana nyiburr-negiya ngardapa ngardapa. Wurra gu-gurdiya ngacha ana-goyburrpa gala nyiburr-yinmiya. Wurra bubu-borrwa ana-gorrburrwa gu-gapa gu-guta minypa ana-goyburrpa nyiburr-molamola, rrapa delipa buburr-negiya ana-gorrburrwa gu-gapa gu-guta. 4Ngika bubu-borrwa gun-nga ana-goyburrpa ngardapa ngardapa jal nyiburr-nirra gun-narda wupa ngardapa. Wurra jaga buburr-gana ana-gorrburrwa gu-gapa gu-guta. 5Buburr-yirda bubu-borrwa buburr-workiya, minypa gun-maywapa ranginy Christ Jesus.
6Minypa Christ Jesus marrban nipa an-ngardapa an-ngurrnga Wangarr,
wurra nipa gala gu-borrwujarna nipa an-murna a-yinmiya barra wana an-babalapa a-ni minypa Wangarr.
7Wurra nipa an-ngurrnga a-ngukurdanyjiyana,
an-mujama a-ni;
minypa ana-bona,
a-bambungguna an-gugaliya.
8Rrapa gun-gatiya nipa an-gugaliya a-ni, nipa delipa a-negiyana a-ni,
minypa Wangarr nipa Christ gu-yagurrmurra nula a-bamuna, gu-mungbuna,
marrban burr-jong abi-negarra abi-rrana rrapa nipa a-juwuna.
9Gun-narda nula Wangarr a-jarrkarrana Jesus waykin,
rrapa an-nelangga wana an-babalapa a-negarra,
10barra nipa ana-murrpa Jesus ngayburrpa nguburr-menama ngubi-rra barra nula,
rrapa nguburr-marrngoypiya barra nula.
Minypa aburr-gata waykin aburr-nirra, rrapa nguburr-gurda gu-jel nguburr-nirra, rrapa aburr-gata burr-guta gu-jel wuparnana aburr-nirra,
warrpam arr-gurdiya gorlk ngarripa arr-marrngoypiya barra nula arr-ni nipa Jesus.
11Minypa ay-ngurrja barra Jesus Christ nipa Bunggawa,
yanma Wangarr an-nelangga an-molamola ay-nega,
an-gatiya Nyanyapa arrku waykin a-nirra.
Ana-goyburrpa Nyibi-yagurrma Barra Nula Nyiburr-workiya Wangarr
12Ganapiya, wurra gun-gata minypa Christ delipa a-negiyana rrapa gu-yagurrmurra nula Wangarr, gun-narda minypa nipa arr-gurdagurdarrana jarlakarr. Rrapa ana-goyburrpa, japurra ngapa nyiburr-jirra, gun-gata ngaypa ngu-ni ana-goyburrpa nyiburr-murna, ana-goyburrpa nyibi-yagurrmurra nula nyiburr-workiyana Wangarr. Wurra gun-guniya burr-guta ngaypa balay ngu-nirra, ngaypa jal ngu-nirra minypa ana-goyburrpa barra mu-nguy nyiburr-yirda Wangarr nyibi-yagurrma barra nula nyiburr-workiya, minypa nipa wanngu nyirr-nenga a-nirra; gala yapa nyiburr-ngukiyan. 13Ngardawa nipa Wangarr nyirr-wucha a-workiya ganyjarr, ana-goyburrpa barra nyibi-yagurrma nula nyiburr-workiya gun-nga nipa gu-borrwuja, rrapa minypa nyiburr-yirda jama nyiburr-ji.
14Ganapiya, lika ana-goyburrpa gala barra nyibu-yopa Wangarr rrapa ngarndarrk ngarndarrk nyiburr-negiya nula, minypa gun-nga nipa nyirr-wucha a-workiya. Wurra nyiburr-molamola nyiburr-bamba barra nyiburr-workiya, 15barra gala ana-nga a-yinmiya nyirr-ngurrja a-boy ana-goyburrpa, jimarn jarra bama a-yindin gun-nerra nyibi-rrimanga; wurra gun-nyagara. Wurra jarra minypa ana-goyburrpa Wangarr nyiburr-yika gu-ngarda yerrcha nyiburr-ni, rrapa minypa gu-galiya yerrcha gu-guna burr-yika gu-rrawa aburr-lijiwarriyana rrapa gun-nerra jama aburr-jirra aburr-workiya, wurra ana-goyburrpa minypa nyiburr-jayanaya nyiburr-ji barra burrwa, 16minypa janguny ana-goyburrpa nyibi-rrimanga burrwa wanngu gun-gunega. Buburr-yirda buburr-bamba, japurra ngapa nyiburr-jirra, barra gun-gata jurdach guna-bamburda minypa Christ burr-mari a-wengga barra, wurra jarra ngaypa ngu-molamola ngu-ni barra, minypa gun-gata borijipa ngika ngaypa mu-ngoyurra jama ngu-ji ana-gorrburrwa burr-guya.
17Aburr-gata aburr-bachirramiyana nula Christ, birripa burraya waygaji ngunabu-bu, ngu-juwa, ngardawa janguny ngu-rrimanga Christ gun-nika. Wurra wuriya gun-gata mari, wurra gun-guniya gugu ana-goyburrpa nyiburr-marrkapchinga nyiburr-nirra, rrapa gun-narda minypa ngaypa burr-guta ngu-marrkapchinga. 18Rrapa ana-goyburrpa barra nyiburr-yirda nyiburr-bamba: Minypa ngaypa ng-guna ngu-marrkapchinga ngu-nirra, gun-narda minypa ana-goyburrpa burr-guta barra nyiburr-marrkapcha nyiburr-ni.
An-guna Dimati (Timothy)
19Minypa an-ngayburrpa Bunggawa Jesus nipa wugupa apula, ngaypa ngu-borrwurra an-guna Dimati (Timothy) burraya ngaypa ngu-jerrma barra ana-gorrburrwa, barra ngaypa janguny ng-galiya ana-gorrburrwa rrapa ngu-nyilja barra. 20Gala ngaypa an-nerranga ngu-rrima jawina minypa an-guna nipa gun-burral a-worijinga ana-gorrburrwa, minypa gu-yinmiya gu-nirra ana-gorrburrwa. 21Aburr-werranga jarra gubu-borrwuja aburr-workiya gun-nga birripa wupa ngardapa jal aburr-nirra, wurra gun-nga Jesus Christ jal a-nirra, birripa gala gubu-borrwa. 22Wurra ana-goyburrpa marn'gi nula an-guna Dimati nipa an-molamola, minypa nipa a-malchinga apula, ngatipa nyirri-ganyja nyirri-workiya rrapa nyirri-ngurrjinga gun-molamola janguny, minypa wugupa jama nyirri-jirra nyirri-workiya gun-maywapa minypa nipa jimarna an-ngaypa walkur. 23Ganapiya, lika ngaypa ng-guna Paul, waypa barra ngaypa marn'gi ngu-ni gu-yinmiya barra gu-ni apula, lika an-guna Dimati ngu-jerrma barra ana-gorrburrwa. 24Rrapa ngaypa marrnguwa ngu-nirra nula Christ, jarra ngaypa burr-guta burraya ngu-bengga ana-gorrburrwa.
An-guna Yipeprad'aytach (Epaphroditus)
25Rrapa an-guna Yipeprad'aytach (Epaphroditus) ngaypa barra ngu-jerrma ana-gorrburrwa, nipiya an-guna an-goyburrpa an-mujaruk ana-goyburrpa mu-ngoyurra nyibi-jerrmanga apula, a-gunggajinga apula ngaypa ng-guna brichina (prisoner) ngu-nirra. Nipa an-maywapa minypa an-ngaypa worlapa ngapa, minypa ngatipa nyirri-guna nyirri-mujama nula Christ, minypa nyirri-yigipa jawina. Wurra ngaypa barra ngu-jerrma ana-gorrburrwa nipiya an-guna, 26ngardawa nipa burr-guya jal a-nirra nyirr-na barra. Ngardawa gun-gatiya nipa gu-borrwurra ana-goyburrpa nyiburr-galiyarra nula nipa a-yorrpurda, lika a-worijinga ana-gorrburrwa. 27Ngaw, ngarla! Nipa gipa mu-ngoyurra a-yorrpurda guya gun-derta gu-derda, jimarna nipa a-juwa, wurra Wangarr a-gunggajinga nula. Rrapa gun-narda minypa Wangarr a-gunggajinga apula ngaypa burr-guta, gala yapa ngaypa ng-guna brichina ngu-nirra barrwa wargugu ngu-ni. 28Gun-narda nula ngaypa barra warrika ngu-jerrma barra ana-gorrburrwa an-guna Yipeprad'aytach, barra ana-goyburrpa mola nyibi-na rrapa nyiburr-worlworlcha nyiburr-ni, barra ngaypa ng-guna gala barra gun-nga ngu-borrwa ngu-ni.
29Ganapiya, lika gata waypa barra nipa a-bengga ana-gorrburrwa, ana-goyburrpa barra nyiburr-gonyja gurda nula rrapa nyiburr-marrkapcha barra nula, minypa nipa wugupa ana-gorrburrwa marr nyiburr-balcharra nula Christ. Rrapa an-nerranga an-gugaliya ana-guna ngacha minypa Yipeprad'aytach, ana-goyburrpa barra marr nyiburr-balcha nula. 30Ngardawa an-guna nipa jimarn jarra a-juwa, ngunyuna jama a-jirra Christ gun-nika. Wurra minypa mu-nguy a-gunggajinga apula a-nirra, gu-mungbuna gun-gata minypa ana-goyburrpa, japurra ngapa nyiburr-jirra, nyibu-wucha ganyjarr rrapa nyibi-jerrmanga gurda apula.