Buburr-gunggachichiya Gu-gapa Gu-guta
61Jela, worla, minyja ana-goyburrpa nyibi-na worlapa ana-gorrburra a-lijiwarriya rrapa werra a-negiya, ana-goyburrpa nyiburr-gata Mern An-mawunga nyibi-rrimanga, ana-goyburrpa barra nyibi-jarlajarlapa nyibu-ga an-gata an-gugaliya, wurpa lika minypa ana-goyburrpa gurrurta nyibi-rrimanga nula. Rrapa ny-yinga ny-jata, nginyipa ny-jarlapiya barra; gala yapa nginyipa burr-guta nyi-lijiwarriyan. 2Buburr-gunggaja ana-gorrburrwa gu-gapa gu-guta gun-nga gun-derta nyibu-barripurda nyiburr-workiya ngardapa ngardapa. Gu-gurda ngacha minypa warrpam Christ gun-nika joborr ana-goyburrpa nyibu-borrwa barra nula. 3Ngardawa ana-nga minyja nipa a-borrwiya, jimarn jarra nipa wana, wurra ngika, gurda minypa nipa a-yolkiya a-nirra. 4Wurra ana-goyburrpa ny-yinga ny-jata, nginyipa ny-borrwiya barra ny-yorkiya nginyipa ny-yinmiya jama ny-jirra ny-yorkiya. Gun-narda wupa minypa nginyipa barra ny-molamola nyi-ni; ngika minypa an-nginyipa an-borrmunga nginyipa ny-beybana. 5Ngardawa an-gugaliya barra ngardapa ngardapa gu-rrima ganyjarr Wangarr a-wuna.
6Aburr-gata aburr-nga gu-galiya yerrcha marn'gi aburr-nirra aburr-bamburda Christ gun-nika janguny, an-birripa marn'gi an-gunega an-gata birripa abu-wu barra aburr-workiya mun-nigipa mun-mujama, minypa mun-nerranga mun-nga mun-gata mun-molamola birripa mbi-rrimanga.
7Ana-goyburrpa gala barra nyiburr-yolkiya. Ngardawa gala a-yinmiya ana-nga an-gata a-yolka Wangarr; wurra nuwurra jurdach nipa an-gugaliya gu-ma barra minypa nipa mu-ngoyurra jama a-ji. 8Ngardawa an-gata ana-nga jama a-jirra a-workiya minypa ana-gugaliya jal a-nirra a-workiya gun-nerra, an-gata an-gugaliya nipa barra gun-guwerrmiya gu-ma barra, minypa gun-gata gun-nerra nipa gu-rrimarra. Wurra ana-nga jama a-jirra a-workiya minypa gu-borrwuja a-workiya Mern An-mawunga gun-nika jal gun-guni, an-gata an-gugaliya gu-ma barra wanngu gun-guni, minypa Mern An-mawunga nipa nyanma. 9Rrapa ngayburrpa gala barra gojarra nguburr-ni nula gun-molamola jama. Wurra nuwurra waypa gun-balmapa gu-ji, gun-molamola guna-jeka barra arrburrwa, minyja ngayburrpa gala gojarra nguburr-ni. 10Ganapiya, lika ngayburrpa barra ngubu-borrwa nguburr-workiya, ngayburrpa nguburr-yinmiya barra gun-molamola jama nguburr-ji nguburr-workiya burrwa wurra gama gorlk. Jarra lika ngayburrpa nguburr-guna gun-ngardapiya arrburrwa janguny ngubi-rrimanga, ngayburrpa burr-guya jama nguburr-ji barra arrburrwa nguburr-workiya gu-gapa gu-guta gun-molamola.
Majija Gun-guni Gun-gata Borijipa Wurra Nguburr-geka Nguburr-nirra Gu-gata Ngacha Mu-dayan
11Bubi-na wana ngu-wukurrjinga mu-guna mu-jurra, minypa gun-guna ngaypa murna ngu-jirra ng-guyinda ngu-wukurrjinga ana-gorrburrwa. 12Aburr-gata minypa jal aburr-nirra aburr-werranga barra burrbi-na, jimarn jarra birripa aburr-molamola, minypa aburr-yinmiya aburr-workiya birripa aburr-burral yarlanga, aburr-gatiya, ngarla, nyirrbu-jurnajuchuwuja aburr-workiya ana-goyburrpa, jimarna ana-goyburrpa barra majija nyiburr-ni. Wurpa lika birripa aburr-yinagata nyirrbu-jurnajuchuwuja aburr-workiya ana-goyburrpa, ngardawa birripa aburr-gurkuja burrwa aburr-birripa aburr-borrmunga; gala yapa mari gubi-jarlapa burrwa gun-gata nula minypa marr aburr-balcharra nula Christ gu-jong gu-guyinda a-balcha a-yu. 13Ngardawa aburr-gatiya birripa marrban majija aburr-ni, wurra birripa gala gun-burral gubu-borrwa aburr-ni joborr. Wurra birripa jarra jal aburr-nirra ana-goyburrpa barra majija nyiburr-ni, barra birripa aburr-molamola aburr-ni minypa ana-goyburrpa nyibi-yagurrmurra burrwa. Gu-gurda ngacha. 14Wurra ngaypa jarra gala ngu-yinmiya rraka ngu-molamola ngu-negiya ngaypa wupa ngardapa, jarra minypa an-ngayburrpa Bunggawa Jesus Christ nipa gu-jong gu-guyinda a-balcha a-yu, gu-gurda ngacha. Ngardawa gu-gatiya wupa nyanma nipa gu-guniya gu-yika gu-rrawa gala gu-yinmiya barrwa nguna-bicha gu-ni, rraka ngaypa ngu-yinmiya barrwa gun-nerra jama ngu-ji nula. 15Marrban an-nerranga an-gugaliya majija a-ni rrapa an-nerranga an-gugaliya gala majija a-nirrarna, wurra majija gun-guni gun-gata borijipa. Wurra minypa ngayburrpa nguburr-geka nguburr-nirra, gu-gata ngacha mu-dayan. 16Rrapa ana-goyburrpa nyiburr-gata nyiburr-yinmiyapa gun-nardiya wupa nyibu-borrwuja nyiburr-workiya, ana-goyburrpa nyiburr-gatiya Wangarr a-gunggaja barra ana-gorrburrwa, rrapa minypa ana-goyburrpa nyiburr-molamola nyiburr-ni barra, gala barra minypa gun-nga nyibu-borrwa nyiburr-ni. Minypa ana-goyburrpa nyiburr-gurdiya gun-burral Wangarr nyiburr-yika Yichrayal (Israel) yerrcha.
17Ganapiya. Gala barra barrwa ana-nga gu-garra apula mari. Ngardawa ng-guna ngu-burral ngaypa ng-ganyja mun-jakarn, minypa ngaypa Jesus ngu-yika ngu-mujama birripa ngunabu-buna.
18Jela, worla, an-ngayburrpa Bunggawa Jesus Christ nipa wugupa ana-gorrburrwa. Gun-nardiya rrapa ganapiya.