61Ngatipa nyirri-malchinga nyirri-nirra nula Wangarr nipa jama a-jirrapa a-nirra, rrapa gu-gurda ngacha minypa burr-guya nyirri-weya ana-gorrburrwa nyirri-nirra, bubi-yagurrma nula Wangarr gun-gata nula minypa nipa a-gunggajinga ana-gorrburrwa. Gala yapa borijipa nipa nyirr-borrwurra. 2Ngardawa gun-guwarr nipa a-yinanga a-wena rrapa a-yinaga a-weya ana-gorrburrwa a-nirra,
“Gun-gata minypa gun-balmapa gu-ni barra ngaypa ng-gunggaja ana-gorrburrwa,
gun-gatiya gugu ngaypa ng-galiyana ana-gorrburrwa.
Minypa gun-gata gun-balmapa gu-ni barra ngaypa wanngu arr-ma,
gun-gatiya gugu ngaypa ng-gunggajinga ana-gorrburrwa.”
Minyja bubu-borrwa: Gun-nardiya gugu nipa a-gunggajinga arrkula, rrapa gun-nardiya gugu barra wanngu arr-negiya arr-gurdiya gorlk.
Paul A-ngurrjiyana Gun-nerra Gu-ni Nula Gu-workiyana
3Ngatipa gala nyirri-yinda nyirri-workiya rrapa minypa ana-werranga a-lijiwarriya; gala yapa aburr-werranga gubu-yopa gun-gata minypa ganyjarr nyirri-dimanga rrapa jama nyirri-jirra. 4Wurra jarra nyirri-yinmiya nyirri-workiya jama nyirri-jirra, ngatipa minypa nyirri-gurdagurdarriya burrwa wurra gama gorlk, minypa ngatipa nyirri-mujama nula Wangarr. Minypa wolawola gun-nerra gu-nirra atila gu-workiya minypa burr-guya gun-nerra, jimarna gala nyirri-yinmiya nyirri-molamiya; wurra ngatipa jarra mu-nguy nyirri-jinyjarrapa rrapa jama nyirri-jirra. 5Minypa birripa nyirrbu-burnda, nyirrbi-yerrnyjinga aburr-workiya rrapa brichina nyirrbi-nenga; rrapa minypa gu-jama nyjirri-dumunga rrapa gala nyirri-yu rrapa balaja nyirri-bay. 6Wurra jarra ngatipa gala gun-nga gun-nerra nyirri-dima, wurra ngatipa marn'gi Wangarr. Rrapa aburr-gata aburr-bachirramiya atila, ngatipa marr nyirri-ganyja burrwa gu-yinpa barra aburr-ngukurdanyjiya. Minypa ngatipa nyirri-mola burrwa gu-galiya yerrcha, minypa Mern An-mawunga nyirri-dimanga rrapa burr-guya gun-burral jal nyirri-nirra burrwa aburr-gata. 7Minypa gun-burral janguny nyirri-weya nyirri-workiya, rrapa Wangarr wugupa atila nipa burr-ganyjarr jama a-jirra. Rrapa minypa nipa nyjirri-wucha jechinuwa gun-guni, minypa gun-maywapa ranginy garlpi nyirri-dimanga minypa nyirri-munganaguwa, rrapa gun-gugorlkaka nyirri-dimanga minypa nyirri-weyka; wurpa lika gun-burral minypa gala gu-yinmiya gu-werra nyjirri-dima, wurra jarra ngatipa nyirri-burnda nyirri-workiya gun-gata gun-nerra. 8Aburr-werranga marr aburr-balcharra atila aburr-workiya; aburr-werranga nyirrbu-dalajinga. Aburr-werranga nyirrbu-yopurda aburr-workiya; aburr-werranga nyirrbu-ngurrjinga minypa ngatipa nyirri-molamola. Aburr-werranga aburr-yinaga atila aburr-workiya, minypa jimarna ngatipa nyirri-guyolkiya; wurra jarra ngatipa gun-jechinuwa nyirri-weya nyirri-workiya. 9Aburr-werranga gubu-borrwuja, jimarna ngatipa nyirri-werra; aburr-werranga jarra marn'gi atila ngatipa nyirri-mola. Ngatipa minypa gu-mari nyirri-juwiya nyirri-bamburda, wurra jarra wanngu nyirri-nirrapa. Wangarr marn'gi nyjirri-nenga a-workiya, wurra jarra gala bulkich nyjirri-nega a-workiya. 10Ngatipa minypa wolawola wargugu nyirri-nirra nyirri-workiya, wurra jarra nyirri-worlworlchingapa nyirri-nirra. Ngatipa nyirri-welangga minypa nyirri-delipa, wurra aburr-jaranga gu-galiya yerrcha ngatipa nyirri-gunggajinga burrwa nyirri-workiya, birripa aburr-welangga barra minypa wana aburr-ni gatiya Wangarr ana-murna. Ngatipa gala gorlk nyirri-dima, wurpa lika warrpam nyirri-dimanga minypa ngatipa rrapa Christ gu-ngardapa nyiburr-negiyana.
11Ana-goyburrpa nyiburr-gata Gorint (Corinth) nyiburr-nirra, japurra ngapa nyiburr-jirra, gun-gata ngatipa nyirri-wena ana-gorrburrwa geka, ngatipa minypa nyirri-gurdagurdarriyana ana-gorrburrwa rrapa gala gun-nga nyirri-yilkakajarna. Wurra minypa burr-guya jal nyirri-nirra ana-gorrburrwa, 12ngatipa gala nyirri-gopiya ana-gorrburrwa nyirri-ni, wurra ana-goyburrpa jarra nyiburr-gopiya nyiburr-nirra atila ngatipa. 13Wurra gun-guna ngaypa ngu-wengga barra ana-gorrburrwa gun-maywapa minypa ana-goyburrpa nyiburr-ngaypa gu-ngarda yerrcha: Ngaw minyja barra ana-goyburrpa nyibu-gurdanyja gurda atila gu-gata ngacha minypa ngatipa gurrurta nyirri-dimanga ana-gorrburrwa?
Buburr-ngorrkorndiya
14Aburr-werranga aburr-gata gala marr aburr-balcha nula Wangarr, ana-goyburrpa gala barra nyiburr-malcha burrwa o gu-ngardapa nyiburr-negiya. Ngardawa gala gun-nga gu-ngardapa butula gun-nerra rrapa gun-mola; gala gun-nga gu-ngardapa butula gun-gujayanaya rrapa an-munya; 15gala gun-nga gu-ngardapa butula Christ rrapa an-gata walkwalk Bal'ayal (Belial), an-gatiya Jeytan (Satan); rrapa gala gun-nga gu-ngardapa butula Christ a-yika marr a-balcharra nula rrapa an-gata gala marr a-balcha nula. Wurra gun-nyagara, a-ja, a-la! 16Minypa gun-maywapa ranginy gala gun-nga gu-ngardapa butula gun-gata bala gun-japurra Wangarr gun-nika rrapa gun-nerranga bala gun-gata an-guripa an-guyinda wangarr gubu-gupurda nula aburr-workiya. Wurra jarra ngardapa ngardapa. Wurra gun-gata bala Wangarr gun-nika nipa a-nirrapa a-workiya, gun-narda jarra gun-burral ngayburrpa. Minypa Wangarr burr-ngurrjinga aburr-yigipa gu-galiya yerrcha, a-yinanga,
“Ngaypa barra wugupa burrwa nyiburr-ni,
rrapa wugupa nyiburr-bampa barra nyiburr-workiya.
Ngaypa ngu-ni barra burrwa Wangarr,
rrapa birripa barra aburr-ngaypa gu-galiya yerrcha aburr-ni barra.”
17Rrapa gu-gurda nula nipa a-yinaga a-weya arrburrwa a-nirra,
“Burrbu-bawa aburr-gata.
Gun-nerra nyin-diman.
Buburr-ngorrkorndiya.
Gala barra gun-nerra nyibi-rrima.
Wurra bubu-bawa gun-gata,
lika ngaypa ng-gonyja barra ana-gorrburrwa.
18Ngaypa ngu-nyanyapa ana-gorrburrwa ngu-ni barra,
rrapa ana-goyburrpa barra nyiburr-walkurpa nyiburr-ni barra apula.
A-yinagata a-weya a-nirra Bunggawa an-gata wana an-babalapa.”