Wangarr Burr-yika Gu-galiya Yerrcha Mu-ngoyurra Nipa Burr-menga
91Minypa ngaypa ng-guna nipa an-gata Christ, gun-guna ngaypa ngu-wengga barra gun-burral; gala arr-yolka. Wurra nipa Mern An-mawunga wugupa apula, wuparnana ngu-ngurrnga ngaypa ng-galiyarra 2-3burr-guya wargugu ngu-nirra burrwa aburr-ngaypa aburr-borrmunga ngayburrpa gu-ngardapa nyiburr-bapurr. Minyjiya. Ngaypa wupa ngu-ngurrnga ngu-borrwuja yama ngaypa jimarna Christ a-bachirramiya apula rraka ngaypa rrapa nipa nyirri-ngorrkorndiya, minyja nipa Christ a-gunggaja burrwa birripa 4Yichrayal (Israel) aburr-guyinda. Ngardawa birripiya nipa Wangarr mu-ngoyurra burr-menga aburr-yigipa gu-galiya yerrcha. Birripa aburr-gatiya nipa wugupa burrwa a-jayanayana a-ji a-workiyana, rrapa a-wena burrwa gun-molamola nipa gu-borrwurra burrwa, rrapa gu-gurrmurra burrwa joborr minypa birripa barra aburr-yinmiya aburr-marrngoypiya nula aburr-workiya, rrapa gochila bin-dana wanngu gun-guni. 5Minypa aburr-birripa nyanyapa burra yerrcha, ngaja, ngarla, nipa Wangarr a-jerrjerrjiyana burrwa. Rrapa Christ ana-bona, nipa an-gugaliya gu-birripa gu-rrawa. Gun-nardiya rrapa ganapiya, barra Wangarr an-nelangga ngayburrpa an-molamola ngubi-nega, an-gatiya wana an-babalapa.
6Wurra gun-gata minypa Wangarr gochila bin-dana Yichrayal yerrcha, gun-narda ngika minypa jimarn jarra burr-yolkajarna. Wurra jarra aburr-gata aburr-jaranga gu-galiya yerrcha nipa an-gata Yichrayal*Yichrayal nipa an-gata Jeykap (Jacob), wurra minypa jurdach Wangarr an-geka an-nelangga a-garrana. Yichrayal. Minyja na Genesis 32:28 rrapa 35:10:* burr-bokamurra, aburr-werranga aburr-gatiya gun-burral ngika aburr-borrmunga. 7Minyjiya. Aybriyam (Abraham) burr-yika ngika gu-ngarda yerrcha, marrban nipa an-birripa an-guwelamagepa. Ngardawa Wangarr a-wena nula Aybriyam, a-yinagata,
“An-nginyipa walkur Ayjek (Isaac) barra burr-bokama,
birripa aburr-gatiya gun-burral aburr-nginyipa gu-galiya yerrcha.”
8Gun-narda nipa a-wena, minypa nipa gu-borrwurra aburr-gata aburr-werranga Aybriyam burr-bokamurra birripa ngika Wangarr burr-yika gu-ngarda yerrcha, wurra jarra gochila aburr-gurra wupa, birripa gun-burral Aybriyam burr-yika gu-galiya yerrcha nipa Wangarr a-jerrjerrjiyana burrwa. 9Ngardawa gun-gata Wangarr gochila a-rrana Aybriyam, nipa a-yinanga nula,
“Nuwurra gun-balmapa gu-ji barra ngaypa nguna-jeka barra,
rrapa Jera (Sarah) an-nurra a-ma barra nggula.”
10Rrapa gun-narda ngardapa ngika, wurra gun-gatiya rrapa Rab'eka (Rebecca) bijirri-dimarra, mu-wurra yerrcha gu-ngardapa abirri-bambungguna. Minypa abirri-gata wuriya an-ngardapa nyanyapa buta nipa an-gata an-ngayburrpa mu-ngoyurra an-guyinda Ayjek, 11rrapa wuriya gun-gatiya bitipa gala burdak abirri-bambunggiyarna rrapa gala gun-nga jama abirri-jirrarna gun-mola rrapa gun-nerra, wurra nipa Wangarr gipa mu-ngoyurra gu-borrwurra ana-nga an-gata an-nigipa. Ngardawa nipa Wangarr mu-ngoyurra gu-borrwurra minypa aburr-yigipa gu-ngarda yerrcha nipa Wangarr burr-yika, gun-narda ngika minypa an-gugaliya jama a-jirra a-workiya, wurra jarra minypa Wangarr nipa wupa ngardapa niya gu-borrwurra rrapa a-jerrjerrjiyana burrwa. 12Gu-gurda ngacha minypa nipa mu-ngoyurra a-wena achila Rab'eka, a-yinanga achila,
“Delipa yerrcha nginyipa bijirri-ma barra,
mu-ngoyurra an-guyinda nipa barra an-mujama a-ni nula jurdach an-guyinda.”
13Gun-narda minypa rrapa janguny gu-yurra, gu-yinagata,
“Jeykap (Jacob) ngaypa jal ngu-nirra nula,
wurra Yicho (Esau) gala jal ngu-ni nula.”
14Lika ngayburrpa nguburr-yinmiya barra ngubu-borrwa? Wurra gun-narda minypa jimarn jarra nginyipa nipa Wangarr gala an-jechinuwa, ya? Wurra ngika, a-la! 15Wurra minypa nipa a-yinanga nula Mojich (Moses),
“An-gata ana-nga ngaypa ngu-borrwurra nula,
an-gata ngaypa barra ngu-worija nula.
Minypa an-gata ana-nga ngaypa ngu-borrwurra nula,
an-gata ngaypa barra ng-gunggaja nula.”
16Gu-gurda nula janguny lika ngayburrpa ngubu-borrwurra nguburr-yigipa arr-nenga Wangarr, ngika minypa nguburr-gugaliya ngayburrpa wupa ngardapa ngubu-borrwuja rrapa jama nguburr-jirra, wurra minypa Wangarr nipa wupa ana-nyala a-gunggajinga arrburrwa jarra. 17Ngardawa mu-jurra gu-yurra janguny, minypa Wangarr a-wena nula Berow (Pharoah), a-yinanga nula,
“Ngaypa ngiy-gurrmurra, nginyipa bunggawa nyi-nirra gun-gata rrawa Yijipt (Egypt),
ngaypa barra yarlanga ngu-nega barra ngaypa jarra wana ngu-babalapa,
rrapa janguny barra gu-barrjeka apula,
aburr-galiya barra gun-nardiya rrawa gu-jirra gu-boya.”
18A-yinagata Wangarr a-wena nula Berow. Minypa nipa Wangarr mu-ngoyurra gu-borrwurra rrapa aburr-werranga gu-galiya yerrcha nipa a-gunggajinga burrwa a-workiya, wurra aburr-werranga nipa mun-molma mun-derta mun-gorla mu-nenga burrwa jarra.
19Lika ana-goyburrpa, ny-nyardapa ny-yinga waygaji nguna-wenggana, ny-yinda apula, “Gun-narda lika an-nga nula nipa Wangarr nguna-ngurrjinga, jimarna ngaypa ngu-werra? Wurra nipa jarra gu-borrwurra rrapa gala ana-nga barrwa a-yinmiya.” 20Wurra nginyipa jarra nyi-gugaliya, ana-nga a-wena nggula nginyipa ny-jurda ny-bachirra nula Wangarr? Wurra gala ny-yinmiya ny-jurda biy-jarlapunapa nginyipa ny-yengga nula nipa biy-jarlapuna, ny-yinda nula, “An-nga nula nginyipa nguna-jarlapuna minypa ng-gunaga?” 21Wurra minypa gun-maywapa ranginy an-gugaliya japalana a-jarlapurda a-workiya, nipa gun-mola nula minyja jal a-ni an-ngardapa japalana a-jarlapa barra ngayburrpa ngubi-na an-molamola, wurra an-nerranga japalana a-jarlapa jama nula an-gata minypa ngayburrpa gala jal nguburr-ni ngubi-na. Gun-narda gun-mola nula an-gata an-gugaliya, wuriya gu-ngardapa rrakal gu-guyinda nipa a-jarlapa.
22Rrapa nipa Wangarr a-yinagatiya minypa an-gata japalana a-jarlapurda a-workiya, gun-mola nula a-yinmiya nipa jama a-ji gun-nigipa jal. Minypa nipa Wangarr gu-borrwurra aburr-gata aburr-bachirra nula nipa burr-bu barra, rrapa minypa yarlanga gu-nega barra nipiya wana an-babalapa. Wurra gun-mola nula nipa minyja burdak a-derichinga, 23ngardawa gu-borrwurra nipa barra yarlanga gu-nega nipa an-molamola warrpam burrwa aburr-yigipa gu-galiya yerrcha nipa a-gunggajinga burrwa a-workiya, aburr-gatiya minypa nipa mu-ngoyurra burr-jarlapuna birripa barra gu-molamola aburr-ni. 24Minyja aburr-gata gu-galiya yerrcha ngayburrpa nguburr-yigipa Wangarr nguburr-yika, ngaja, ngarla. Minypa Ju (Jew) yerrcha ngardapa ngika, wurra Jentayl (Gentile) yerrcha burr-guta. 25Minypa wola Wangarr a-wena gun-gata nipa Woj'eya (Hosea) a-wukurrjinga, gu-yinaga janguny,
“Aburr-gata aburr-ngaypa ngika gu-galiya yerrcha,
barrwa aburr-ngaypa nguburr-nega barra.
Aburr-gata gala jal ngu-nirrarna burrwa,
barrwa ngaypa jal ngu-ni barra burrwa, rrapa aburr-ngaypa nguburr-nega barra.”
26A-yinagata,
“Gun-gatiya rrawa birripa aburr-galiyana ngaypa ngu-yinanga burrwa,
‘Nyiburr-gurda nyiburr-ngaypa ngika gu-galiya yerrcha’,
nuwurra jurdach aburr-galiya barra,
ngaypa ngu-yinda barra burrwa,
‘Nyiburr-gurda nyiburr-ngaypa gu-galiya yerrcha,
ngaypa ng-gunaga ngu-nirra ngu-burral Wangarr.’”
27Wurra Yichrayal yerrcha jarra, birripa wola Aych'aya (Isaiah) burr-ngurrjinga, nipa a-jabarrchinga a-ji, a-yinanga,
“Wuriya gun-gata minypa nipa Yichrayal burr-bokamurra aburr-yigipa gu-galiya yerrcha gun-burral aburr-jaranga,
minypa jaranga an-gata gu-bachirra a-yurra,
wurra birripa Wangarr barra wanngu burr-nega ngika aburr-jaranga.
28Ngardawa yibirrich nipa burr-bu barra aburr-gurdiya gorlk gun-nardiya rrawa gu-jirra gu-boya,
minypa nipa mu-ngoyurra mari gu-garrana burrwa.”
29Rrapa minypa gun-gapa mu-ngoyurra Aych'aya a-wena, nipa a-yinagata,
“Ngayburrpa nguburr-jaranga ngika.
Wurra Wangarr an-gata wana an-babalapa,
minyja nguburr-werranga Yichrayal yerrcha nipa gala arr-jarlapungarna arr-manggarna,
Yichrayal gugu gun-nyagara gu-nirrarna,
minypa gun-gata rrawa Jorram (Sodom) rrapa Gum'ora (Gomorrah) mu-ngoyurra gun-nyagara gu-ni.”
Yichrayal Yerrcha Aburr-barparpuna
30Ganapiya, lika ngayburrpa nguburr-yinmiya barra ngubu-borrwa? Wurra Jentayl yerrcha wuriya birripa gala gubu-bitimangarna aburr-workiyarna jechinuwa gun-guni, wurra birripa gubu-menga minypa birripa marr aburr-balcha. 31Wurra Yichrayal yerrcha birripa jarra gubu-bitimarra aburr-workiyana rum gun-gata jechinuwa gun-guni, wurra gala Wangarr jechinuwa burr-nengarna. 32Wurra gun-narda an-nga nula? Wurra ngardawa birripa gala gubu-borrwujarna aburr-yinmiya barra marr aburr-balcha nula Wangarr, wurra jarra gubu-borrwurra aburr-workiyana, jimarna barra birripa wupa ngardapa aburr-yinmiya barra jama aburr-ji rrapa minypa jechinuwa aburr-negiya. Minypa gun-maywapa an-gugaliya a-bamburda a-workiya rrapa wolawola gu-jandarra a-yerrnyjinga, birripa Yichrayal yerrcha aburr-yinagatiya, gu-jandarra minypa burr-yerrnyjinga, aburr-bungguna. [Marrka bubu-borrwa: gun-narda ngu-wena jandarra, minypa gun-burral Jesus Christ.] 33Minypa mu-jurra gu-yurra janguny, gu-yinaga,
“Minyja bubi-na, ngaypa jandarra ng-gurrmunga gata Jayan (Zion),
nipa gun-gurrema gu-yirda barra minypa gu-galiya yerrcha burr-yerrnyja, aburr-bungga.
Wurra ana-nga barra marr a-balcha nula jarra,
an-gata an-gugaliya gala a-yinmiya barrwa a-ngukiya rrapa gona a-ni.”

*9:6: Yichrayal nipa an-gata Jeykap (Jacob), wurra minypa jurdach Wangarr an-geka an-nelangga a-garrana. Yichrayal. Minyja na Genesis 32:28 rrapa 35:10:* burr-bokamurra, aburr-werranga aburr-gatiya gun-burral ngika aburr-borrmunga.